ਅੰਮ੍ਰਿਤਸਰ ਤੋਂ ਬਾਲੀਵੁੱਡ: ‘ਧੁਰੰਧਰ’ ਵਿੱਚ ਰਣਵੀਰ ਸਿੰਘ ਦੀ ਦਸਤਾਰ ਪਿੱਛੇ ਦਾ ਸਟਾਇਲਿਸਟ

ਭਾਰਤ ਦੇ ਬਾਕਸ ਆਫਿਸ ‘ਤੇ ਫਿਲਮ ਧੁਰੰਧਰ: ਦ ਰਿਵੈਂਜ ਇਸ ਸਮੇਂ ਛਾਈ ਹੋਈ ਹੈ। ਜਿਥੇ ਫਿਲਮ ਦੇ ਕਲਾਕਾਰਾਂ ਨੇ ਆਪਣੇ ਅਭਿਨੇ ਨਾਲ ਦਰਸ਼ਕਾਂ ਦਾ ਦਿਲ ਜਿੱਤਿਆ ਹੈ, ਉਥੇ ਹੀ ਅੰਮ੍ਰਿਤਸਰ ਦੇ ਕੁਝ ਆਮ ਲੋਕਾਂ ਨੇ ਵੀ ਇਸਨੂੰ ਹੋਰ ਅਸਲੀਅਤ ਦੇ ਨਾਲ ਪੇਸ਼ ਕਰਨ ਵਿੱਚ ਅਹਿਮ ਭੂਮਿਕਾ ਨਿਭਾਈ ਹੈ।

ਇਨ੍ਹਾਂ ਵਿੱਚੋਂ ਇੱਕ ਨਾਮ ਬਲਵਿੰਦਰ ਸਿੰਘ ਦਾ ਹੈ, ਜੋ ਅੰਮ੍ਰਿਤਸਰ ਦੇ ਕੋਟ ਖਾਲਸਾ ਇਲਾਕੇ ਵਿੱਚ ਆਪਣਾ ਦਸਤਾਰ ਸਟੂਡੀਓ ਚਲਾਉਂਦੇ ਹਨ। ਉਨ੍ਹਾਂ ਨੇ ਫਿਲਮ ਵਿੱਚ ਰਣਵੀਰ ਸਿੰਘ ਸਮੇਤ ਕਈ ਹੋਰ ਕਲਾਕਾਰਾਂ ਲਈ ਬਲੋਚੀ ਅਤੇ ਪਠਾਣੀ ਅੰਦਾਜ਼ ਦੀਆਂ ਪੱਗਾਂ ਬੰਨ੍ਹੀਆਂ ਹਨ।

ਪਰਦੇ ਪਿੱਛੇ ਦੀ ਮਿਹਨਤ

‘ਇੰਦਰ ਪੱਗੜੀ ਹਾਊਸ’ ਨਾਲ ਜੁੜੇ ਬਲਵਿੰਦਰ ਸਿੰਘ ਕਾਫੀ ਸਮੇਂ ਤੋਂ ਦਸਤਾਰ ਬੰਨ੍ਹਣ ਦੇ ਕੰਮ ਨਾਲ ਸੰਬੰਧਤ ਹਨ। ਵੱਖ-ਵੱਖ ਅੰਦਾਜ਼ਾਂ ਵਿੱਚ ਦਸਤਾਰ ਬੰਨ੍ਹਣ ਦੀ ਉਨ੍ਹਾਂ ਦੀ ਕਲਾ ਅਤੇ ਤਜਰਬਾ ਇਸ ਪ੍ਰੋਜੈਕਟ ਵਿੱਚ ਵੀ ਦਿਖਾਈ ਦਿੱਤਾ।

ਫਿਲਮ ਵਿੱਚ ਉਨ੍ਹਾਂ ਦਾ ਕੰਮ ਸਿਰਫ ਇੱਕ ਲੁੱਕ ਤਿਆਰ ਕਰਨ ਤੱਕ ਸੀਮਿਤ ਨਹੀਂ ਸੀ, ਸਗੋਂ ਕਿਰਦਾਰਾਂ ਦੇ ਸੰਦਰਭ ਦੇ ਅਨੁਸਾਰ ਦਸਤਾਰਾਂ ਨੂੰ ਤਿਆਰ ਕਰਨਾ ਵੀ ਸ਼ਾਮਲ ਸੀ। ਦਰਅਸਲ ਇਸ ਵਿੱਚ ਪੰਜਾਬੀ ਦਸਤਾਰਾਂ ਦੇ ਨਾਲ ਬਲੋਚੀ ਅਤੇ ਪਠਾਣੀ ਅੰਦਾਜ਼ ਦੀਆਂ ਪੱਗਾਂ ਵੀ ਸ਼ਾਮਲ ਸਨ।

ਬਲਵਿੰਦਰ ਸਿੰਘ ਸਾਡਾ ਪੰਜਾਬ ਨਾਲ ਖਾਸ ਗੱਲਬਾਤ ਦੌਰਾਨ ਦੱਸਦੇ ਹਨ ਕਿ ਉਹ ਪਹਿਲਾਂ ਸਿਰਫ ਸਿੱਖ ਦਸਤਾਰਾਂ ਲਈ ਬੁਲਾਏ ਗਏ ਸਨ। “ਫਿਲਮ ਦੇ ਡਾਇਰੈਕਟਰ ਨੇ ਪੁੱਛਿਆ ਕਿ ਕੀ ਤੁਸੀਂ ਬਲੋਚੀ ਅੰਦਾਜ਼ ਦੀ ਪੱਗ ਵੀ ਬੰਨ੍ਹ ਸਕਦੇ ਹੋ। ਉਨ੍ਹਾਂ ਨੇ ਮੈਨੂੰ ਕੋਸ਼ਿਸ਼ ਕਰਨ ਲਈ ਕਿਹਾ।” ਇਸ ਤੋਂ ਬਾਅਦ ਉਨ੍ਹਾਂ ਨੇ ਬਲੋਚੀ ਅੰਦਾਜ਼ ਨੂੰ ਸਮਝਣ ਅਤੇ ਅਭਿਆਸ ਕਰਨ ਦੀ ਸ਼ੁਰੂਆਤ ਕੀਤੀ। ਉਹ ਦੱਸਦੇ ਹਨ, “ਸਭ ਤੋਂ ਪਹਿਲਾਂ ਮੈਂ ਆਪਣੇ ਉੱਤੇ ਬੰਨ੍ਹ ਕੇ ਵੇਖੀ, ਫਿਰ ਹੋਰ ਲੋਕਾਂ ‘ਤੇ ਅਜ਼ਮਾਇਆ। ਜਦੋਂ ਇਹ ਫਿਲਮ ਦੀ ਟੀਮ ਨੂੰ ਪਸੰਦ ਆਈ, ਤਾਂ ਬਾਕੀ ਪੱਗਾਂ ਵੀ ਮੈਂ ਹੀ ਬੰਨ੍ਹਣ ਲੱਗ ਪਿਆ।”

ਫਿਲਮ ਸੈੱਟ ਦਾ ਅਨੁਭਵ

ਇਸ ਤੋਂ ਪਹਿਲਾਂ ਬਲਵਿੰਦਰ ਸਿੰਘ ਹਾਲੀਵੁੱਡ ਫਿਲਮ ਕੈਲਰੀ ਨਾਲ ਵੀ ਜੁੜ ਚੁੱਕੇ ਹਨ, ਜਿਥੇ ਉਨ੍ਹਾਂ ਨੇ ਅਦਾਕਾਰਾਂ ਲਈ ਪੱਗਾਂ ਸਜਾਉਣ ਦਾ ਕੰਮ ਕੀਤਾ ਸੀ। ਬਲਵਿੰਦਰ ਸਿੰਘ ਦੇ ਮੁਤਾਬਕ, ਇਸੇ ਫਿਲਮ ਦੀ ਟੀਮ ਧੁਰੰਧਰ ਵਿੱਚ ਵੀ ਪੱਗਾਂ ਨਾਲ ਸੰਬੰਧਿਤ ਕੰਮ ਦੇਖ ਰਹੀ ਸੀ, ਜਿਸ ਕਾਰਨ ਉਨ੍ਹਾਂ ਨੂੰ ਇਸ ਪ੍ਰੋਜੈਕਟ ਨਾਲ ਜੁੜਨ ਦਾ ਮੌਕਾ ਮਿਲਿਆ।ਧੁਰੰਧਰ ਵਰਗੇ ਪ੍ਰੋਜੈਕਟ ਨਾਲ ਜੁੜਨਾ ਉਨ੍ਹਾਂ ਲਈ ਇੱਕ ਮਹੱਤਵਪੂਰਨ ਮੋੜ ਸਾਬਤ ਹੋਇਆ ਹੈ, ਜਿਸ ਨਾਲ ਉਨ੍ਹਾਂ ਦੇ ਕੰਮ ਨੂੰ ਵੱਡੇ ਪੱਧਰ ‘ਤੇ ਪਛਾਣ ਮਿਲੀ।

ਉਨ੍ਹਾਂ ਨੇ ਦੱਸਿਆ ਕਿ ਹੁਣ ਕਈ ਲੋਕ ਉਨ੍ਹਾਂ ਨੂੰ ਫਿਲਮ ਨਾਲ ਜੋੜ ਕੇ ਪਹਿਚਾਣਦੇ ਹਨ ਅਤੇ ਇਹ ਉਨ੍ਹਾਂ ਲਈ ਇੱਕ ਸੰਤੋਸ਼ਜਨਕ ਅਨੁਭਵ ਹੈ। ਉਨ੍ਹਾਂ ਨੇ ਇਹ ਵੀ ਸਾਂਝਾ ਕੀਤਾ ਕਿ ਫਿਲਮ ਦੇ ਸੈੱਟ ‘ਤੇ ਉਨ੍ਹਾਂ ਦਾ ਅਨੁਭਵ ਕਾਫੀ ਸਕਾਰਾਤਮਕ ਰਿਹਾ। ਅਦਾਕਾਰ ਰਣਵੀਰ ਸਿੰਘ ਵੱਲੋਂ ਉਨ੍ਹਾਂ ਨੂੰ ਪੂਰਾ ਸਨਮਾਨ ਦਿੱਤਾ ਗਿਆ ਅਤੇ ਹੋਰ ਕਲਾਕਾਰਾਂ ਨਾਲ ਵੀ ਸਹਿਯੋਗਪੂਰਨ ਮਾਹੌਲ ਰਿਹਾ, ਜਿਸ ਨਾਲ ਕੰਮ ਕਰਨਾ ਆਸਾਨ ਬਣਿਆ।

ਇੰਦਰ ਪੱਗੜੀ ਹਾਉਸ

ਬਲਵਿੰਦਰ ਸਿੰਘ ਆਪਣੇ ਦਿਨ ਵਿੱਚ ਇੰਦਰ ਪੱਗੜੀ ਹਾਊਸ ਵਿੱਚ ਪੱਗਾਂ ਬੰਨ੍ਹ ਦੇ ਹਨ ਉਨ੍ਹਾਂ ਤੋਂ ਕਈ ਲੋਕ ਪੱਗ ਸਿੱਖਣ ਵੀ ਆਉਂਦੇ ਹਨ। ਉਹ ਇਸ ਕੰਮ ਨੂੰ ਸਿਰਫ ਪੇਸ਼ਾ ਨਹੀਂ, ਸਗੋਂ ਮਾਣ ਵਾਲੀ ਸੇਵਾ ਮੰਨਦੇ ਹਨ। ਉਨ੍ਹਾਂ ਵੱਲੋਂ ਅੰਮ੍ਰਿਤਸਰ ਦੇ ਗੋਬਿੰਦਗੜ੍ਹ ਕਿਲ੍ਹੇ ਵਿੱਚ ਬਣੇ ਦਸਤਾਰ ਮਿਊਜ਼ੀਅਮ ਵਿੱਚ ਵੀ ਆਪਣਾ ਯੋਗਦਾਨ ਦਿੱਤਾ ਗਿਆ ਹੈ, ਜਿਥੇ ਉਨ੍ਹਾਂ ਨੇ ਮੂਰਤੀਆਂ ‘ਤੇ ਵੱਖ-ਵੱਖ ਅੰਦਾਜ਼ਾਂ ਦੀਆਂ ਪੱਗਾਂ ਸਜਾਈਆਂ ਹਨ। ਇਹ ਮਿਊਜ਼ੀਅਮ ਭਾਰਤ ਵਿੱਚ ਆਪਣੀ ਕਿਸਮ ਦਾ ਵਿਲੱਖਣ ਕੇਂਦਰ ਮੰਨਿਆ ਜਾਂਦਾ ਹੈ, ਜੋ ਪੱਗਾਂ ਦੇ ਵੱਖ-ਵੱਖ ਸਟਾਇਲਾਂ ਨੂੰ ਦਰਸਾਉਂਦਾ ਹੈ।