ਉਮਰ ਸਿਰਫ਼ ਇੱਕ ਅੰਕੜਾ ਹੈ ਅਤੇ ਜੇਕਰ ਦਿਲ ਵਿੱਚ ਕਿਸੇ ਸੁਪਨੇ ਨੂੰ ਪੂਰਾ ਕਰਨ ਦੀ ਤਾਂਘ ਹੋਵੇ ਤਾਂ ਸਾਲਾਂ ਬਾਅਦ ਵੀ ਉਸ ਵੱਲ ਵਾਪਸ ਮੁੜਿਆ ਜਾ ਸਕਦਾ ਹੈ। ਚੰਡੀਗੜ੍ਹ ਦੀ 67 ਸਾਲਾ ਸੁਮਨ ਬਾਂਸਲ ਨੇ ਇਹ ਗੱਲ ਆਪਣੇ ਜਜ਼ਬੇ ਨਾਲ ਸਾਬਤ ਕਰ ਦਿੱਤੀ ਹੈ। ਕਦੇ ਸਕੂਲ ਦੇ ਦਿਨਾਂ ਵਿੱਚ ਐੱਨਸੀਸੀ (NCC) ਰਾਹੀਂ ਸ਼ੂਟਿੰਗ ਨਾਲ ਜੁੜੀ ਸੁਮਨ ਨੇ ਪਰਿਵਾਰਕ ਜ਼ਿੰਮੇਵਾਰੀਆਂ ਕਾਰਨ ਇਸ ਸ਼ੌਕ ਨੂੰ ਦਹਾਕਿਆਂ ਤੱਕ ਪਿੱਛੇ ਛੱਡ ਦਿੱਤਾ ਸੀ। ਪਰ 65 ਸਾਲ ਦੀ ਉਮਰ ਵਿੱਚ ਉਨ੍ਹਾਂ ਨੇ ਮੁੜ ਸ਼ੂਟਿੰਗ ਰੇਂਜ ਦਾ ਰੁਖ਼ ਕੀਤਾ ਅਤੇ ਹੁਣ 67 ਸਾਲ ਦੀ ਉਮਰ ਵਿੱਚ 51ਵੀਂ ਚੰਡੀਗੜ੍ਹ ਸਟੇਟ ਸ਼ੂਟਿੰਗ ਚੈਂਪੀਅਨਸ਼ਿਪ ਵਿੱਚ ਚਾਰ ਤਮਗੇ ਜਿੱਤ ਕੇ ਸੁਰਖੀਆਂ ਬਟੋਰੀਆਂ ਹਨ।
ਸੁਮਨ ਬਾਂਸਲ ਨੇ ਚੈਂਪੀਅਨਸ਼ਿਪ ਵਿੱਚ ਦੋ ਸੋਨੇ, ਇੱਕ ਚਾਂਦੀ ਅਤੇ ਇੱਕ ਕਾਂਸੀ ਦਾ ਤਮਗਾ ਆਪਣੇ ਨਾਂ ਕੀਤਾ ਹੈ। ਉਨ੍ਹਾਂ ਦੀ ਇਹ ਉਪਲੱਬਧੀ ਇਸ ਲਈ ਵੀ ਖ਼ਾਸ ਹੈ ਕਿਉਂਕਿ ਉਨ੍ਹਾਂ ਨੇ ਮੁਕਾਬਲੇਬਾਜ਼ ਸ਼ੂਟਿੰਗ ਵਿੱਚ ਕਦਮ ਹੀ ਕਰੀਬ ਦੋ ਸਾਲ ਪਹਿਲਾਂ ਰੱਖਿਆ ਸੀ। ਐੱਨਸੀਸੀ ਕੈਂਪ ’ਚ ਜਾਗਿਆ ਸੀ ਸ਼ੂਟਿੰਗ ਦਾ ਸ਼ੌਕ ਸੁਮਨ ਦਾ ਸ਼ੂਟਿੰਗ ਨਾਲ ਰਿਸ਼ਤਾ ਅੱਜ ਤੋਂ ਦੋ ਸਾਲ ਪਹਿਲਾਂ ਨਹੀਂ, ਸਗੋਂ ਉਨ੍ਹਾਂ ਦੇ ਸਕੂਲ ਸਮੇਂ ਤੋਂ ਹੈ। ਐੱਨਸੀਸੀ ਕੈਂਪ ਦੌਰਾਨ ਉਨ੍ਹਾਂ ਨੂੰ ਪਹਿਲੀ ਵਾਰ ਸ਼ੂਟਿੰਗ ਦਾ ਮੌਕਾ ਮਿਲਿਆ ਸੀ। ਇਥੋਂ ਹੀ ਉਨ੍ਹਾਂ ਦੇ ਮਨ ਵਿੱਚ ਸ਼ੂਟਰ ਬਣਨ ਦਾ ਸੁਪਨਾ ਜਾਗਿਆ।
ਉਹ ਐੱਨਸੀਸੀ ਨਾਲ ਕਾਲਜ ਤੱਕ ਜੁੜੇ ਰਹੇ ਅਤੇ ਸ਼ੂਟਿੰਗ ਕਰਦੇ ਰਹੇ, ਪਰ ਬੀ.ਏ. ਦੇ ਦੂਜੇ ਸਾਲ ਵਿੱਚ ਉਨ੍ਹਾਂ ਦਾ ਵਿਆਹ ਹੋ ਗਿਆ। ਇਸ ਤੋਂ ਬਾਅਦ ਜ਼ਿੰਦਗੀ ਦੀ ਦਿਸ਼ਾ ਬਦਲ ਗਈ। ਉਨ੍ਹਾਂ ਦੇ ਪਤੀ ਡਾ. ਸੁਰਿੰਦਰ ਬਾਂਸਲ, ਜੋ ਪੰਜਾਬ ਹੈਲਥ ਸਿਸਟਮਜ਼ ਕਾਰਪੋਰੇਸ਼ਨ ਦੇ ਸੇਵਾਮੁਕਤ ਡਾਇਰੈਕਟਰ ਹਨ, ਦੀ ਨੌਕਰੀ ਤਬਾਦਲੇ ਵਾਲੀ ਸੀ। ਪਰਿਵਾਰ ਦੀਆਂ ਜ਼ਿੰਮੇਵਾਰੀਆਂ ਅਤੇ ਤਿੰਨ ਬੱਚਿਆਂ ਦੀ ਪਰਵਰਿਸ਼ ਵਿੱਚ ਸੁਮਨ ਨੇ ਆਪਣਾ ਜ਼ਿਆਦਾਤਰ ਸਮਾਂ ਲਗਾ ਦਿੱਤਾ, ਜਿਸ ਕਾਰਨ ਸ਼ੂਟਿੰਗ ਦਾ ਸੁਪਨਾ ਪਿੱਛੇ ਰਹਿ ਗਿਆ।
65 ਸਾਲ ਦੀ ਉਮਰ ’ਚ ਮੁੜ ਸ਼ੁਰੂ ਕੀਤੀ ਸ਼ੂਟਿੰਗ ਬੱਚੇ ਵੱਡੇ ਹੋ ਗਏ ਅਤੇ ਘਰੇਲੂ ਜ਼ਿੰਮੇਵਾਰੀਆਂ ਵੀ ਪਹਿਲਾਂ ਨਾਲੋਂ ਘੱਟ ਹੋਈਆਂ ਤਾਂ ਸੁਮਨ ਨੇ ਇੱਕ ਵਾਰ ਫਿਰ ਆਪਣੇ ਪੁਰਾਣੇ ਸੁਪਨੇ ਬਾਰੇ ਸੋਚਿਆ। ਕਰੀਬ ਦੋ ਸਾਲ ਪਹਿਲਾਂ ਉਨ੍ਹਾਂ ਨੇ ਆਪਣੇ ਪਤੀ ਨਾਲ ਸ਼ੂਟਿੰਗ ਮੁੜ ਸ਼ੁਰੂ ਕਰਨ ਦੀ ਇੱਛਾ ਸਾਂਝੀ ਕੀਤੀ। ਪਤੀ ਨੇ ਨਾ ਸਿਰਫ਼ ਉਨ੍ਹਾਂ ਦਾ ਹੌਸਲਾ ਵਧਾਇਆ, ਸਗੋਂ ਖ਼ੁਦ ਸ਼ੂਟਿੰਗ ਰੇਂਜ ਬਾਰੇ ਜਾਣਕਾਰੀ ਹਾਸਲ ਕੀਤੀ ਅਤੇ ਦਾਖ਼ਲੇ ਦੀ ਪ੍ਰਕਿਰਿਆ ਵਿੱਚ ਮਦਦ ਕੀਤੀ। ਇਸ ਤੋਂ ਬਾਅਦ ਸੁਮਨ ਨੇ ਚੰਡੀਗੜ੍ਹ ਦੇ ਸੈਕਟਰ-25 ਸਥਿਤ ਸ਼ੂਟਿੰਗ ਰੇਂਜ ਵਿੱਚ ਸਿਖਲਾਈ ਸ਼ੁਰੂ ਕੀਤੀ।
ਇਸ ਤੋਂ ਬਾਅਦ ਉਨ੍ਹਾਂ ਦੀ ਮਿਹਨਤ ਦਾ ਨਤੀਜਾ ਵੀ ਜਲਦ ਸਾਹਮਣੇ ਆਉਣ ਲੱਗਾ। ਸ਼ੂਟਿੰਗ ਦੇ ਮੁਕਾਬਲਿਆਂ ਵਿੱਚ ਪਹਿਲੇ ਹੀ ਸਾਲ ਉਨ੍ਹਾਂ ਨੇ ਸਟੇਟ ਅਤੇ ਨਾਰਥ ਜ਼ੋਨ ਪੱਧਰ ’ਤੇ 10 ਮੀਟਰ ਮੁਕਾਬਲੇ ਵਿੱਚ ਸੋਨੇ ਦੇ ਤਮਗੇ ਜਿੱਤੇ ਅਤੇ ਕੌਮੀ ਪੱਧਰ ਦੇ ਮੁਕਾਬਲੇ ਲਈ ਅਹੁੱਲਤਾ (ਕੁਆਲੀਫਾਈ) ਹਾਸਲ ਕੀਤੀ। ਦਸੰਬਰ ਵਿੱਚ ਹੋਈ ਕੌਮੀ ਚੈਂਪੀਅਨਸ਼ਿਪ ਵਿੱਚ ਉਨ੍ਹਾਂ ਨੇ ਚੌਥਾ ਸਥਾਨ ਹਾਸਲ ਕੀਤਾ। ਇਸ ਤੋਂ ਬਾਅਦ ਕੁਮਾਰ ਸੁਰਿੰਦਰ ਸਿੰਘ ਮੈਮੋਰੀਅਲ ਸ਼ੂਟਿੰਗ ਚੈਂਪੀਅਨਸ਼ਿਪ ਵਿੱਚ 10 ਮੀਟਰ ਪਿਸਟਲ ਸੀਨੀਅਰ ਮਾਸਟਰ ਮਹਿਲਾ ਵਰਗ ਵਿੱਚ ਚਾਂਦੀ ਦਾ ਤਮਗਾ ਵੀ ਜਿੱਤਿਆ।
ਹੁਣ ਸ਼ੂਟਿੰਗ ਦੇ ਨਾਲ ਸੰਗੀਤ ਵੀ ਸਿੱਖ ਰਹੇ ਹਨ ਸੁਮਨ ਬਾਂਸਲ ਦੀ ਜ਼ਿੰਦਗੀ ਵਿੱਚ 65 ਸਾਲ ਦੀ ਉਮਰ ਤੋਂ ਬਾਅਦ ਸਿਰਫ਼ ਸ਼ੂਟਿੰਗ ਹੀ ਵਾਪਸ ਨਹੀਂ ਆਈ, ਸਗੋਂ ਉਹ ਇਸ ਵੇਲੇ ਪੰਜਾਬ ਯੂਨੀਵਰਸਿਟੀ, ਚੰਡੀਗੜ੍ਹ ਤੋਂ ‘ਇੰਸਟਰੂਮੈਂਟਲ ਮਿਊਜ਼ਿਕ’ ਵਿੱਚ ਇੱਕ ਸਾਲ ਦਾ ਡਿਪਲੋਮਾ ਵੀ ਕਰ ਰਹੇ ਹਨ। ਜਿਸ ਉਮਰ ਵਿੱਚ ਆਮ ਤੌਰ ’ਤੇ ਲੋਕ ਆਪਣੇ ਕੰਮਕਾਜ ਤੋਂ ਹੌਲੀ-ਹੌਲੀ ਪਿੱਛੇ ਹਟਣ ਬਾਰੇ ਸੋਚਦੇ ਹਨ, ਉਸ ਉਮਰ ਵਿੱਚ ਸੁਮਨ ਨਵੀਆਂ ਚੀਜ਼ਾਂ ਸਿੱਖ ਰਹੇ ਹਨ, ਸ਼ੂਟਿੰਗ ਦੀ ਪ੍ਰੈਕਟਿਸ ਕਰ ਰਹੇ ਹਨ ਅਤੇ ਮੁਕਾਬਲਿਆਂ ਵਿੱਚ ਹਿੱਸਾ ਲੈ ਰਹੇ ਹਨ। ਪਰਿਵਾਰ ਅਤੇ ਦੋਸਤਾਂ ਲਈ ਵੀ ਉਨ੍ਹਾਂ ਦੀ ਇਹ ਨਵੀਂ ਪਾਰੀ ਹੈਰਾਨੀ ਅਤੇ ਖ਼ੁਸ਼ੀ ਦਾ ਕਾਰਨ ਹੈ। ਪਰਿਵਾਰਕ ਮਿੱਤਰ ਨੀਰਜਾ ਗੁਪਤਾ ਮੁਤਾਬਕ ਸੁਮਨ ਨੇ ਆਪਣੀ ਜ਼ਿੰਦਗੀ ਦਾ ਲੰਮਾ ਸਮਾਂ ਪਰਿਵਾਰ ਲਈ ਸਮਰਪਿਤ ਕੀਤਾ ਅਤੇ ਹੁਣ ਉਹ ਆਪਣੇ ਲਈ ਸਮਾਂ ਕੱਢ ਰਹੇ ਹਨ।
‘ਸ਼ੂਟਰ ਦਾਦੀ’ ਦੇ ਨਾਂ ਨਾਲ ਜਾਣੀ ਜਾਣ ਲੱਗੀ ਸੁਮਨ ਬਾਂਸਲ ਲਈ ਇਹ ਚਾਰ ਤਮਗੇ ਸਿਰਫ਼ ਖੇਡ ਪ੍ਰਾਪਤੀ ਨਹੀਂ ਹਨ, ਸਗੋਂ ਇਹ ਉਸ ਸੁਪਨੇ ਦੀ ਵਾਪਸੀ ਹਨ, ਜਿਸ ਨੂੰ ਉਨ੍ਹਾਂ ਨੇ ਸਕੂਲ ਦੇ ਦਿਨਾਂ ਵਿੱਚ ਦੇਖਿਆ ਸੀ ਪਰ ਪਰਿਵਾਰਕ ਜ਼ਿੰਮੇਵਾਰੀਆਂ ਕਾਰਨ ਲਗਭਗ ਪੰਜ ਦਹਾਕਿਆਂ ਲਈ ਪਿੱਛੇ ਛੱਡਣਾ ਪਿਆ ਸੀ। 65 ਸਾਲ ਦੀ ਉਮਰ ਵਿੱਚ ਉਨ੍ਹਾਂ ਨੇ ਮੁੜ ਨਿਸ਼ਾਨਾ ਸਾਧਿਆ ਸੀ, 67 ਸਾਲ ਦੀ ਉਮਰ ਵਿੱਚ ਉਹ ਪੋਡੀਅਮ ’ਤੇ ਖੜ੍ਹੇ ਹਨ ਅਤੇ ਹੁਣ ਉਨ੍ਹਾਂ ਦਾ ਨਿਸ਼ਾਨਾ ਸਿਰਫ਼ ਤਮਗੇ ਜਿੱਤਣਾ ਨਹੀਂ, ਸਗੋਂ ਇਹ ਸਾਬਤ ਕਰਨਾ ਵੀ ਹੈ ਕਿ ਆਪਣੇ ਸੁਪਨੇ ਪੂਰੇ ਕਰਨ ਦੀ ਕੋਈ ਉਮਰ ਨਹੀਂ ਹੁੰਦੀ।
Leave a Comment