ਤੁਰ ਗਿਆ ਪੰਜਾਬ ਦਾ ਧਰਮ…!

ਪੰਜਾਬ ਦਾ ਧਰਮ ਸਿੰਘ ਦਿਓਲ ਉਰਫ਼ ਧਰਮਿੰਦਰ 24 ਨਵੰਬਰ 2025 ਨੂੰ ਇਸ ਫ਼ਾਨੀ ਸੰਸਾਰ ਨੂੰ ਅਲਵਿਦਾ ਆਖ ਗਏ। ਇਹ ਖ਼ਬਰ ਪਹਿਲੀ ਨਜ਼ਰੇ ਇੰਝ ਸੀ ਕਿ ਐਵੇਂ ਪਹਿਲਾਂ ਦੀ ਤਰ੍ਹਾਂ ਅਫ਼ਵਾਹ ਹੀ ਹੋਣੀ ਹੈ। ਪਰ ਇੱਕ ਡੇਢ ਘੰਟੇ ਬਾਅਦ ਜਦੋਂ ਬੰਬੇ ਦੇ ਇੱਕ ਸੱਜਣ ਨੇ ਪੂਰੀ ਕਹਾਣੀ ਕਨਫਰਮ ਕਰ ਦਿੱਤੀ ਤਾਂ, ਸੱਚੀ ਧਰਮ ਨਾਲ… ਚੀਕ ਜਿਹੀ ਨਿਕਲੀ। ਧਰਮ ਨੂੰ ਚਾਹੁਣ ਵਾਲੇ ਕਰੋੜਾਂ ਲੋਕ ਤੇ ਸੱਜਣ ਬੇਲੀ ਰੋ ਰਹੇ ਨੇ। ਮੇਰੇ ਵਰਗੇ ਅੰਦਰੀਂ ਅੰਦਰ ਅੱਥਰੂ ਵਹਾ ਰਹੇ ਨੇ। ਜਿਨ੍ਹਾਂ ਦੀਆਂ ਫ਼ਿਲਮਾਂ ਵੇਖ-ਵੇਖ ਵੱਡੇ ਹੋਏ, ਜਦੋਂ ਪਤਾ ਲੱਗੇ ਉਹ ਅੱਜ ਇਸ ਦੁਨੀਆ ਵਿੱਚ ਨਹੀਂ ਰਿਹਾ ਤਾਂ, ਬੇਹੱਦ ਦੁੱਖ ਲੱਗਦਾ।

ਆਉਂਦੀ 8 ਦਸੰਬਰ ਨੂੰ ਹੀ ਧਰਮਿੰਦਰ 90 ਵਰ੍ਹਿਆਂ ਦੇ ਹੋਣ ਵਾਲੇ ਸੀ, ਜਿਸਦੀ ਚਾਹੁਣ ਵਾਲੇ ਬੜੀ ਬੇਸਬਰੀ ਨਾਲ ਉਡੀਕ ਕਰ ਰਹੇ ਸਨ, 90 ਪੂਰੇ ਨਾ ਹੋ ਸਕੇ। ਪਰ ਜਿੰਨੀ ਉਮਰ ਹੰਢਾਈ ਉਸ ਵਿੱਚ ਸਾਡੇ ਪੱਲੇ ਅਜਿਹਾ ਕੁੱਝ ਛੱਡ ਗਿਆ, ਜਿਹੜਾ ਰਹਿੰਦੀ ਦੁਨੀਆ ਤੱਕ ਸਾਡੇ ਕੋਲ ਰਹੇਗਾ। ਧਰਮ ਦੀ ਕੜਕਦੀ ਆਵਾਜ਼ ਅਤੇ ਉਹ ਦੁਸ਼ਮਣਾਂ ਨਾਲ ਲੋਹਾਂ ਲੈਂਦੇ ਦੇ ਸੀਨ ਅੱਖਾਂ ਮੂਹਰੇ ਹਮੇਸ਼ਾ ਰਹਿਣਗੇ। ਜਦੋਂ ਵੀ ਟੀਵੀ ‘ਤੇ ਉਨ੍ਹਾਂ ਦੀ ਕੋਈ ਫ਼ਿਲਮ ਆਵੇਗੀ ਤਾਂ, 24 ਨਵੰਬਰ 2025 ਦੀ ਦੁਪਹਿਰ ਜ਼ਰੂਰ ਚੇਤੇ ਆਵੇਗੀ। ਆਓ ਹੁਣ ਧਰਮਿੰਦਰ ਦੇ ਸੰਘਰਸ਼ ਬਾਰੇ ਅਤੇ ਫ਼ਿਲਮਾਂ ਵਿੱਚ ਕੀਤੇ ਕੰਮ ਬਾਰੇ ਝਾਤ ਮਾਰਦੇ ਹਾਂ।

‘ਦਿਲ ਭੀ ਤੇਰਾ ਹਮ ਭੀ ਤੇਰੇ’ ਫ਼ਿਲਮ ਨਾਲ ਧਰਿਆ ਸੀ ਸਿਨਮੇ ‘ਚ ਪੈਰ

ਧਰਮਿੰਦਰ ਨੇ ਫ਼ਿਲਮ ‘ਦਿਲ ਭੀ ਤੇਰਾ ਹਮ ਭੀ ਤੇਰੇ’ ਰਾਹੀਂ ਸਾਲ 1960 ਵਿੱਚ ਸਿਨੇਮਾਘਰਾਂ ਵਿੱਚ ਰਿਲੀਜ਼ ਹੋਈ ਇਸ ਫ਼ਿਲਮ ਨਾਲ ਹਿੰਦੀ ਸਿਨਮਾ ਵਿੱਚ ਪੈਰ ਧਰਿਆ ਅਤੇ ਫਿਰ ਕਦੇ ਪਿੱਛੇ ਮੁੜ ਕੇ ਨਹੀਂ ਦੇਖਿਆ। ਲਗਭਗ 65 ਸਾਲ ਤੱਕ ਬਾਲੀਵੁੱਡ ਵਿੱਚ ਰਾਜ ਕਰਨ ਵਾਲੇ ਧਰਮਿੰਦਰ ਨੇ 24 ਨਵੰਬਰ 2025 ਨੂੰ ਇਸ ਦੁਨੀਆ ਨੂੰ ਹਮੇਸ਼ਾ ਲਈ ਅਲਵਿਦਾ ਕਹਿ ਦਿੱਤਾ। ਇੱਕ ਸਫਲ ਅਦਾਕਾਰ ਵਜੋਂ ਸਿਨਮਾ ਜਗਤ ਵਿੱਚ ਧਰਮਿੰਦਰ ਦੀ ਵਿਰਾਸਤ ਦੀ ਖ਼ੂਬ ਚਰਚਾ ਕੀਤੀ ਜਾ ਰਹੀ ਹੈ। ਪਰ, ਕੀ ਤੁਸੀਂ ਇਹ ਜਾਣਦੇ ਹੋ ਕਿ ਉਹ ਕਦੇ ਵੀ ਖ਼ੁਦ ਨੂੰ ਨੰਬਰ-1 ਨਹੀਂ ਮੰਨਦੇ ਸਨ? ਇਸ ਮਾਮਲੇ ਨੂੰ ਲੈ ਕੇ ਉਨ੍ਹਾਂ ਨੇ ਇੱਕ ਮੀਡੀਆ ਇੰਟਰਵਿਊ ਵਿੱਚ ਖੁੱਲ੍ਹ ਕੇ ਗੱਲ ਕੀਤੀ ਸੀ।

ਧਰਮਿੰਦਰ ਹਿੰਦੀ ਸਿਨੇਮਾ ਦੇ ਮਹਾਨ ਅਦਾਕਾਰਾਂ ਵਿੱਚੋਂ ਇੱਕ ਸਨ। ਉਨ੍ਹਾਂ ਦਾ ਸਟਾਰਡਮ ਬਹੁਤ ਵੱਡਾ ਸੀ, ਜਿਸ ਦੀ ਧਾਕ ਪੂਰੀ ਦੁਨੀਆ ਵਿੱਚ ਬਣੀ ਹੋਈ ਸੀ। ਬਾਲੀਵੁੱਡ ਦੇ ਸੁਪਰਸਟਾਰ ਹੋਣ ਦੇ ਬਾਵਜੂਦ, ਧਰਮਿੰਦਰ ਆਪਣੇ ਆਪ ਨੂੰ ਇੰਡਸਟਰੀ ਵਿੱਚ ਕਦੇ ਵੀ ਨੰਬਰ-1 ਨਹੀਂ ਮੰਨਦੇ ਸਨ। ਇਸ ਨੂੰ ਲੈ ਕੇ ਉਨ੍ਹਾਂ ਨੇ 1986 ਵਿੱਚ ‘ਟਾਈਮਜ਼ ਆਫ਼ ਇੰਡੀਆ’ ਨੂੰ ਦਿੱਤੇ ਇੱਕ ਇੰਟਰਵਿਊ ਵਿੱਚ ਖੁੱਲ੍ਹ ਕੇ ਗੱਲ ਕੀਤੀ ਸੀ। ਉਸ ਸਮੇਂ ਧਰਮਿੰਦਰ ਦਾ ਅਦਾਕਾਰੀ ਕੈਰੀਅਰ 2 ਦਹਾਕਿਆਂ ਤੋਂ ਵੱਧ ਲੰਬਾ ਸਫ਼ਰ ਤੈਅ ਕਰ ਚੁੱਕਾ ਸੀ ਅਤੇ ਉਨ੍ਹਾਂ ਨੇ ‘ਯਾਦੋਂ ਕੀ ਬਾਰਾਤ’, ‘ਸ਼ੋਲੇ’ ਅਤੇ ‘ਧਰਮ-ਵੀਰ’ ਵਰਗੀਆਂ ਕਈ ਸੁਪਰਹਿੱਟ ਫ਼ਿਲਮਾਂ ਰਾਹੀਂ ਆਪਣੀ ਛਾਪ ਛੱਡੀ ਸੀ।

ਮੀਡੀਆ ਇੰਟਰਵਿਊ ਵਿੱਚ ਧਰਮਿੰਦਰ ਤੋਂ ਨੰਬਰ-1 ਹੋਣ ਬਾਰੇ ਸਵਾਲ ਪੁੱਛਿਆ ਗਿਆ, ਜਿਸ ‘ਤੇ ਅਦਾਕਾਰ ਨੇ ਖੁੱਲ੍ਹ ਕੇ ਜਵਾਬ ਦਿੱਤਾ ਅਤੇ ਕਿਹਾ: “ਲੋਕਾਂ ਦੀ ਤਰਫੋਂ ਮੈਨੂੰ ਬੇਸ਼ੁਮਾਰ ਪਿਆਰ ਮਿਲਿਆ, ਹਾਲਾਂਕਿ, ਮੈਂ ਕਦੇ ਨੰਬਰ-1 ਨਹੀਂ ਬਣ ਸਕਿਆ। ਇਸ ਦੇ ਪਿੱਛੇ ਦਾ ਕਾਰਨ ਇਹ ਹੈ ਕਿ ਮੈਂ ਅਦਾਕਾਰੀ ਨੂੰ ਕਦੇ ਪੇਸ਼ਾ ਨਹੀਂ ਮੰਨਿਆ, ਸਗੋਂ ਇਸ ਨੂੰ ਸੁਪਨੇ ਦੇ ਸੱਚ ਹੋਣ ਵਾਂਗ ਦੇਖਿਆ। ਇੱਕ ਸੁਪਰਸਟਾਰ ਬਣਨ ਲਈ ਤੁਹਾਨੂੰ ਬਹੁਤ ਮਹੱਤਵਪੂਰਨ ਹੋਣਾ ਪੈਂਦਾ ਹੈ, ਜੋ ਸ਼ਾਇਦ ਮੈਂ ਕਦੇ ਨਹੀਂ ਰਿਹਾ।” ਇਸ ਤੋਂ ਇਲਾਵਾ ਧਰਮਿੰਦਰ ਨੇ ਇਹ ਵੀ ਦੱਸਿਆ ਸੀ ਕਿ ਉਹ ਸਕੂਲ ਟਾਈਮ ਵਿੱਚ ਟੌਪਰ ਹੋਇਆ ਕਰਦੇ ਸਨ ਅਤੇ ਉਨ੍ਹਾਂ ਨੇ ਪੜ੍ਹਾਈ ਛੱਡ ਕੇ ਅਦਾਕਾਰੀ ਵਿੱਚ ਕੈਰੀਅਰ ਬਣਾਉਣਾ ਉਚਿੱਤ ਸਮਝਿਆ ਸੀ।

ਧਰਮਿੰਦਰ ਨੇ ਬੇਸ਼ੱਕ ਕਦੇ ਖ਼ੁਦ ਨੂੰ ਨੰਬਰ-1 ਨਹੀਂ ਮੰਨਿਆ, ਪਰ ਉਨ੍ਹਾਂ ਦਾ ਸੁਨਹਿਰੀ ਅਦਾਕਾਰੀ ਕੈਰੀਅਰ ਉਨ੍ਹਾਂ ਦੇ ਸੁਪਰਸਟਾਰ ਹੋਣ ਦੀ ਗਵਾਹੀ ਚੀਕ-ਚੀਕ ਕੇ ਦਿੰਦਾ ਹੈ। 1960 ਤੋਂ ਲੈ ਕੇ 2025 ਤੱਕ ਉਹ 300 ਤੋਂ ਵੱਧ ਫ਼ਿਲਮਾਂ ਵਿੱਚ ਨਜ਼ਰ ਆਏ। ਇਸ ਦੌਰਾਨ ਉਨ੍ਹਾਂ ਨੇ ਕਈ ਸੁਪਰਹਿੱਟ ਫ਼ਿਲਮਾਂ ਰਾਹੀਂ ਦਰਸ਼ਕਾਂ ਦਾ ਭਰਪੂਰ ਮਨੋਰੰਜਨ ਕੀਤਾ ਸੀ।

ਪਿੰਡਾਂ ਵਿੱਚ ਵਸੀਆਂ ਧਰਮਿੰਦਰ ਦੀਆਂ ਯਾਦਾਂ

ਧਰਮਿੰਦਰ ਦੇ ਪਿਤਾ ਕੇਵਲ ਕ੍ਰਿਸ਼ਨ ਦਿਓਲ ਇੱਕ ਅਧਿਆਪਕ ਸਨ ਅਤੇ ਉਨ੍ਹਾਂ ਦੀ ਮਾਂ ਸਤਵੰਤ ਕੌਰ ਇੱਕ ਘਰੇਲੂ ਔਰਤ ਸੀ। ਧਰਮਿੰਦਰ ਨੇ ਆਪਣੇ ਸ਼ੁਰੂਆਤੀ ਸਾਲ ਡਾਂਗੋ ਅਤੇ ਸਾਹਨੇਵਾਲ ਵਿੱਚ ਬਿਤਾਏ। ਕੇਵਲ ਕ੍ਰਿਸ਼ਨ ਦਿਓਲ ਦਾ ਨੌਕਰੀ ਦੌਰਾਨ ਉਨ੍ਹਾਂ ਦਾ ਤਬਾਦਲਾ ਪੰਜਾਬ ਵਿੱਚ ਜਿੱਥੇ ਵੀ ਹੋਇਆ, ਉਨ੍ਹਾਂ ਸਾਰੇ ਸ਼ਹਿਰਾਂ, ਕਸਬਿਆਂ ਅਤੇ ਪਿੰਡਾਂ ਵਿੱਚ ਧਰਮਿੰਦਰ ਦੀਆਂ ਯਾਦਾਂ ਵਸੀਆਂ ਹੋਈਆਂ ਹਨ ਅਤੇ ਉਨ੍ਹਾਂ ਦੀਆਂ ਇਨ੍ਹਾਂ ਵਿਰਾਸਤੀ ਥਾਵਾਂ ਨੂੰ ਲੋਕਾਂ ਨੇ ਸੰਭਾਲ ਕੇ ਰੱਖਿਆ ਹੈ। ਅਜਿਹਾ ਹੀ ਇੱਕ ਸ਼ਹਿਰ ਹੈ ਰਾਏਕੋਟ। ਰਾਏਕੋਟ ਵਿੱਚ ਵੀ ਕੇਵਲ ਕ੍ਰਿਸ਼ਨ ਦਿਓਲ ਕੁੱਝ ਸਾਲ ਰਹੇ ਅਤੇ ਛੋਟੇ ਧਰਮ (ਧਰਮਿੰਦਰ) ਦੀਆਂ ਯਾਦਾਂ ਅੱਜ ਵੀ ਬਜ਼ੁਰਗਾਂ ਦੇ ਦਿਲਾਂ-ਦਿਮਾਗ਼ ਵਿੱਚ ਵਸੀਆਂ ਹਨ।

ਇੱਕ ਮੀਡੀਆ ਰਿਪੋਰਟ ਦੇ ਮੁਤਾਬਿਕ, ਰਾਏਕੋਟ ਵਿੱਚ ਦਿਓਲ ਪਰਿਵਾਰ ਦਾ ਇੱਕ ਮਕਾਨ ਸੀ, ਜਿਸ ਨੂੰ ਉਨ੍ਹਾਂ ਨੇ 1959 ਵਿੱਚ ਪੰਜ ਹਜ਼ਾਰ ਰੁਪਏ ਵਿੱਚ ਰਾਏਕੋਟ ਦੇ ਇੱਕ ਪ੍ਰਸਿੱਧ ਵਪਾਰੀ ਨੂੰ ਵੇਚ ਦਿੱਤਾ ਸੀ। ਅਗਰਵਾਲ ਪਰਿਵਾਰ ਨੇ ਧਰਮ ਜੀ ਦੀ ਇਸ ਇਤਿਹਾਸਿਕ ਵਿਰਾਸਤ (ਘਰ) ਨੂੰ ਅੱਜ ਤੱਕ ਸੰਭਾਲ ਕੇ ਰੱਖਿਆ ਹੈ। ਭਾਵੇਂ ਉਨ੍ਹਾਂ ਨੇ ਆਪਣਾ ਵੱਖਰਾ ਬੰਗਲਾ ਬਣਾ ਲਿਆ ਹੈ, ਪਰ ਇਸ ਘਰ ਨਾਲ ਅਗਰਵਾਲ ਪਰਿਵਾਰ ਦਾ ਦਿਲੋਂ ਲਗਾਓ ਬਣਿਆ ਹੋਇਆ ਹੈ ਅਤੇ ਉਹ ਘਰ ਨੂੰ ਸਜਾ-ਸੰਵਾਰ ਕੇ ਰੱਖਦੇ ਹਨ। ਭਾਵੇਂ ਉਨ੍ਹਾਂ ਦਾ ਰਾਏਕੋਟ ਵਿੱਚ ਹੁਣ ਵੱਡਾ ਬੰਗਲਾ ਹੈ, ਪਰ ਉਹ ਧਰਮਿੰਦਰ ਦੇ ਜੱਦੀ ਘਰ ਨੂੰ ਕਦੇ ਵੀ ਆਪਣੇ ਤੋਂ ਦੂਰ ਨਹੀਂ ਕਰ ਸਕੇ। ਉਨ੍ਹਾਂ ਅਨੁਸਾਰ, ਇਹ ਘਰ ਉਨ੍ਹਾਂ ਦੇ ਪਰਿਵਾਰ ਦੇ ਮਾਣ ਅਤੇ ਭਾਵਨਾਵਾਂ ਦਾ ਪ੍ਰਤੀਕ ਹੈ।

ਕੇਵਲ ਕੁਮਾਰ ਅਗਰਵਾਲ ਨੇ ਦੱਸਿਆ ਕਿ ਉਨ੍ਹਾਂ ਦੇ ਪਿਤਾ ਨੇ ਧਰਮਿੰਦਰ ਦੇ ਪਿਤਾ ਕੇਵਲ ਕ੍ਰਿਸ਼ਨ ਦਿਓਲ ਤੋਂ 22 ਜੁਲਾਈ 1959 ਨੂੰ ਇਹ ਮਕਾਨ ਖ਼ਰੀਦਿਆਂ ਸੀ। ਉਸ ਸਮੇਂ ਇਸਦੀ ਕੀਮਤ ਸਿਰਫ਼ ₹5,000 ਸੀ ਅਤੇ ਘਰ ਦੀ ਰਜਿਸਟਰੀ ਰਾਏਕੋਟ ਤਹਿਸੀਲ ਵਿੱਚ ₹150 ਦੇ ਸਟੈਂਪ ਪੇਪਰ ‘ਤੇ ਉਰਦੂ ਭਾਸ਼ਾ ਵਿੱਚ ਹੋਈ ਸੀ। ਇਹ ਘਰ ਰਾਏਕੋਟ ਦੇ ਕੁਤਬਾ ਗੇਟ ਦੇ ਨੇੜੇ ਪਾਸ਼ ਮੁਹੱਲਾ ਸਦਾਵਰਤੀਆ ਵਿੱਚ ਸਥਿਤ ਹੈ, ਜਿੱਥੇ ਧਰਮ ਪਾਜੀ ਨੇ ਆਪਣੇ ਬਚਪਨ ਦੇ ਕਈ ਸਾਲ ਬਿਤਾਏ ਸਨ। ਇਸੇ ਘਰ ਵਿੱਚ ਰਹਿ ਕੇ ਧਰਮਿੰਦਰ ਨੇ ਕੁੱਝ ਸਮਾਂ ਪੜ੍ਹਾਈ ਕੀਤੀ।

ਕੇਵਲ ਅਗਰਵਾਲ ਨੇ ਕਿਹਾ ਕਿ ਧਰਮਿੰਦਰ ਦੇ ਇਸ ਪੁਰਾਣੇ ਘਰ ਨੂੰ ਦੇਖ ਕੇ ਉਨ੍ਹਾਂ ਨੂੰ ਬਹੁਤ ਖ਼ੁਸ਼ੀ ਮਿਲਦੀ ਹੈ। ਉਨ੍ਹਾਂ ਨੇ ਇਸ ਘਰ ਨੂੰ ਅੱਜ ਵੀ ਉਸੇ ਰੂਪ ਵਿੱਚ ਸੰਭਾਲ ਕੇ ਰੱਖਿਆ ਹੋਇਆ ਹੈ, ਜਿਵੇਂ ਦਹਾਕਿਆਂ ਪਹਿਲਾਂ ਸੀ। ਧਰਮਿੰਦਰ ਦੇ ਜੱਦੀ ਮਕਾਨ ਦੇ ਇਤਿਹਾਸਿਕ ਮਹੱਤਵ ਨੂੰ ਦੇਖਦੇ ਹੋਏ ਇਸ ਨੂੰ ਵਿਰਾਸਤ ਦੇ ਰੂਪ ਵਿੱਚ ਸੁਰੱਖਿਅਤ ਰੱਖਿਆ ਗਿਆ ਹੈ। ਮਕਾਨ ਅੱਜ ਵੀ ਮਜ਼ਬੂਤੀ ਨਾਲ ਖੜ੍ਹਾ ਹੈ। ਮਕਾਨ ਦਾ ਬਿਜਲੀ ਮੀਟਰ ਅੱਜ ਵੀ ਧਰਮਿੰਦਰ ਦੇ ਪਿਤਾ ਕੇਵਲ ਕ੍ਰਿਸ਼ਨ ਦਿਓਲ ਦੇ ਨਾਮ ‘ਤੇ ਹੀ ਹੈ। ਉਨ੍ਹਾਂ ਨੇ ਕਦੇ ਇਸ ਮੀਟਰ ਨੂੰ ਆਪਣੇ ਨਾਮ ‘ਤੇ ਬਦਲਵਾਉਣ ਦੀ ਨਹੀਂ ਸੋਚੀ।

300 ਤੋਂ ਵੱਧ ਫ਼ਿਲਮਾਂ ਵਿੱਚ ਕੀਤਾ ਕੰਮ

ਹਿੰਦੀ ਸਿਨਮਾ ਦੇ ਹੀਮੈਨ ਕਹੇ ਜਾਣ ਵਾਲੇ ਅਦਾਕਾਰ ਧਰਮਿੰਦਰ ਨੇ ਆਪਣੇ ਕੈਰੀਅਰ ਵਿੱਚ ਇੱਕ ਤੋਂ ਵੱਧ ਕੇ ਇੱਕ ਫ਼ਿਲਮਾਂ ਵਿੱਚ ਅਦਾਕਾਰੀ ਕੀਤੀ ਸੀ, ਜਿਸ ਨਾਲ ਉਨ੍ਹਾਂ ਨੇ ਕਰੋੜਾਂ ਦਾ ਸਾਮਰਾਜ ਖੜ੍ਹਾ ਕੀਤਾ। ਧਰਮਿੰਦਰ ਨੇ 300 ਤੋਂ ਵੱਧ ਫ਼ਿਲਮਾਂ ਵਿੱਚ ਕੰਮ ਕੀਤਾ। ਉਨ੍ਹਾਂ ਦੇ ਪਰਿਵਾਰ ਵਿੱਚ ਦੋ ਪਤਨੀਆਂ, 6 ਬੱਚੇ, ਦੋਹਤੇ-ਦੋਹਤੀਆਂ ਅਤੇ ਪੋਤੇ-ਪੋਤੀਆਂ ਹਨ।

ਨਿੱਜੀ ਜ਼ਿੰਦਗੀ ਅਤੇ ਦੋਵੇਂ ਪਤਨੀਆਂ ਨਾਲ ਦੁਰਲੱਭ ਤਸਵੀਰ

ਬਾਲੀਵੁੱਡ ਦੇ ਧਨੰਦਰ ਅਦਾਕਾਰ ਧਰਮਿੰਦਰ ਆਪਣੀ ਨਿੱਜੀ ਜ਼ਿੰਦਗੀ ਨੂੰ ਲੈ ਕੇ ਹਮੇਸ਼ਾ ਚਰਚਾ ਵਿੱਚ ਰਹੇ। ਉਨ੍ਹਾਂ ਨੇ ਦੋ ਵਿਆਹ ਕੀਤੇ: ਪਹਿਲਾ ਵਿਆਹ ਸਾਲ 1954 ਵਿੱਚ ਸਿਰਫ਼ 19 ਸਾਲ ਦੀ ਉਮਰ ਵਿੱਚ ਪ੍ਰਕਾਸ਼ ਕੌਰ ਨਾਲ ਅਤੇ ਦੂਜਾ ਵਿਆਹ ਸਾਲ 1980 ਵਿੱਚ 45 ਸਾਲ ਦੀ ਉਮਰ ਵਿੱਚ ਹੇਮਾ ਮਾਲਿਨੀ ਨਾਲ। ਦੂਜੇ ਵਿਆਹ ਸਮੇਂ ਪਹਿਲੀ ਪਤਨੀ ਤੋਂ ਤਲਾਕ ਨਹੀਂ ਹੋਇਆ ਸੀ, ਜਿਸ ਕਾਰਨ ਉਸ ਸਮੇਂ ਕਾਫ਼ੀ ਵਿਵਾਦ ਵੀ ਹੋਇਆ ਸੀ।

ਆਮ ਤੌਰ ‘ਤੇ ਪ੍ਰਕਾਸ਼ ਕੌਰ ਅਤੇ ਹੇਮਾ ਮਾਲਿਨੀ ਨੂੰ ਕਦੇ ਵੀ ਇਕੱਠੇ ਜਨਤਕ ਤੌਰ ‘ਤੇ ਨਹੀਂ ਦੇਖਿਆ ਗਿਆ। ਦੋਵਾਂ ਵਿਚਾਲੇ ਮੁਲਾਕਾਤ ਦੀ ਕੋਈ ਖ਼ਬਰ ਵੀ ਸਾਹਮਣੇ ਨਹੀਂ ਆਈ। ਪਰ ਸੋਸ਼ਲ ਮੀਡੀਆ ‘ਤੇ ਇੱਕ ਪੁਰਾਣੀ ਅਤੇ ਬਹੁਤ ਹੀ ਦੁਰਲੱਭ ਤਸਵੀਰ ਜਿਸ ਵਿੱਚ ਧਰਮਿੰਦਰ ਆਪਣੀਆਂ ਦੋਵਾਂ ਪਤਨੀਆਂ—ਪ੍ਰਕਾਸ਼ ਕੌਰ ਅਤੇ ਹੇਮਾ ਮਾਲਿਨੀ—ਦੇ ਨਾਲ ਇੱਕੋ ਫਰੇਮ ਵਿੱਚ ਨਜ਼ਰ ਆ ਰਹੇ ਹਨ।

ਇਸ ਗਰੁੱਪ ਫ਼ੋਟੋ ਵਿੱਚ ਪ੍ਰਕਾਸ਼ ਕੌਰ ਅਤੇ ਹੇਮਾ ਮਾਲਿਨੀ ਇੱਕ-ਦੂਜੇ ਦੇ ਨਾਲ ਖੜ੍ਹੀਆਂ ਹਨ ਅਤੇ ਦੋਵਾਂ ਨੇ ਸਾੜ੍ਹੀ ਪਹਿਨੀ ਹੋਈ ਹੈ, ਜਦੋਂ ਕਿ ਧਰਮਿੰਦਰ ਫਾਰਮਲ ਸੂਟ ਵਿੱਚ ਇੱਕ ਪਾਸੇ ਖੜ੍ਹੇ ਦਿਖਾਈ ਦੇ ਰਹੇ ਹਨ। ਫ਼ੋਟੋ ਵਿੱਚ ਕੁੱਝ ਹੋਰ ਲੋਕ ਵੀ ਮੌਜੂਦ ਹਨ। ਇਹ ਤਸਵੀਰ ਪਹਿਲੀ ਅਤੇ ਸ਼ਾਇਦ ਆਖ਼ਰੀ ਵਾਰ ਹੈ ਜਦੋਂ ਦੋਵੇਂ ਪਤਨੀਆਂ ਧਰਮਿੰਦਰ ਦੇ ਨਾਲ ਇੱਕੋ ਸਮੇਂ ਕੈਮਰੇ ਦੇ ਸਾਹਮਣੇ ਆਈਆਂ।