ਭਾਰਤੀ ਕ੍ਰਿਕਟ ਨੂੰ ਨਵੀਂ ਦਿਸ਼ਾ ਦੇਣ ਵਾਲਾ ਪੰਜਾਬ ਦਾ ਪੁੱਤਰ

ਭਾਰਤੀ ਕ੍ਰਿਕਟ ਨੂੰ ਨਵੀਂ ਦਿਸ਼ਾ ਦੇਣ ਵਾਲਾ ਪੰਜਾਬ ਦਾ ਪੁੱਤਰ ਇੰਦਰ ਜੀਤ ਸਿੰਘ ਬਿੰਦਰਾ ਕਿਸੇ ਪਛਾਣ ਦਾ ਮੁਹਤਾਜ ਨਹੀਂ। ਕੇਵਲ ਪੰਜਾਬ ਹੀ ਨਹੀਂ ਬਲਕਿ ਭਾਰਤ ਅਤੇ ਵਿਸ਼ਵ ਕ੍ਰਿਕਟ ਨੂੰ ਆਸਮਾਨ ਦੀਆਂ ਬੁਲੰਦੀਆਂ ‘ਤੇ ਪਹੁੰਚਾਉਣ ਵਾਲਾ ਕ੍ਰਿਕਟ ਦਾ ਇਹ ਧਰੁਵ ਤਾਰਾ ਮਿਤੀ 25 ਜਨਵਰੀ 2026 ਨੂੰ ਸਦਾ ਲਈ ਵਿਲੀਨ ਹੋ ਗਿਆ। ਇਹਨਾਂ ਨੇ ਆਪਣੇ ਜੀਵਨ ਵਿੱਚ ਕ੍ਰਿਕਟ ਦੇ ਵੱਖ-ਵੱਖ ਅਹੁਦਿਆਂ ‘ਤੇ ਹੁੰਦਿਆਂ ਇਸ ਖੇਡ ਨੂੰ ਆਧੁਨਿਕੀਕਰਨ ਪ੍ਰਦਾਨ ਕੀਤਾ ਅਤੇ ਅੱਜ ਦੇ ਭਾਰਤੀ ਕ੍ਰਿਕਟ ਕੰਟ੍ਰੋਲ ਬੋਰਡ ਨੂੰ ਆਰਥਿਕ ਪੱਖੋਂ ਮਜ਼ਬੂਤ ਕਰਨ ਵਿੱਚ ਆਪਣਾ ਅਹਿਮ ਯੋਗਦਾਨ ਪਾਇਆ। ਆਉ ਇਹਨਾਂ ਦੇ ਕ੍ਰਿਕਟ ਨੂੰ ਦਿੱਤੇ ਯੋਗਦਾਨ ਦੇ ਸਫ਼ਰ ‘ਤੇ ਇੱਕ ਝਾਤ ਮਾਰਦੇ ਹਾਂ।

ਜਨਮ ਅਤੇ ਮੁੱਢਲਾ ਕਰੀਅਰ

ਸ. ਇੰਦਰ ਜੀਤ ਸਿੰਘ ਬਿੰਦਰਾ ਦਾ ਜਨਮ 2 ਸਤੰਬਰ,1942 ਨੂੰ ਪੰਜਾਬ ਦੇ ਅੰਮ੍ਰਿਤਸਰ ਵਿੱਚ ਹੋਇਆ ਅਤੇ ਮੁਢਲੇ ਰੂਪ ਵਿੱਚ ਆਪਣਾ ਕਰੀਅਰ ਪੰਜਾਬ ਕਾਡਰ ਦੇ IAS ਅਫਸਰ ਦੇ ਤੌਰ ‘ਤੇ ਸ਼ੁਰੂ ਕੀਤਾ। ਆਪ ਨੇ ਲੁਧਿਆਣਾ ਅਤੇ ਪਟਿਆਲਾ ਦੇ ਡਿਪਟੀ ਕਮਿਸ਼ਨਰ ਵਜੋਂ ਸੇਵਾਵਾਂ ਨਿਭਾਈਆਂ। ਆਪ ਨੇ ਭਾਰਤ ਦੇ ਰਾਸ਼ਟਰਪਤੀ ਦੇ ਸਪੈਸ਼ਲ ਸੈਕਰੇਟਰੀ ਦੇ ਤੌਰ ‘ਤੇ ਵੀ ਸੇਵਾਵਾਂ ਦਿੱਤੀਆਂ।

ਪੰਜਾਬ ਕ੍ਰਿਕਟ ਵਿੱਚ ਯੋਗਦਾਨ

ਪੰਜਾਬ ਦਾ ਪੁੱਤਰ ਹੋਣ ਦੇ ਨਾਤੇ ਸ. ਬਿੰਦਰਾ ਨੇ ਪੰਜਾਬ ਕ੍ਰਿਕਟ ਦੀ ਦਿਸ਼ਾ ਅਤੇ ਦਸ਼ਾ ਬਦਲਣ ਵਿੱਚ ਆਪਣਾ ਬਹੁਤ ਵੱਡਾ ਯੋਗਦਾਨ ਪਾਇਆ। ਆਪ 1978 ਤੋਂ 2014 ਤੱਕ ਪੰਜਾਬ ਕ੍ਰਿਕਟ ਐਸੋਸੀਏਸ਼ਨ ਦੇ ਪ੍ਰਧਾਨ ਰਹੇ। ਇਸ ਅਹੁਦੇ ‘ਤੇ ਰਹਿੰਦਿਆਂ ਆਪ ਨੇ 1993 ਵਿੱਚ ਮੁਹਾਲੀ ਵਿਖੇ PCA ਸਟੇਡੀਅਮ ਦੀ ਉਸਾਰੀ ਕਰਵਾਈ ਤੇ ਇਸ ਸਟੇਡੀਅਮ ਦੇ ਬਨਣ ਨਾਲ ਮੁਹਾਲੀ ਸਿਰਫ ਭਾਰਤ ਹੀ ਨਹੀਂ ਬਲਕਿ ਪੂਰੇ ਵਿਸ਼ਵ ਕ੍ਰਿਕਟ ਦੇ ਨਕਸ਼ੇ ਵਿੱਚ ਆ ਗਿਆ। ਇਹ ਸਟੇਡੀਅਮ ਆਪਣੀ ਆਧੁਨਿਕਤਾ ਅਤੇ ਤਕਨੀਕ ਵਜੋਂ ਪ੍ਰਸਿੱਧ ਹੋ ਗਿਆ। ਆਪਣੀ ਆਧੁਨਿਕ ਤਕਨੀਕ ਅਤੇ ਸ. ਬਿੰਦਰਾ ਦੇ ਯਤਨਾਂ ਸਦਕਾ ਇਸ ਸਟੇਡੀਅਮ ਵਿੱਚ ਕਈ ਅੰਤਰ-ਰਾਸ਼ਟਰੀ ਮੈਚ ਖੇਡੇ ਗਏ। ਇਹਨਾਂ ਵਿੱਚੋਂ 2011 ਦੇ ਕ੍ਰਿਕਟ ਵਰਲਡ ਕੱਪ ਦਾ ਸੈਮੀ-ਫਾਇਨਲ ਵੀ ਸ਼ਾਮਲ ਹੈ, ਜਿਸ ਵਿੱਚ ਭਾਰਤ ਨੇ ਪਾਕਿਸਤਾਨ ਨੂੰ ਹਰਾਇਆ ਸੀ। ਇਹ ਮੈਚ ਭਾਰਤ ਅਤੇ ਪਾਕਿਸਤਾਨ ਦੋਨਾਂ ਦੇਸ਼ਾਂ ਦੇ ਪ੍ਰਧਾਨ ਮੰਤਰੀਆਂ ਨੇ PCA ਸਟੇਡੀਅਮ ਵਿੱਚ ਖ਼ੁਦ ਦੇਖਿਆ ਸੀ। ਇਸ ਸਟੇਡੀਅਮ ਨੂੰ ਦਿੱਤੇ ਯੋਗਦਾਨ ਸਦਕਾ ਅਪ੍ਰੈਲ 2015 ਵਿੱਚ ਇਸ ਦਾ ਨਾਮ ਸੋਧ ਕੇ I.S Bindra-PCA ਸਟੇਡੀਅਮ ਰੱਖ ਦਿੱਤਾ ਗਿਆ।

ਭਾਰਤੀ ਕ੍ਰਿਕਟ ਨੂੰ ਯੋਗਦਾਨ

ਸ. ਬਿੰਦਰਾ ਦੇ ਅਣੱਥਕ ਯਤਨਾਂ ਸਦਕਾ 1987 ਵਿੱਚ ਪਹਿਲੀ ਵਾਰ ਕ੍ਰਿਕਟ ਵਰਡ ਕੱਪ ਦਾ ਆਯੋਜਨ ਕਰਨ ਦਾ ਭਾਰਤ ਨੂੰ ਮੌਕਾ ਮਿਲਿਆ। ਇਹ ਵਿਸ਼ਵ ਕ੍ਰਿਕਟ ਦੇ ਇਤਿਹਾਸ ਵਿੱਚ ਪਹਿਲੀ ਵਾਰ ਸੀ ਜਦੋਂ ਕ੍ਰਿਕਟ ਵਰਡ ਕੱਪ ਇੰਗਲੈਂਡ ਤੋਂ ਬਾਹਰ ਕਿਸੇ ਹੋਰ ਦੇਸ਼ ਵਿੱਚ ਖੇਡਿਆ ਗਿਆ। ਆਪ 1993 ਤੋਂ BCCI ਦੇ ਪ੍ਰਧਾਨ ਬਣੇ। ਇਸ ਦੌਰਾਨ ਆਪ ਨੇ 1996 ਵਰਲਡ ਕ੍ਰਿਕਟ ਕੱਪ ਭਾਰਤੀ ਉਪ-ਮਹਾਦੀਪ ਵਿੱਚ ਕਰਵਾਉਣ ਵਿੱਚ ਬਹੁਤ ਵੱਡਾ ਯੋਗਦਾਨ ਪਇਆ।

BCCI ਦੀ ਆਰਥਿਕ ਮਜ਼ਬੂਤੀ ਲਈ ਯੋਗਦਾਨ

ਸ. ਬਿੰਦਰਾ ਨੇ ਆਪਣੇ ਪ੍ਰਧਾਨ ਹੁੰਦਿਆਂ BCCI ਨੂੰ ਆਰਥਿਕ ਪੱਖੋਂ ਮਜ਼ਬੂਤ ਬਣਾਉਣ ਵਿੱਚ ਬਹੁਤ ਯੋਗਦਾਨ ਪਾਇਆ। ਪਹਿਲਾਂ ਭਾਰਤ ਦੇ ਅੰਤਰ-ਰਾਸ਼ਟਰੀ ਕ੍ਰਿਕਟ ਮੈਚਾਂ ਦੇ ਪ੍ਰਸਾਰਨ ਦਾ ਏਕਾਧਿਕਾਰ ਕੇਵਲ ਦੂਰਦਰਸ਼ਨ ਕੋਲ ਸੀ। 1994 ਵਿੱਚ ਸ. ਬਿੰਦਰਾ ਦੇ ਯਤਨਾਂ ਸਦਕਾ ਮੈਚਾਂ ਦੇ ਪ੍ਰਸਾਰਣ ਅਧਿਕਾਰ BCCI ਨੂੰ ਦੇਣ ਲਈ ਇਕ ਪਟੀਸ਼ਨ ਸੁਪਰੀਮ ਕੋਰਟ ਵਿੱਚ ਦਾਇਰ ਕੀਤੀ ਗਈ ਅਤੇ ਕਾਨੂੰਨੀ ਲੜਾਈ ਮਗਰੋਂ ਮੈਚਾਂ ਦੇ ਪ੍ਰਸਾਰਣ ਅਧਿਕਾਰ BCCI ਨੂੰ ਪ੍ਰਾਪਤ ਹੋਏ। ਮੈਚ ਪ੍ਰਸਾਰਣ ਦੇ ਨਵੇਂ ਯੁੱਗ ਦਾ ਆਰੰਭ ਹੋਣ ਨਾਲ BCCI ਦੀ ਆਮਦਨ ਵਿੱਚ ਬਹੁਤ ਵਾਧਾ ਹੋਇਆ।

ਅੰਤਰ ਰਾਸ਼ਟਰੀ ਕ੍ਰਿਕਟ ਵਿੱਚ ਯੋਗਦਾਨ

ਸ. ਬਿੰਦਰਾ 2010 ਤੋਂ 2012 ਤੱਕ ICC ਦੇ ਪ੍ਰਿੰਸੀਪਲ ਅਡਵਾਇਸਰ ਦੇ ਤੌਰ ‘ਤੇ ਨਿਯੁਕਤ ਹੋਏ ਅਤੇ ਅੰਤਰ-ਰਾਸ਼ਟਰੀ ਕ੍ਰਿਕਟ ਵਿੱਚ ਭਾਰਤ ਦੀ ਸਥਿਤੀ ਪਹਿਲਾਂ ਨਾਲੋਂ ਮਜ਼ਬੂਤ ਹੋਈ।

ਅੰਤਿਮ ਵਿਦਾਈ

ਪੰਜਾਬ ਦੀ ਧਰਤੀ ‘ਤੇ ਪੈਦਾ ਹੋਏ ਪੰਜਾਬ ਦੇ ਇਸ ਪੁੱਤਰ ਨੇ ਕੇਵਲ ਪੰਜਾਬ ਹੀ ਨਹੀਂ ਬਲਕਿ ਪੂਰੀ ਦੁਨੀਆਂ ਵਿੱਚ ਕ੍ਰਿਕਟ ਦੀ ਖੇਡ ਨੂੰ ਪ੍ਰਫੁੱਲਿਤ ਕਰਨ ਵਿੱਚ ਆਪਣਾ ਯੋਗਦਾਨ ਪਾਇਆ। ਭਾਵੇਂ 25 ਜਨਵਰੀ, 2026 ਨੂੰ 84 ਸਾਲ ਦੀ ਉਮਰ ਵਿੱਚ ਉਹ ਸਾਨੂੰ ਸਦੀਵੀ ਵਿਛੋੜਾ ਦੇ ਗਏ, ਪਰ ਉਹਨਾਂ ਦਾ ਕ੍ਰਿਕਟ ਜਗਤ ਨੂੰ ਦਿੱਤਾ ਯੋਗਦਾਨ ਸਦਾ ਯਾਦ ਰਖਿਆ ਜਾਵੇਗਾ।