ਪੰਜਾਬ ਦੇ ਮਾਨਸਾ ਦੇ ਦੋ ਡਾਕਟਰਾਂ ਦਾ ਨਾਂਅ ਹੋਵੇਗਾ ਗਿੰਨੀਜ਼ ਬੁੱਕ ਵਿੱਚ ਦਰਜ

ਪੰਜਾਬ ਦੇ ਮਾਨਸਾ ਜ਼ਿਲ੍ਹੇ ਨਾਲ ਸਬੰਧਤ ਦੋ ਡਾਕਟਰ ਡਾ. ਸੁਬੋਧ ਗੁਪਤਾ ਅਤੇ ਉਨ੍ਹਾਂ ਦੇ ਪੁੱਤਰ ਡਾ. ਨਿਸ਼ਾਂਤ ਗੁਪਤਾ ਦਾ ਨਾਮ ਹੁਣ ਵਿਸ਼ਵ ਪ੍ਰਸਿੱਧ Guinness World Records ਵਿੱਚ ਦਰਜ ਹੋਣ ਜਾ ਰਿਹਾ ਹੈ। ਇਹ ਉਪਲੱਬਧੀ ਉਨ੍ਹਾਂ ਨੇ ਮੈਡੀਕਲ ਖੇਤਰ ਵਿੱਚ ਆਰਟੀਫੀਸ਼ਲ ਇੰਟੈਲੀਜੈਂਸ (ਏ.ਆਈ.) ਵਰਤੋਂ ਨਾਲ ਸੰਬੰਧਤ ਇਕ ਵਿਲੱਖਣ ਯਤਨ ਰਾਹੀਂ ਹਾਸਲ ਕੀਤੀ ਹੈ।

ਨਵੀਂ ਦਿੱਲੀ ਵਿੱਚ National Board of Examinations ਵੱਲੋਂ ਕਰਵਾਏ ਜਾ ਰਹੇ ਇਕ ਵਿਸ਼ੇਸ਼ ਅਕਾਦਮਿਕ ਸਮਾਗਮ ਵਿੱਚ ਦੋਹਾਂ ਡਾਕਟਰਾਂ ਨੇ ਭਾਗ ਲਿਆ। ਇਹ ਸਮਾਗਮ ਮੈਡੀਕਲ ਵਿਗਿਆਨ ਵਿੱਚ ਏ.ਆਈ. ਦੀ ਭੂਮਿਕਾ, ਉਸ ਦੀਆਂ ਸੰਭਾਵਨਾਵਾਂ ਅਤੇ ਸੀਮਾਵਾਂ ਨੂੰ ਸਮਝਣ ਲਈ ਦੇਸ਼ ਵਿੱਚ ਪਹਿਲੀ ਵਾਰ ਆਯੋਜਿਤ ਕੀਤਾ ਗਿਆ ਹੈ। 20 ਹਫ਼ਤਿਆਂ ਦੇ ਇਸ ਸਮਾਗਮ ਵਿੱਚ ਦੇਸ਼ ਦੇ ਵੱਖ-ਵੱਖ ਹਿੱਸਿਆਂ ਤੋਂ ਚੁਣਿੰਦੇ ਡਾਕਟਰਾਂ ਅਤੇ ਵਿਗਿਆਨੀਆਂ ਨੇ ਹਿੱਸਾ ਲਿਆ ਹੈ।

ਇਸ ਵਿੱਚ ਇਹ ਵੀ ਵਿਚਾਰਿਆ ਗਿਆ ਕਿ ਕਿਹੜੀਆਂ ਸਥਿਤੀਆਂ ਵਿੱਚ ਏ.ਆਈ. ਮਨੁੱਖੀ ਇਲਾਜ ਵਿੱਚ ਸਹਾਇਕ ਸਾਬਤ ਹੋ ਸਕਦੀ ਹੈ ਅਤੇ ਕਿਹੜੀਆਂ ਥਾਵਾਂ ’ਤੇ ਇਸ ’ਤੇ ਨਿਰਭਰ ਨਹੀਂ ਕੀਤਾ ਜਾ ਸਕਦਾ। ਡਾ. ਸੁਬੋਧ ਗੁਪਤਾ ਨੇ ਦੱਸਿਆ ਕਿ ਏ.ਆਈ. ਰਾਹੀਂ ਕੀਤੇ ਇਲਾਜ ਦੀ ਭਰੋਸੇਯੋਗਤਾ ਅਤੇ ਸਿਹਤ ਉੱਤੇ ਇਸ ਦੇ ਪ੍ਰਭਾਵ ਬਾਰੇ ਸਮਾਗਮ ਵਿੱਚ ਵਿਸਥਾਰ ਨਾਲ ਜਾਣਕਾਰੀ ਦਿੱਤੀ ਗਈ। ਉਨ੍ਹਾਂ ਮੁਤਾਬਕ, ਇਸ ਵਿਚਾਰ-ਵਟਾਂਦਰੇ ਵਿੱਚ ਦਿੱਲੀ, ਪੰਜਾਬ, ਕੇਰਲਾ, ਪੱਛਮੀ ਬੰਗਾਲ ਅਤੇ ਮਹਾਰਾਸ਼ਟਰ ਤੋਂ ਚੋਣਵੇਂ ਡਾਕਟਰਾਂ ਤੇ ਮੈਡੀਕਲ ਖੋਜਕਾਰਾਂ ਨੇ ਭਾਗ ਲਿਆ।

ਡਾ. ਸੁਬੋਧ ਗੁਪਤਾ, ਜੋ ਕਿ ਬੱਚਿਆਂ ਦੀਆਂ ਬਿਮਾਰੀਆਂ ਦੇ ਮਾਹਿਰ ਰਹੇ ਹਨ ਅਤੇ ਸਿਹਤ ਵਿਭਾਗ ਵਿੱਚ ਸਿਵਲ ਸਰਜਨ ਵਜੋਂ ਸੇਵਾ ਨਿਭਾ ਚੁੱਕੇ ਹਨ, ਨੇ ਦੱਸਿਆ ਕਿ ਮੈਡੀਕਲ ਖੇਤਰ ਵਿੱਚ ਏ.ਆਈ. ਇੱਕ ਵੱਡੀ ਕ੍ਰਾਂਤੀ ਲਿਆ ਸਕਦਾ ਹੈ। ਉਨ੍ਹਾਂ ਮੁਤਾਬਕ, “ਅੱਜ ਦਾ ਯੁੱਗ ਤੇਜ਼ੀ ਨਾਲ ਬਦਲ ਰਿਹਾ ਹੈ ਅਤੇ ਨਵੀਂ ਤਕਨਾਲੋਜੀ ਮੈਡੀਕਲ ਖੇਤਰ ਵਿੱਚ ਵੀ ਆਪਣੀ ਥਾਂ ਬਣਾ ਰਹੀ ਹੈ। ਏ.ਆਈ. ਨਾਲ ਉਹ ਕੰਮ ਵੀ ਸੰਭਵ ਹੋ ਸਕਦੇ ਹਨ ਜੋ ਪਹਿਲਾਂ ਅਸੰਭਵ ਮੰਨੇ ਜਾਂਦੇ ਸਨ।” ਉਨ੍ਹਾਂ ਨੇ ਇਹ ਵੀ ਜੋੜਿਆ ਕਿ ਇਸ ਸਮਾਗਮ ਵਿੱਚ ਏ.ਆਈ. ਦੀਆਂ ਹੱਦਾਂ ’ਤੇ ਵੀ ਗੰਭੀਰ ਚਰਚਾ ਹੋਈ, ਤਾਂ ਜੋ ਡਾਕਟਰ ਇਸ ਤਕਨਾਲੋਜੀ ਨੂੰ ਜ਼ਿੰਮੇਵਾਰੀ ਨਾਲ ਵਰਤ ਸਕਣ।

ਡਾ. ਨਿਸ਼ਾਂਤ ਗੁਪਤਾ, ਜੋ ਕਿ ਸਿਵਲ ਹਸਪਤਾਲ ਮਾਨਸਾ ਵਿੱਚ ਚਮੜੀ ਰੋਗਾਂ ਦੇ ਮਾਹਿਰ ਹਨ। ਉਨ੍ਹਾਂ ਨੇ ਕਿਹਾ ਕਿ ਇਸ ਤਰ੍ਹਾਂ ਦੇ ਸਮਾਗਮ ਡਾਕਟਰਾਂ ਲਈ ਨਵੇ ਦਿਸ਼ਾਵਾਂ ਰਾਹ ਹਨ। ਅਸੀਂ ਇਥੇ ਸਿਰਫ ਸਿੱਖਣ ਹੀ ਨਹੀਂ ਆਏ, ਸਗੋਂ ਭਵਿੱਖ ਦੇ ਮੈਡੀਕਲ ਸਿਸਟਮ ਨੂੰ ਸਮਝਣ ਲਈ ਵੀ ਆਏ ਹਾਂ। ਏ.ਆਈ. ਸਿਰਫ ਸਹਾਇਕ ਟੂਲ ਨਹੀਂ, ਸਗੋਂ ਇੱਕ ਨਵੀਂ ਸੋਚ ਹੈ।”

ਇਸ ਸਮਾਗਮ ਵਿੱਚ ਭਾਗ ਲੈਣ ਵਾਲਿਆਂ ਨੂੰ ਵਿਸ਼ੇਸ਼ ਸਰਟੀਫ਼ੀਕੇਟ ਵੀ ਪ੍ਰਦਾਨ ਕੀਤੇ ਗਏ ਹਨ ਅਤੇ ਇਸ ਪੂਰੇ ਪ੍ਰੋਗਰਾਮ ਦੇ ਸਮਾਪਤ ਹੋਣ ਉਪਰੰਤ ਇੱਕ ਪੇਪਰ ਵੀ ਲਿਆ ਜਾਵੇਗਾ। ਇਹ ਪ੍ਰਕਿਰਿਆ ਡਾਕਟਰਾਂ ਦੀ ਸਮਝ ਅਤੇ ਪ੍ਰਯੋਗਾਤਮਕ ਯੋਗਤਾ ਦੀ ਜਾਂਚ ਕਰਨ ਲਈ ਬਣਾਈ ਗਈ ਹੈ।

ਖ਼ਾਸ ਗੱਲ ਇਹ ਹੈ ਕਿ ਪਿਉ-ਪੁੱਤਰ ਦੀ ਜੋੜੀ ਵਜੋਂ ਏ.ਆਈ. ਮੈਡੀਕਲ ਖੇਤਰ ਵਿੱਚ ਯੋਗਦਾਨ ਲਈ ਉਨ੍ਹਾਂ ਦਾ ਨਾਮ ਗਿੰਨੀਜ਼ ਬੁੱਕ ਵਿੱਚ ਦਰਜ ਕੀਤਾ ਜਾਵੇਗਾ, ਜੋ ਕਿ ਸਿਰਫ ਉਨ੍ਹਾਂ ਲਈ ਹੀ ਨਹੀਂ ਸਗੋਂ ਮਾਨਸਾ ਅਤੇ ਪੰਜਾਬ ਲਈ ਵੀ ਮਾਣ ਦੀ ਗੱਲ ਹੈ।

ਇਸ ਦਾ ਫਾਇਦਾ ਜਿਥੇ ਮੈਡੀਕਲ ਖੇਤਰ ਵਿੱਚ ਵੇਖਣ ਨੂੰ ਮਿਲੇਗਾ, ਉਥੇ ਹੀ ਇਸ ਨਾਲ ਪੰਜਾਬ ਦੇ ਮੈਡੀਕਲ ਸੈਕਟਰ ਨੂੰ ਵੀ ਨਵੀਂ ਉਰਜਾ ਅਤੇ ਦਿਸ਼ਾ ਮਿਲੇਗੀ। ਇਹ ਕਦਮ ਨਵੀਂ ਤਕਨਾਲੋਜੀ ਨੂੰ ਅਪਣਾਉਣ ਵੱਲ ਇੱਕ ਹੌਸਲਾ ਦੇਵੇਗਾ ਅਤੇ ਹੋਰ ਡਾਕਟਰਾਂ ਨੂੰ ਵੀ ਨਵੀਨਤਾ ਵੱਲ ਪ੍ਰੇਰਿਤ ਕਰੇਗਾ।