ਗੁਰਿੰਦਰਵੀਰ ਸਿੰਘ ਦੀ ਰਫ਼ਤਾਰ ਨੇ ਸੈਕਿੰਡਾਂ ਵਿੱਚ ਲਿਖਿਆ ਨਵਾਂ ਇਤਿਹਾਸ

ਪੰਜਾਬ ਦੀ ਰਫ਼ਤਾਰ, ਦੇਸ਼ ਦਾ ਮਾਣ — ਗੁਰਿੰਦਰਵੀਰ ਸਿੰਘ

ਭਾਰਤੀ ਐਥਲੈਟਿਕਸ ਦੇ ਇਤਿਹਾਸ ਵਿੱਚ ਸ਼ਨੀਵਾਰ ਦਾ ਦਿਨ ਸੁਨਹਿਰੀ ਅੱਖਰਾਂ ਵਿੱਚ ਲਿਖਿਆ ਜਾਣ ਵਾਲਾ ਦਿਨ ਸਾਬਤ ਹੋਇਆ। ਰਾਂਚੀ ਵਿਖੇ ਖੇਡੀ ਜਾ ਰਹੀ ‘Federation Cup 2026’ ਦੌਰਾਨ ਪੰਜਾਬ ਦੇ ਸਟਾਰ ਦੌੜਾਕ ਗੁਰਿੰਦਰਵੀਰ ਸਿੰਘ ਨੇ ਪੁਰਸ਼ਾਂ ਦੇ 100 ਮੀਟਰ ਮੁਕਾਬਲੇ ਵਿੱਚ 10.10 ਸਕਿੰਟ ਦਾ ਸਮਾਂ ਤੋੜ ਕੇ ਇੱਕ ਨਵਾਂ ਰਾਸ਼ਟਰੀ ਰਿਕਾਰਡ ਬਣਾਇਆ ਹੈ। ਉਹ ਭਾਰਤ ਦੇ ਅਜਿਹੇ ਐਥਲੀਟ ਬਣ ਗਏ ਹਨ, ਜਿਨ੍ਹਾਂ ਨੇ ਇਹ ਇਤਿਹਾਸਕ ਸਫ਼ਲਤਾ ਹਾਸਲ ਕੀਤੀ ਹੈ।

ਬਿਰਸਾ ਮੁੰਡਾ ਸਟੇਡੀਅਮ ‘ਚ ਮਾਰੀ ਤੂਫ਼ਾਨੀ ਦੌੜ

ਰਿਲਾਇੰਸ ਫਾਊਂਡੇਸ਼ਨ ਦੀ ਨੁਮਾਇੰਦਗੀ ਕਰ ਰਹੇ 25 ਸਾਲਾ ਪੰਜਾਬੀ ਐਥਲੀਟ ਗੁਰਿੰਦਰਵੀਰ ਸਿੰਘ ਨੇ ਬਿਰਸਾ ਮੁੰਡਾ ਫੁੱਟਬਾਲ ਸਟੇਡੀਅਮ ਦੇ ਟਰੈਕ ‘ਤੇ ਸਿਰਫ਼ 10.09 ਸਕਿੰਟਾਂ ਦੇ ਸ਼ਾਨਦਾਰ ਸਮੇਂ ਚ ਸੋਨੇ ਦਾ ਤਗ਼ਮਾ ਆਪਣੇ ਨਾਮ ਕੀਤਾ। ਇਸ ਬਿਜਲੀ ਦੀ ਤੇਜ਼ ਦੌੜ ਨਾਲ, ਉਸ ਨੇ ਪਿਛਲੇ ਰਾਸ਼ਟਰੀ ਰਿਕਾਰਡ 10.18 ਸਕਿੰਟ ਨੂੰ ਤੋੜ ਦਿੱਤਾ। ਇਸ ਦੇ ਨਾਲ ਹੀ ਉਸਨੇ ਕਾਮਨਵੈਲਥ ਖੇਡਾਂ ਲਈ ਨਿਰਧਾਰਤ 10.16 ਸਕਿੰਟ ਦੇ ਕੁਆਲੀਫਿਕੇਸ਼ਨ ਮਾਰਕ ਨੂੰ ਵੀ ਆਸਾਨੀ ਨਾਲ ਹਾਸਲ ਕਰ ਲਿਆ ਹੈ।

ਦਰਅਸਲ, ਇਹ ਗੁਰਿੰਦਰਵੀਰ ਸਿੰਘ ਦਾ ਹੁਣ ਤੱਕ ਦਾ ਸਭ ਤੋਂ ਉੱਤਮ ਨਿਜੀ ਪ੍ਰਦਰਸ਼ਨ ਹੈ। ਇਸ ਸ਼ਾਨਦਾਰ ਸਮੇਂ ਕਾਰਨ, ਉਹ ਇਸ ਸੀਜ਼ਨ ਵਿੱਚ ਪੂਰੇ ਏਸ਼ੀਆ ਦੇ ਦੂਜੇ ਸਭ ਤੋਂ ਤੇਜ਼ ਦੌੜਾਕ ਬਣ ਗਏ ਹਨ। ਉਸ ਤੋਂ ਅੱਗੇ ਸਿਰਫ਼ ਜਾਪਾਨ ਦੇ 19 ਸਾਲਾ ਦੌੜਾਕ ਫੁਕੂਤੋ ਕੋਮੂਰੋ ਹਨ, ਜਿਸ ਨੇ ਮਈ ਮਹੀਨੇ ਵਿੱਚ 10.08 ਸਕਿੰਟ ਦਾ ਸਮਾਂ ਦਰਜ ਕੀਤਾ ਸੀ।

CM ਭਗਵੰਤ ਮਾਨ ਵੱਲੋਂ ਮੁਬਾਰਕਬਾਦ

ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਮਾਨ ਨੇ ਗੁਰਿੰਦਰਵੀਰ ਸਿੰਘ ਨੂੰ ਇਸ ਬੇਮਿਸਾਲ ਅਤੇ ਇਤਿਹਾਸਕ ਪ੍ਰਾਪਤੀ ‘ਤੇ ਵਧਾਈ ਦਿੱਤੀ। ਸੋਸ਼ਲ ਮੀਡੀਆ ਪਲੇਟਫਾਰਮ ‘X’ ‘ਤੇ ਇੱਕ ਪੋਸਟ ਸਾਂਝੀ ਕਰਦਿਆਂ ਉਨ੍ਹਾਂ ਨੇ ਲਿਖਿਆ ਕਿ ਇਹ ਪ੍ਰਾਪਤੀ ਪੰਜਾਬ ਅਤੇ ਪੂਰੇ ਦੇਸ਼ ਲਈ ਇੱਕ ਬਹੁਤ ਹੀ ਮਾਣ ਵਾਲਾ ਪਲ ਹੈ। ਉਨ੍ਹਾਂ ਨੇ ਅੱਗੇ ਕਿਹਾ ਕਿ ਪੂਰਾ ਪੰਜਾਬ ਗੁਰਿੰਦਰਵੀਰ ਦੀ ਇਤਿਹਾਸਕ ਪ੍ਰਾਪਤੀ ‘ਤੇ ਮਾਣ ਕਰਦਾ ਹੈ।

ਆਪਣੀ ਜਿੱਤ ਤੋਂ ਬਾਅਦ ਖੁਸ਼ੀ ਸਾਂਝੀ ਕਰਦਿਆਂ ਗੁਰਿੰਦਰਵੀਰ ਸਿੰਘ ਨੇ ਕਿਹਾ ਕਿ ਖੇਡ ਦੌਰਾਨ ਮਾਨਸਿਕ ਤਾਕਤ ਨੇ ਉਨ੍ਹਾਂ ਦਾ ਧਿਆਨ ਕੇਂਦਰਿਤ ਰੱਖਣ ਵਿੱਚ ਵੱਡੀ ਭੂਮਿਕਾ ਨਿਭਾਈ। ਉਨ੍ਹਾਂ ਨੇ ਆਪਣੀ ਇਸ ਸਫਲਤਾ ਦਾ ਸਿਹਰਾ ਆਪਣੇ ਪਰਿਵਾਰ, ਕੋਚਾਂ ਅਤੇ ਸਪੋਰਟ ਸਟਾਫ਼ ਦੇ ਅਣਥੱਕ ਸਹਿਯੋਗ ਨੂੰ ਦਿੱਤਾ। ਇਸ ਮੁਕਾਬਲੇ ਵਿੱਚ, ਓਡੀਸ਼ਾ ਦੇ ਅਨੀਮੇਸ਼ ਕੁਜੂਰ ਨੇ 10.20 ਸਕਿੰਟ ਨਾਲ ਚਾਂਦੀ ਅਤੇ ਪ੍ਰਣਵ ਪ੍ਰਮੋਦ ਨੇ 10.29 ਸਕਿੰਟ ਨਾਲ ਕਾਂਸੀ ਦਾ ਤਗ਼ਮਾ ਜਿੱਤਿਆ।

ਵਿਸ਼ਾਲ ਟੀਕੇ ਅਤੇ ਤੇਜਸਵਿਨ ਸ਼ੰਕਰ ਦੇ ਹੋਰ ਵੱਡੇ ਰਿਕਾਰਡ

ਇਸ ਦਿਨ ਦੋ ਹੋਰ ਵੱਡੇ ਰਾਸ਼ਟਰੀ ਰਿਕਾਰਡ ਵੀ ਟੁੱਟੇ, ਜਿਸ ਵਿੱਚ 22 ਸਾਲਾ ਤਾਮਿਲਨਾਡੂ ਦੇ ਅਥਲੀਟ ਵਿਸ਼ਾਲ ਟੀਕੇ ਨੇ ਪੁਰਸ਼ਾਂ ਦੀ 400 ਮੀਟਰ ਦੌੜ ਵਿੱਚ 44.98 ਸਕਿੰਟ ਸਮੇਂ ਨਾਲ ਸੋਨ ਤਗ਼ਮਾ ਜਿੱਤਿਆ। ਉਹ 45 ਸਕਿੰਟ ਦੀ ਰੁਕਾਵਟ ਨੂੰ ਤੋੜਨ ਵਾਲੇ ਪਹਿਲੇ ਭਾਰਤੀ ਐਥਲੀਟ ਬਣੇ, ਹਾਲਾਂਕਿ ਉਹ ਕਾਮਨਵੈਲਥ ਯੋਗਤਾ ਤੋਂ ਸਿਰਫ਼ 0.02 ਸਕਿੰਟ ਨਾਲ ਪਿੱਛੇ ਰਹਿ ਗਏ।

ਏਸ਼ੀਆਈ ਖੇਡਾਂ ਦੇ ਚਾਂਦੀ ਦਾ ਤਗ਼ਮਾ ਜੇਤੂ ਤੇਜਸਵਿਨ ਸ਼ੰਕਰ ਨੇ ਡੇਕਾਥਲਨ ਵਿੱਚ ਪਹਿਲੀ ਵਾਰ 8,000 ਅੰਕਾਂ ਦਾ ਅੰਕੜਾ ਪਾਰ ਕਰਕੇ ਆਪਣਾ ਹੀ ਰਾਸ਼ਟਰੀ ਰਿਕਾਰਡ ਤੋੜ ਦਿੱਤਾ। ਉਨ੍ਹਾਂ ਨੇ 7,787 ਅੰਕਾਂ ਦੇ ਕਾਮਨਵੈਲਥ ਯੋਗਤਾ ਮਾਰਕ ਨੂੰ ਪਾਰ ਕਰਕੇ ਏਸ਼ੀਆਈ ਆਲ-ਟਾਈਮ ਸੂਚੀ ਵਿੱਚ ਸੱਤਵਾਂ ਸਥਾਨ ਹਾਸਲ ਕੀਤਾ।

ਇਸ ਫੈਡਰੇਸ਼ਨ ਕੱਪ ਵਿੱਚ ਤਿੰਨ ਰਾਸ਼ਟਰੀ ਰਿਕਾਰਡ ਟੁੱਟੇ, ਜਿਨ੍ਹਾਂ ਵਿੱਚੋਂ ਦੋ ਸਿਰਫ਼ 30 ਮਿੰਟਾਂ ਦੇ ਅੰਦਰ ਟੁੱਟੇ ਗਏ, ਜੋ ਭਾਰਤੀ ਖੇਡਾਂ ਦੇ ਵਿਕਾਸ ਨੂੰ ਦਰਸਾਉਂਦਾ ਹੈ।