ਪੰਜਾਬ ਦਾ ‘ਵਿਹਾਨ ਬਣੇਗਾ ਵਿਰਾਟ’! ਡਾਕਟਰਾਂ-ਇੰਜੀਨੀਅਰਾਂ ਦੇ ਪਰਿਵਾਰ ‘ਚੋਂ ਨਿਕਲਿਆ ਕ੍ਰਿਕਟ ਦਾ ਸਿਤਾਰਾ

ਪਟਿਆਲਾ ਦੇ ਵਿਹਾਨ ਮਲਹੋਤਰਾ ਦੀ ਵੱਡੀ ਉਡਾਣ: ਅੰਡਰ-19 ਵਰਲਡ ਕੱਪ ‘ਚ ਜੜਿਆ ਸੈਂਕੜਾ, ਹੁਣ IPL ‘ਚ ਵਿਰਾਟ ਕੋਹਲੀ ਨਾਲ ਖੇਡਣ ਦਾ ਸੁਪਨਾ ਹੋਵੇਗਾ ਪੂਰਾ

ਖੇਡਾਂ ਜਾਂ ਫਿਰ ਖੇਤਾਂ ਵਿੱਚ ਜੇਕਰ ਕਿਸੇ ਨੇ ਨਾਮ ਖੱਟਿਆ ਹੈ ਤਾਂ, ਉਹ ਪੰਜਾਬੀਆਂ ਨੇ ਹੀ ਖੱਟਿਆ ਹੈ। ਖੇਤਾਂ ਵਿੱਚ ਫ਼ਸਲਾਂ ਉਗਾਉਣ ਦਾ ਕੰਮ ਹੋਵੇ ਜਾਂ ਫਿਰ ਨੈਸ਼ਨਲ ਜਾਂ ਫਿਰ ਇੰਟਰਨੈਸ਼ਨਲ ਖੇਡਾਂ ਦਾ ਦੌਰ ਹੋਵੇ, ਹਰ ਪਾਸੇ ਪੰਜਾਬੀ ਹੀ ਛਾਏ ਹੋਏ ਹਨ। 19 ਸਾਲਾਂ ਵਿਹਾਨ ਮਲਹੋਤਰਾ ਨੇ ਅੰਡਰ-19 ਵਿੱਚ ਭਾਰਤੀ ਟੀਮ ਲਈ ਜੋ ਕੁੱਝ ਕਰ ਵਿਖਾਇਆ ਹੈ, ਉਸਨੂੰ ਵੇਖ ਕੇ ਸਾਰੇ ਹੈਰਾਨ ਨੇ। ਪਟਿਆਲਾ ਦੇ ਰਹਿਣ ਵਾਲੇ ਮਨੋਜ ਮਲਹੋਤਰਾ ਇੰਜੀਨੀਅਰ ਅਤੇ ਪੂਨਮ ਮਲਹੋਤਰਾ ਡਾਕਟਰ ਦੇ ਪੁੱਤਰ ਵਿਹਾਨ ਇਸ ਵੇਲੇ ਦੁਨੀਆ ਵਿੱਚ ਭਾਰਤ ਦਾ ਝੰਡਾ ਬੁਲੰਦ ਕਰ ਰਹੇ ਹਨ।

ਵਿਹਾਨ ਅੰਡਰ-19 ਏਸ਼ੀਆ ਕੱਪ 2025 ਅਤੇ ਘਰੇਲੂ ਤਿਕੋਣੀ ਸੀਰੀਜ਼ ਵਿੱਚ ਖੇਡ ਚੁੱਕੇ ਹਨ। ਵਿਹਾਨ ਪਹਿਲਾਂ ਓਪਨਰ ਸਨ, ਪਰ ਬਾਅਦ ਵਿੱਚ ਵੈਭਵ ਸੂਰਿਆਵੰਸ਼ੀ ਅਤੇ ਆਯੁਸ਼ ਮਹਾਤਰੇ ਲਈ ਟਾਪ ਆਰਡਰ ਵਿੱਚ ਜਗ੍ਹਾ ਬਣਾਉਂਦੇ ਹੋਏ ਉਹ ਮੱਧਕ੍ਰਮ (ਮਿਡਲ ਆਰਡਰ) ਵਿੱਚ ਸ਼ਿਫਟ ਹੋ ਗਏ।

ਮਲਹੋਤਰਾ ਨੇ ਪਿਛਲੇ ਸਾਲ ਨਵੰਬਰ ਵਿੱਚ ਇੰਡੀਆ ਅੰਡਰ-19 ‘ਏ’ ਟੀਮ ਦੀ ਕਪਤਾਨੀ ਕੀਤੀ ਸੀ। ਉਸ ਤਿਕੋਣੀ ਸੀਰੀਜ਼ ਵਿੱਚ ਵਿਹਾਨ 5 ਪਾਰੀਆਂ ਵਿੱਚ 182 ਦੌੜਾਂ ਬਣਾ ਕੇ ਟਾਪ ਸਕੋਰਰ ਰਹੇ। ਵਿਹਾਨ ਨੇ ਪਟਿਆਲਾ ਦੀ ਕ੍ਰਿਕਟ ਹੱਬ ਅਕੈਡਮੀ ਵਿੱਚ ਕਮਲਪ੍ਰੀਤ ਸੰਧੂ ਤੋਂ ਕੋਚਿੰਗ ਲਈ ਹੈ। ਇਸ ਦੇ ਨਾਲ ਹੀ ਵਿਹਾਨ ਨੇ ਆਪਣੀ ਕ੍ਰਿਕਟਿੰਗ ਸਕਿੱਲ ਵਿੱਚ ਨਿਖਾਰ ਲਿਆਉਣ ਲਈ ਅੰਡਰ-19 ਕੋਚ ਹ੍ਰਿਸ਼ੀਕੇਸ਼ ਕਾਨਿਤਕਰ ਅਤੇ ਵੀ.ਵੀ.ਐਸ. ਲਕਸ਼ਮਣ ਦੀ ਵੀ ਮਦਦ ਲਈ।

ਵਿਹਾਨ ਮਲਹੋਤਰਾ ਟੀਮ ਦੇ ਸਟਾਰ ਬੱਲੇਬਾਜ਼ਾਂ ਸ਼ੁਭਮਨ ਗਿੱਲ ਅਤੇ ਵਿਰਾਟ ਕੋਹਲੀ ਨੂੰ ਆਪਣਾ ਆਦਰਸ਼ ਮੰਨਦੇ ਹਨ। ਵਿਹਾਨ ਦਾ ਮੰਨਣਾ ਹੈ ਕਿ ਜੇਕਰ ਤੁਸੀਂ ਰੈੱਡ-ਬਾਲ ਕ੍ਰਿਕਟ ਵਿੱਚ ਤਕਨੀਕੀ ਤੌਰ ‘ਤੇ ਮਜ਼ਬੂਤ ਹੋ, ਤਾਂ ਇਸ ਨਾਲ ਵ੍ਹਾਈਟ-ਬਾਲ ਕ੍ਰਿਕਟ ਵਿੱਚ ਕਾਫ਼ੀ ਫਾਇਦਾ ਮਿਲਦਾ ਹੈ। ਵਿਹਾਨ ਕਹਿੰਦੇ ਹਨ ਕਿ ਟੀ-20 ਕ੍ਰਿਕਟ ਦੇ ਇਸ ਦੌਰ ਵਿੱਚ ਵੀ ਲਗਾਤਾਰ ਮਿਹਨਤ ਕਰਨਾ ਸਭ ਤੋਂ ਜ਼ਰੂਰੀ ਹੈ। ਵਿਹਾਨ ਨੂੰ ਇੰਡੀਅਨ ਪ੍ਰੀਮੀਅਰ ਲੀਗ (ਆਈਪੀਐੱਲ 2026) ਲਈ ਹੋਈ ਮਿਨੀ ਨਿਲਾਮੀ ਦੌਰਾਨ ਰਾਇਲ ਚੈਲੰਜਰਜ਼ ਬੈਂਗਲੁਰੂ ਨੇ 30 ਲੱਖ ਰੁਪਏ ਦੇ ਬੇਸ ਪ੍ਰਾਈਸ ‘ਤੇ ਸਾਈਨ ਕੀਤਾ।

ਦੱਸਦੇ ਚੱਲੀਏ ਕਿ ਹੁਣ 19 ਸਾਲ ਦੇ ਹੋ ਚੁੱਕੇ ਵਿਹਾਨ ਦਾ ਵਿਰਾਟ ਕੋਹਲੀ ਨਾਲ ਖੇਡਣ ਦਾ ਸੁਪਨਾ ਵੀ ਪੂਰਾ ਹੋਣ ਜਾ ਰਿਹਾ ਹੈ। ਉਹ ਆਈਪੀਐੱਲ 2026 ਵਿੱਚ ਰਾਇਲ ਚੈਲੰਜਰਜ਼ ਬੈਂਗਲੁਰੂ ਲਈ ਖੇਡਦੇ ਹੋਏ ਵਿਰਾਟ ਨਾਲ ਡਰੈਸਿੰਗ ਰੂਮ ਸਾਂਝਾ ਕਰਨਗੇ।

ਪਟਿਆਲਾ ਦੀ ‘ਕ੍ਰਿਕਟ ਹੱਬ ਅਕੈਡਮੀ’ ਦੇ ਕੋਚ ਕਮਲ ਸੰਧੂ ਨੂੰ ਉਹ ਦਿਨ ਅੱਜ ਵੀ ਯਾਦ ਹੈ, ਜਦੋਂ ਇੱਕ 9 ਸਾਲ ਦੇ ਬੱਚੇ ਨੇ ਉਨ੍ਹਾਂ ਕੋਲ ਆ ਕੇ ਕਿਹਾ ਸੀ, “ਮੈਂ ਵਿਰਾਟ ਕੋਹਲੀ ਵਰਗਾ ਬਣਨਾ ਹੈ। ਮੈਂ ਉਨ੍ਹਾਂ ਨਾਲ ਖੇਡਣਾ ਚਾਹੁੰਦਾ ਹਾਂ।” ਉਦੋਂ ਉਸ ਬੱਚੇ ਨੂੰ ਨਹੀਂ ਪਤਾ ਸੀ ਕਿ ਇੱਕ ਦਿਨ ਉਸ ਦਾ ਇਹ ਸੁਪਨਾ ਉਸ ਨੂੰ ਕ੍ਰਿਕਟ ਦੀਆਂ ਬੁਲੰਦੀਆਂ ‘ਤੇ ਲੈ ਜਾਵੇਗਾ। ਅਸੀਂ ਗੱਲ ਕਰ ਰਹੇ ਹਾਂ ਵਿਹਾਨ ਮਲਹੋਤਰਾ ਦੀ, ਜੋ ਅੰਡਰ-19 ਭਾਰਤੀ ਕ੍ਰਿਕਟ ਟੀਮ ਦੇ ਉਪ-ਕਪਤਾਨ ਹਨ।

ਇਸ ਅੰਡਰ-19 ਵਰਲਡ ਕੱਪ ਦਾ ਭਾਰਤ ਦਾ ਇਕਲੌਤਾ ਸੈਂਕੜੇਵੀਰ

ਵਿਹਾਨ ਮਲਹੋਤਰਾ ਅੰਡਰ-19 ਵਰਲਡ ਕੱਪ 2026 ਵਿੱਚ ਭਾਰਤ ਲਈ ਸੈਂਕੜਾ ਲਗਾਉਣ ਵਾਲੇ ਇਕਲੌਤੇ ਬੱਲੇਬਾਜ਼ ਹਨ। ਉਨ੍ਹਾਂ ਨੇ ਸੁਪਰ ਸਿਕਸ ਦੇ ਪਹਿਲੇ ਮੈਚ ਵਿੱਚ ਜ਼ਿੰਬਾਬਵੇ ਖ਼ਿਲਾਫ਼ ਨਾਬਾਦ 109 ਦੌੜਾਂ ਦੀ ਪਾਰੀ ਖੇਡੀ, ਜਿਸ ਨੇ ਟੀਮ ਨੂੰ 352 ਦੇ ਵਿਸ਼ਾਲ ਸਕੋਰ ਤੱਕ ਪਹੁੰਚਾਉਣ ਵਿੱਚ ਅਹਿਮ ਭੂਮਿਕਾ ਨਿਭਾਈ। ਬੁਲਾਵਾਯੋ ਵਿੱਚ ਹੋਏ ਇਸ ਮੈਚ ਵਿੱਚ ਭਾਰਤ ਨੇ ਜ਼ਿੰਬਾਬਵੇ ਨੂੰ ਸਿਰਫ਼ 148 ਦੌੜਾਂ ‘ਤੇ ਢੇਰ ਕਰਕੇ ਵੱਡੀ ਜਿੱਤ ਹਾਸਲ ਕੀਤੀ।

ਕਮਲ ਸੰਧੂ ਦੱਸਦੇ ਹਨ ਕਿ, “ਕੀ ਪਤਾ ਸੀ ਕਿ ਉਹ (ਵਿਹਾਨ) ਜੋ ਬੋਲੇਗਾ, ਇੱਕ ਦਿਨ ਸੱਚ ਹੋ ਜਾਵੇਗਾ। ਮੈਂ ਉਸ ਲਈ ਬਹੁਤ ਖੁਸ਼ ਹਾਂ। ਉਹ ਵਿਰਾਟ ਦੇ ਵੀਡੀਓ ਦੇਖਦਾ ਸੀ—ਉਸਦੇ ਸ਼ਾਟਸ, ਖਾਸ ਕਰਕੇ ਕਵਰ ਡਰਾਈਵ ਉਸਨੂੰ ਬਹੁਤ ਪਸੰਦ ਸੀ। ਉਹ ਵੀ ਫਿਟਨੈਸ ਦਾ ਦੀਵਾਨਾ ਹੈ। ਆਰਸੀਬੀ ਲਈ ਖੇਡਣ ‘ਤੇ ਉਸਨੂੰ ਵਿਰਾਟ ਤੋਂ ਬਹੁਤ ਕੁਝ ਸਿੱਖਣ ਨੂੰ ਮਿਲੇਗਾ।”

ਹਰ ਪੁਜੀਸ਼ਨ ‘ਤੇ ਬੱਲੇਬਾਜ਼ੀ ਕਰਨ ਦਾ ਦਮ

ਵਿਹਾਨ ਨੇ ਆਪਣੇ ਕਰੀਅਰ ਵਿੱਚ ‘ਮੈਂ ਕੁਝ ਵੀ ਕਰ ਸਕਦਾ ਹਾਂ’ ਵਾਲੇ ਮਾਈਂਡਸੈੱਟ ਨਾਲ ਖੇਡ ਨੂੰ ਅਪਣਾਇਆ ਹੈ। ਕਦੇ ਓਪਨਰ ਰਿਹਾ ਵਿਹਾਨ ਹੁਣ ਕਿਸੇ ਵੀ ਪੁਜੀਸ਼ਨ ‘ਤੇ ਬੱਲੇਬਾਜ਼ੀ ਕਰਨ ਲਈ ਤਿਆਰ ਰਹਿੰਦਾ ਹੈ। ਇੰਨਾ ਹੀ ਨਹੀਂ, ਉਹ ਆਪਣੀ ਸਪਿਨ ਗੇਂਦਬਾਜ਼ੀ ਅਤੇ ਫੀਲਡਿੰਗ ਨਾਲ ਵੀ ਕਮਾਲ ਕਰ ਰਿਹਾ ਹੈ। ਬੰਗਲਾਦੇਸ਼ ਦੇ ਖ਼ਿਲਾਫ਼ ਉਸਨੇ ਦੋ ਸ਼ਾਨਦਾਰ ਕੈਚ ਲਏ ਅਤੇ ਚਾਰ ਵਿਕਟਾਂ ਵੀ ਚਟਕਾਈਆਂ ਸਨ।

ਕੋਚ ਕਮਲ ਸੰਧੂ, ਜੋ ਪ੍ਰਭਸਿਮਰਨ ਸਿੰਘ ਅਤੇ ਅਨਮੋਲਪ੍ਰੀਤ ਸਿੰਘ ਵਰਗੇ ਖਿਡਾਰੀਆਂ ਦੇ ਵੀ ਕੋਚ ਹਨ, ਦੱਸਦੇ ਹਨ ਕਿ ਵਿਹਾਨ ਨੇ ਆਪਣੇ ਆਪ ਨੂੰ ਇੱਕ ‘ਮਲਟੀ-ਡਾਇਮੈਂਸ਼ਨਲ’ ਖਿਡਾਰੀ ਵਜੋਂ ਤਿਆਰ ਕੀਤਾ ਹੈ। ਉਹ ਰੋਜ਼ਾਨਾ 4-5 ਘੰਟੇ ਬੱਲੇਬਾਜ਼ੀ ਤੋਂ ਬਾਅਦ ਨੇਟਸ ‘ਤੇ 7-8 ਓਵਰ ਗੇਂਦਬਾਜ਼ੀ ਦੀ ਪ੍ਰੈਕਟਿਸ ਵੀ ਕਰਦਾ ਹੈ।

ਸਾਲ 2022 ਵਿੱਚ ਵਿਹਾਨ ਨੇ ਦੂਜੇ ਕੋਚ ਰਵਨੀਤ ਰਿੱਕੀ (2000 ਅੰਡਰ-19 ਵਰਲਡ ਕੱਪ ਜੇਤੂ ਟੀਮ ਦੇ ਮੈਂਬਰ) ਕੋਲ ਕੋਚਿੰਗ ਸ਼ੁਰੂ ਕੀਤੀ। ਰਿੱਕੀ ਦਾ ਕਹਿਣਾ ਹੈ ਕਿ ਵਿਹਾਨ ਨੇ ਆਪਣੀ ਓਪਨਿੰਗ ਪੁਜੀਸ਼ਨ ਛੱਡ ਕੇ ਮਿਡਲ ਆਰਡਰ ਵਿੱਚ ਖੇਡਣਾ ਸਵੀਕਾਰ ਕੀਤਾ ਅਤੇ ਉੱਥੇ ਵੀ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ। “ਮੈਂ ਬਹੁਤ ਖੁਸ਼ ਹਾਂ ਕਿ ਉਹ ਇਸ ਸਾਲ ਰਾਇਲ ਚੈਲੰਜਰਜ਼ ਬੈਂਗਲੁਰੂ ਵਿੱਚ ਵਿਰਾਟ ਕੋਹਲੀ ਵਰਗੇ ਦਿੱਗਜ ਨਾਲ ਡਰੈਸਿੰਗ ਰੂਮ ਸਾਂਝਾ ਕਰੇਗਾ। ਵਿਰਾਟ ਨਾਲ ਸਮਾਂ ਬਿਤਾਉਣ ਤੋਂ ਬਾਅਦ ਵਿਹਾਨ ਦੀ ਪਹੁੰਚ ਅਤੇ ਮਾਈਂਡਸੈੱਟ ਬਿਲਕੁਲ ਬਦਲ ਜਾਵੇਗਾ।”

ਡਾਕਟਰਾਂ ਅਤੇ ਇੰਜੀਨੀਅਰਾਂ ਦੇ ਪਰਿਵਾਰ ਵਿੱਚੋਂ ਕ੍ਰਿਕਟਰ

ਵਿਹਾਨ ਦੇ ਪਿਤਾ ਮਨੋਜ ਮਲਹੋਤਰਾ ਇੰਜੀਨੀਅਰ ਹਨ ਅਤੇ ਮਾਂ ਪੂਨਮ ਮਲਹੋਤਰਾ ਡਾਕਟਰ ਹਨ। ਉਹ ਵਿਹਾਨ ਨੂੰ ਡਾਕਟਰ ਜਾਂ ਇੰਜੀਨੀਅਰ ਬਣਾਉਣਾ ਚਾਹੁੰਦੇ ਸਨ ਅਤੇ ਕ੍ਰਿਕਟ ਕੋਚਿੰਗ ‘ਤੇ ਸਿਰਫ਼ ਇਸ ਲਈ ਭੇਜਿਆ ਸੀ ਤਾਂ ਜੋ ਉਹ ਖਾਲੀ ਸਮੇਂ ਵਿੱਚ ਮੋਬਾਈਲ ਫ਼ੋਨ ਤੋਂ ਦੂਰ ਰਹੇ। ਵਿਹਾਨ ਪੜ੍ਹਾਈ ਵਿੱਚ ਵੀ ਬਹੁਤ ਹੁਸ਼ਿਆਰ ਸੀ ਅਤੇ ਉਸਨੇ 95 ਫੀਸਦੀ ਅੰਕ ਹਾਸਲ ਕੀਤੇ ਸਨ, ਪਰ ਉਸਦਾ ਅਸਲੀ ਜਨੂੰਨ ਹਮੇਸ਼ਾ ਕ੍ਰਿਕਟ ਹੀ ਰਿਹਾ। ਕੋਚ ਸੰਧੂ ਦੱਸਦੇ ਹਨ ਕਿ ਵਿਹਾਨ ਦੀ ਮਾਨਸਿਕ ਮਜ਼ਬੂਤੀ ਦੇਖਣ ਯੋਗ ਹੈ। ਉਹ ਸਵੇਰੇ 11 ਵਜੇ ਗਰਾਊਂਡ ਵਿੱਚ ਆਉਂਦਾ ਸੀ ਅਤੇ ਰਾਤ 9-10 ਵਜੇ ਵਾਪਸ ਜਾਂਦਾ ਸੀ। ਹੁਣ ਉਸਦੀ ਆਈ.ਪੀ.ਐੱਲ. ਦੀ ਤਿਆਰੀ ਲਈ ਵਿਸ਼ੇਸ਼ ਯੋਜਨਾਵਾਂ ਬਣਾਈਆਂ ਜਾ ਰਹੀਆਂ ਹਨ।

ਖ਼ੈਰ, ਵਿਹਾਨ ਦੀ ਛੋਟੇ ਉਮਰੇ ਏਨੀ ਵੱਡੀ ਪ੍ਰਾਪਤੀ ਕਰਨੀ ਨੌਜਵਾਨਾਂ ਦੇ ਲਈ ਵੀ ਖ਼ਾਸ ਸੁਨੇਹਾ ਦਿੰਦੀ ਹੈ ਕਿ, ਇਨਸਾਨ ਜੋ ਵੀ ਦਿਲ ਵਿੱਚ ਧਾਰ ਲੈਂਦਾ ਹੈ, ਜੇਕਰ ਉਹ ਉਸੇ ਮਾਈਡਸੈੱਟ ਦੇ ਨਾਲ ਕੰਮ ਕਰਦਾ ਰਹੇ ਤਾਂ, ਉਸਨੂੰ ਕੋਈ ਵੀ ਹਰਾ ਨਹੀਂ ਸਕਦਾ। ਇਨਸਾਨ ਨੂੰ ਉਹੋ ਕੁੱਝ ਕਰਨਾ ਚਾਹੀਦਾ ਹੈ, ਜੋ ਉਹਦਾ ਮਨ ਚਾਹੁੰਦਾ ਹੈ। ਕਦੇ ਵੀ ਆਪਣਾ ਨਿਸ਼ਾਨਾ ਅਜਿਹਾ ਨਾ ਰੱਖੋ, ਜੋ ਦੂਜਿਆਂ ਦੁਆਰਾ ਦੱਸਿਆ ਗਿਆ ਹੈ, ਇਸ ਨਾਲ ਫਾਇਦਾ ਘੱਟ ਅਤੇ ਨੁਕਸਾਨ ਵੱਧ ਹੁੰਦੈ। ਉਮੀਦ ਹੈ ਕਿ ਵਿਹਾਨ ਮਲਹੋਤਰਾ ਇਸ ਵਾਰ ਆਈਪੀਐੱਲ ਵਿੱਚ ਵੀ ਚੰਗਾ ਪ੍ਰਦਰਸ਼ਨ ਕਰਕੇ ਪੰਜਾਬ ਦਾ ਨਾਮ ਰੌਸ਼ਨ ਕਰੇਗਾ।