ਸਵੇਰੇ ਹਸਪਤਾਲ ਦੇ ਵਾਰਡਾਂ ਵਿੱਚ ਮਰੀਜ਼ਾਂ ਦੀ ਹਾਲਤ ਦਾ ਜਾਇਜ਼ਾ ਲੈਣਾ, ਓਪਰੇਸ਼ਨ ਥੀਏਟਰ ਵਿੱਚ ਘੰਟਿਆਂ ਖੜ੍ਹੇ ਹੋ ਕੇ ਸਰਜਰੀਆਂ ਕਰਨਾ ਅਤੇ ਅਚਾਨਕ ਆਉਣ ਵਾਲੇ ਐਮਰਜੈਂਸੀ ਕੇਸਾਂ ਨਾਲ ਨਜਿੱਠਣਾ—ਇਹ ਸਭ 29 ਸਾਲਾ ਡਾ. ਸ਼ਿਵਾਂਸ਼ੀ ਦੀ ਰੋਜ਼ਾਨਾ ਜ਼ਿੰਦਗੀ ਦਾ ਹਿੱਸਾ ਹੈ। ਪਰ ਇਨ੍ਹਾਂ ਜ਼ਿੰਮੇਵਾਰੀਆਂ ਦੇ ਨਾਲ-ਨਾਲ ਉਨ੍ਹਾਂ ਨੇ ਆਪਣੇ ਇੱਕ ਹੋਰ ਸੁਪਨੇ ਨੂੰ ਵੀ ਜ਼ਿੰਦਾ ਰੱਖਿਆ। ਇਹੀ ਸੁਪਨਾ ਅੱਜ ਉਨ੍ਹਾਂ ਨੂੰ ਦੇਸ਼ ਦੇ ਵੱਕਾਰੀ ‘ਮਿਸਿਜ਼ ਇੰਡੀਆ’ ਮੁਕਾਬਲੇ ਦੇ ਟਾਪ-10 ਤੱਕ ਲੈ ਆਇਆ ਹੈ।
ਗੁਰੂ ਨਾਨਕ ਦੇਵ ਹਸਪਤਾਲ, ਅੰਮ੍ਰਿਤਸਰ ਦੇ ਜਨਰਲ ਸਰਜਰੀ ਵਿਭਾਗ ਵਿੱਚ ਸੀਨੀਅਰ ਰੈਜ਼ੀਡੈਂਟ ਵਜੋਂ ਸੇਵਾਵਾਂ ਨਿਭਾ ਰਹੀ ਡਾ. ਸ਼ਿਵਾਂਸ਼ੀ ਨੇ ਇਹ ਸਾਬਤ ਕੀਤਾ ਹੈ ਕਿ ਜੇਕਰ ਇਰਾਦੇ ਮਜ਼ਬੂਤ ਹੋਣ ਤਾਂ ਪੇਸ਼ੇਵਰ ਜ਼ਿੰਮੇਵਾਰੀਆਂ ਅਤੇ ਨਿਜੀ ਸੁਪਨਿਆਂ ਵਿਚਕਾਰ ਸੰਤੁਲਨ ਬਣਾਇਆ ਜਾ ਸਕਦਾ ਹੈ।
ਬਿਹਾਰ ਦੇ ਪੂਰਨੀਆ ਸ਼ਹਿਰ ਨਾਲ ਸਬੰਧਤ ਡਾ. ਸ਼ਿਵਾਂਸ਼ੀ ਦੀ ਪੜ੍ਹਾਈ ਅਤੇ ਕਰੀਅਰ ਦਾ ਸਫ਼ਰ ਕਈ ਰਾਜਾਂ ਅਤੇ ਦੇਸ਼ਾਂ ਵਿੱਚੋਂ ਲੰਘਿਆ। ਉਨ੍ਹਾਂ ਨੇ ਨੇਪਾਲ ਦੇ ਧਰਾਨ ਤੋਂ ਐੱਮ.ਬੀ.ਬੀ.ਐੱਸ. ਕੀਤੀ ਅਤੇ ਬਾਅਦ ਵਿੱਚ ਸਰਕਾਰੀ ਮੈਡੀਕਲ ਕਾਲਜ, ਅੰਮ੍ਰਿਤਸਰ ਤੋਂ ਜਨਰਲ ਸਰਜਰੀ ਵਿੱਚ ਐੱਮ.ਐੱਸ. ਦੀ ਡਿਗਰੀ ਹਾਸਲ ਕੀਤੀ। ਪੜ੍ਹਾਈ ਪੂਰੀ ਕਰਨ ਤੋਂ ਬਾਅਦ ਉਨ੍ਹਾਂ ਨੇ ਆਪਣੇ ਆਪ ਨੂੰ ਇੱਕ ਸਮਰਪਿਤ ਸਰਜਨ ਵਜੋਂ ਸਥਾਪਿਤ ਕੀਤਾ ਅਤੇ ਅੱਜ ਉਹ ਪੰਜਾਬ ਦੇ ਸਭ ਤੋਂ ਰੁਝੇਵੇਂ ਵਾਲੇ ਸਰਕਾਰੀ ਹਸਪਤਾਲਾਂ ਵਿੱਚੋਂ ਇੱਕ ਵਿੱਚ ਸੇਵਾਵਾਂ ਦੇ ਰਹੀ ਹੈ।
ਸਰਜਨ ਦੀ ਜ਼ਿੰਦਗੀ ਆਮ ਨਹੀਂ ਹੁੰਦੀ। ਕਈ ਵਾਰ ਡਿਊਟੀ ਦੇ ਘੰਟੇ ਤੈਅ ਨਹੀਂ ਹੁੰਦੇ। ਮਰੀਜ਼ਾਂ ਦੀ ਗੰਭੀਰ ਹਾਲਤ, ਲੰਬੀਆਂ ਸਰਜਰੀਆਂ ਅਤੇ ਐਮਰਜੈਂਸੀ ਸਥਿਤੀਆਂ ਕਾਰਨ ਡਾਕਟਰਾਂ ਨੂੰ ਆਪਣੇ ਨਿਜੀ ਸਮੇਂ ਨਾਲ ਸਮਝੌਤਾ ਕਰਨਾ ਪੈਂਦਾ ਹੈ। ਅਜਿਹੇ ਮਾਹੌਲ ਵਿੱਚ ਕਿਸੇ ਰਾਸ਼ਟਰੀ ਪੱਧਰ ਦੇ ਮੁਕਾਬਲੇ ਲਈ ਤਿਆਰੀ ਕਰਨਾ ਆਸਾਨ ਨਹੀਂ ਹੁੰਦਾ।
ਪਰ ਡਾ. ਸ਼ਿਵਾਂਸ਼ੀ ਨੇ ਆਪਣੇ ਸੁਪਨਿਆਂ ਅਤੇ ਨਿਜੀ ਰੁਚੀਆਂ ਨੂੰ ਕਦੇ ਪਿੱਛੇ ਨਹੀਂ ਛੱਡਿਆ। ਉਨ੍ਹਾਂ ਨੂੰ ਹਮੇਸ਼ਾ ਪਰਸਨੈਲਿਟੀ ਡਿਵੈਲਪਮੈਂਟ, ਫਿਟਨੈੱਸ ਅਤੇ ਪਬਲਿਕ ਸਪੀਕਿੰਗ ਵਿੱਚ ਦਿਲਚਸਪੀ ਰਹੀ। ਮੈਡੀਕਲ ਪੜ੍ਹਾਈ ਅਤੇ ਕਰੀਅਰ ਦੌਰਾਨ ਇਹ ਰੁਚੀਆਂ ਭਾਵੇਂ ਪਿੱਛੇ ਰਹਿ ਗਈਆਂ, ਪਰ ਕਦੇ ਖ਼ਤਮ ਨਹੀਂ ਹੋਈਆਂ। ਜਦੋਂ ‘ਮਿਸਿਜ਼ ਇੰਡੀਆ’ ਵਿੱਚ ਭਾਗ ਲੈਣ ਦਾ ਮੌਕਾ ਮਿਲਿਆ ਤਾਂ ਉਨ੍ਹਾਂ ਨੇ ਇਸਨੂੰ ਇੱਕ ਨਵੀਂ ਚੁਣੌਤੀ ਵਜੋਂ ਸਵੀਕਾਰ ਕੀਤਾ।
ਇਸ ਮੁਕਾਬਲੇ ਤੱਕ ਪਹੁੰਚਣ ਦਾ ਸਫ਼ਰ ਵੀ ਆਸਾਨ ਨਹੀਂ ਸੀ। ਫਿਟਨੈੱਸ ਟ੍ਰੇਨਿੰਗ, ਗਰੂਮਿੰਗ ਸੈਸ਼ਨ, ਕਮਿਊਨੀਕੇਸ਼ਨ ਸਕਿਲਜ਼, ਰੈਂਪ ਵਾਕ ਅਤੇ ਵੱਖ-ਵੱਖ ਪੜਾਵਾਂ ਦੀ ਤਿਆਰੀ ਲਈ ਸਮਾਂ ਕੱਢਣਾ ਇੱਕ ਵੱਡੀ ਚੁਣੌਤੀ ਸੀ। ਕਈ ਵਾਰ ਹਸਪਤਾਲ ਦੀ ਡਿਊਟੀ ਦੇਰ ਰਾਤ ਤੱਕ ਚੱਲਦੀ ਸੀ, ਪਰ ਇਸ ਦੇ ਬਾਵਜੂਦ ਉਹ ਆਪਣੀ ਤਿਆਰੀ ਜਾਰੀ ਰੱਖਦੀ ਰਹੀ।
ਡਾਕਟਰੀ ਪੇਸ਼ਾ ਸਿਰਫ ਸਰੀਰਕ ਨਹੀਂ, ਸਗੋਂ ਮਾਨਸਿਕ ਤੌਰ ’ਤੇ ਵੀ ਬੇਹੱਦ ਚੁਣੌਤੀਪੂਰਨ ਮੰਨਿਆ ਜਾਂਦਾ ਹੈ। ਲੰਬੀਆਂ ਡਿਊਟੀਆਂ, ਐਮਰਜੈਂਸੀ ਸਥਿਤੀਆਂ, ਮਰੀਜ਼ਾਂ ਦੀਆਂ ਚਿੰਤਾਵਾਂ ਅਤੇ ਨਿਜੀ ਜ਼ਿੰਦਗੀ ਦੀਆਂ ਜ਼ਿੰਮੇਵਾਰੀਆਂ ਦੇ ਵਿਚਕਾਰ ਕਈ ਵਾਰ ਥਕਾਵਟ ਅਤੇ ਦਬਾਅ ਮਹਿਸੂਸ ਹੋਣਾ ਸੁਭਾਵਿਕ ਹੈ। ਡਾ. ਸ਼ਿਵਾਂਸ਼ੀ ਦਾ ਸਫ਼ਰ ਵੀ ਇਨ੍ਹਾਂ ਚੁਣੌਤੀਆਂ ਤੋਂ ਅਛੂਤਾ ਨਹੀਂ ਰਿਹਾ। ਪਰ ਉਨ੍ਹਾਂ ਨੇ ਹਰ ਔਖੇ ਪਲ ਨੂੰ ਆਪਣੇ ਟੀਚੇ ਵੱਲ ਵਧਣ ਦੀ ਪ੍ਰੇਰਣਾ ਬਣਾਇਆ ਅਤੇ ਆਪਣੇ ਆਪ ਨੂੰ ਲਗਾਤਾਰ ਅੱਗੇ ਵਧਾਉਂਦੀ ਰਹੀ।
ਡਾ. ਸ਼ਿਵਾਂਸ਼ੀ ਦੱਸਦੀ ਹੈ ਕਿ ਕਈ ਦਿਨ ਅਜਿਹੇ ਵੀ ਆਏ ਜਦੋਂ ਥਕਾਵਟ ਕਾਰਨ ਸਭ ਕੁਝ ਬਹੁਤ ਮੁਸ਼ਕਲ ਲੱਗਦਾ ਸੀ, ਪਰ ਉਹ ਆਪਣੇ ਆਪ ਨੂੰ ਯਾਦ ਕਰਵਾਉਂਦੀ ਰਹੀ ਕਿ ਸੁਪਨੇ ਸਿਰਫ ਦੇਖਣ ਲਈ ਨਹੀਂ ਹੁੰਦੇ, ਉਨ੍ਹਾਂ ਲਈ ਮਿਹਨਤ ਵੀ ਕਰਨੀ ਪੈਂਦੀ ਹੈ।
ਇਸ ਸਾਲ 6 ਫਰਵਰੀ ਨੂੰ ਉਨ੍ਹਾਂ ਦਾ ਵਿਆਹ ਅੰਮ੍ਰਿਤਸਰ ਵਿੱਚ ਹੋਇਆ। ਵਿਆਹ ਤੋਂ ਬਾਅਦ ਜਿਥੇ ਇੱਕ ਪਾਸੇ ਨਵੀਆਂ ਪਰਿਵਾਰਕ ਜ਼ਿੰਮੇਵਾਰੀਆਂ ਸਨ, ਉੱਥੇ ਦੂਜੇ ਪਾਸੇ ਹਸਪਤਾਲ ਦੀ ਡਿਊਟੀ ਅਤੇ ‘ਮਿਸਿਜ਼ ਇੰਡੀਆ’ ਦੀ ਤਿਆਰੀ ਵੀ ਜਾਰੀ ਸੀ। ਪਰ ਉਨ੍ਹਾਂ ਨੇ ਇਨ੍ਹਾਂ ਜ਼ਿੰਮੇਵਾਰੀਆਂ ਨੂੰ ਰੁਕਾਵਟ ਨਹੀਂ ਬਣਨ ਦਿੱਤਾ।
ਉਨ੍ਹਾਂ ਦੀ ਮਿਹਨਤ ਦਾ ਨਤੀਜਾ ਉਸ ਵੇਲੇ ਸਾਹਮਣੇ ਆਇਆ ਜਦੋਂ ਉਹ ‘ਮਿਸਿਜ਼ ਇੰਡੀਆ’ ਦੇ ਟਾਪ-10 ਫਾਈਨਲਿਸਟਾਂ ਵਿੱਚ ਸ਼ਾਮਲ ਹੋ ਗਈ। ਇਹ ਉਪਲੱਬਧੀ ਸਿਰਫ਼ ਉਨ੍ਹਾਂ ਲਈ ਹੀ ਨਹੀਂ, ਸਗੋਂ ਪੰਜਾਬ ਅਤੇ ਬਿਹਾਰ ਦੋਵਾਂ ਲਈ ਮਾਣ ਵਾਲੀ ਗੱਲ ਬਣ ਗਈ। ਹਸਪਤਾਲ ਦੇ ਸਾਥੀਆਂ, ਦੋਸਤਾਂ ਅਤੇ ਪਰਿਵਾਰਕ ਮੈਂਬਰਾਂ ਵੱਲੋਂ ਉਨ੍ਹਾਂ ਨੂੰ ਲਗਾਤਾਰ ਵਧਾਈਆਂ ਮਿਲ ਰਹੀਆਂ ਹਨ।
ਡਾ.ਸ਼ਿਵਾਂਸ਼ੀ ਦਾ ਮੰਨਣਾ ਹੈ ਕਿ ‘ਮਿਸਿਜ਼ ਇੰਡੀਆ’ ਸਿਰਫ਼ ਸੁੰਦਰਤਾ ਦਾ ਮੁਕਾਬਲਾ ਨਹੀਂ ਹੈ। ਉਨ੍ਹਾਂ ਦੇ ਅਨੁਸਾਰ ਇਹ ਇੱਕ ਅਜਿਹਾ ਮੰਚ ਹੈ ਜੋ ਔਰਤਾਂ ਦੇ ਆਤਮ-ਵਿਸ਼ਵਾਸ, ਪ੍ਰਤਿਭਾ, ਲੀਡਰਸ਼ਿਪ ਅਤੇ ਸਮਾਜਿਕ ਸੋਚ ਨੂੰ ਸਾਹਮਣੇ ਲਿਆਉਂਦਾ ਹੈ। ਉਹ ਚਾਹੁੰਦੀ ਹੈ ਕਿ ਉਨ੍ਹਾਂ ਦੀ ਕਹਾਣੀ ਉਨ੍ਹਾਂ ਮਹਿਲਾਵਾਂ ਲਈ ਪ੍ਰੇਰਣਾ ਬਣੇ ਜੋ ਅਕਸਰ ਪਰਿਵਾਰ ਅਤੇ ਕਰੀਅਰ ਦੀਆਂ ਜ਼ਿੰਮੇਵਾਰੀਆਂ ਵਿਚਕਾਰ ਆਪਣੇ ਸੁਪਨਿਆਂ ਨੂੰ ਪਿੱਛੇ ਛੱਡ ਦਿੰਦੀਆਂ ਹਨ।
ਹੁਣ 12 ਜੁਲਾਈ ਨੂੰ ਜੈਪੁਰ ਵਿੱਚ ਹੋਣ ਵਾਲੇ ‘ਮਿਸਿਜ਼ ਇੰਡੀਆ’ ਦੇ ਗ੍ਰੈਂਡ ਫਿਨਾਲੇ ਲਈ ਉਹ ਪੂਰੀ ਤਿਆਰੀ ਵਿੱਚ ਜੁੱਟੀ ਹੋਈ ਹੈ। ਹਸਪਤਾਲ ਦੀਆਂ ਡਿਊਟੀਆਂ ਅਜੇ ਵੀ ਪਹਿਲਾਂ ਵਾਂਗ ਜਾਰੀ ਹਨ, ਪਰ ਇਸ ਦੇ ਨਾਲ-ਨਾਲ ਮੁਕਾਬਲੇ ਦੀ ਤਿਆਰੀ ਵੀ ਪੂਰੇ ਜੋਸ਼ ਨਾਲ ਚੱਲ ਰਹੀ ਹੈ।
ਫਾਈਨਲ ਦਾ ਨਤੀਜਾ ਜੋ ਵੀ ਰਹੇ, ਡਾ. ਸ਼ਿਵਾਂਸ਼ੀ ਦੀ ਇਹ ਯਾਤਰਾ ਪਹਿਲਾਂ ਹੀ ਇੱਕ ਸੁਨੇਹਾ ਦੇ ਚੁੱਕੀ ਹੈ—ਕਿ ਇਨਸਾਨ ਇੱਕੋ ਸਮੇਂ ਕਈ ਸੁਪਨੇ ਜੀ ਸਕਦਾ ਹੈ ਅਤੇ ਮਿਹਨਤ, ਅਨੁਸ਼ਾਸਨ ਤੇ ਵਿਸ਼ਵਾਸ ਨਾਲ ਉਨ੍ਹਾਂ ਨੂੰ ਹਕੀਕਤ ਵਿੱਚ ਬਦਲ ਸਕਦਾ ਹੈ।
ਪੰਜਾਬ ਦੀ ਨੁਮਾਇੰਦਗੀ ਕਰ ਰਹੀ ਇਹ ਨੌਜਵਾਨ ਸਰਜਨ ਅੱਜ ਉਨ੍ਹਾਂ ਹਜ਼ਾਰਾਂ ਮਹਿਲਾਵਾਂ ਲਈ ਪ੍ਰੇਰਣਾ ਬਣ ਚੁੱਕੀ ਹੈ, ਜੋ ਜ਼ਿੰਮੇਵਾਰੀਆਂ ਦੇ ਨਾਲ-ਨਾਲ ਆਪਣੇ ਸੁਪਨਿਆਂ ਨੂੰ ਵੀ ਉੱਡਾਣ ਦੇਣਾ ਚਾਹੁੰਦੀਆਂ ਹਨ।
Leave a Comment