ਪੰਜਾਬ ਸਦਾ ਹੀ ਸੂਰਬੀਰਾਂ ਦੀ ਧਰਤੀ ਰਹੀ ਹੈ, ਜਿਥੇ ਸਿੱਖ ਕੌਮ ਨੇ ਹਮੇਸ਼ਾ ਆਪਣੇ ਗੁਰੂ ਦੇ ਸਤਿਕਾਰ ਲਈ ਵੱਡੀਆਂ ਕੁਰਬਾਨੀਆਂ ਦਿੱਤੀਆਂ ਹਨ। ਇਸੇ ਲੜੀ ਵਿੱਚ ਹੁਣ ਪਟਿਆਲਾ ਦੇ ਸਮਾਣਾ ਨਾਲ ਸੰਬੰਧਿਤ ਗੁਰਜੀਤ ਸਿੰਘ ਖ਼ਾਲਸਾ ਦਾ ਨਾਂ ਵੀ ਜੁੜ ਗਿਆ ਹੈ, ਜਿਨ੍ਹਾਂ ਨੇ ਗੁਰੂ ਗ੍ਰੰਥ ਸਾਹਿਬ ਜੀ ਦੇ ਸਤਿਕਾਰ ਦੀ ਬਹਾਲੀ ਲਈ “ਖ਼ਾਲਸਾ ਧਰਮ ਯੁੱਧ ਮੋਰਚਾ” ਰਾਹੀਂ ਇੱਕ ਅਦੁੱਤੀ ਸੰਘਰਸ਼ ਲੜਿਆ। ਹਾਲ ਹੀ ਵਿੱਚ, ‘ਸਾਡਾ ਪੰਜਾਬ’ ਦੀ ਟੀਮ ਨੇ ਗੁਰਜੀਤ ਸਿੰਘ ਨਾਲ ਖ਼ਾਸ ਗੱਲਬਾਤ ਕੀਤੀ, ਜਿਸ ਵਿੱਚ ਉਨ੍ਹਾਂ ਨੇ 18 ਮਹੀਨੇ ਅਤੇ 12 ਦਿਨਾਂ ਤੱਕ ਟਾਵਰ ‘ਤੇ ਰਹਿ ਕੇ ਲੜੇ ਗਏ ਇਸ ਇਤਿਹਾਸਕ ਮੋਰਚੇ ਦੇ ਆਪਣੇ ਅਨੁਭਵ ਸਾਂਝੇ ਕੀਤੇ।
ਹਿਰਦਾ ਬਲੂੰਦਰਿਆ ਜਾਣ ਤੋਂ ਸੰਘਰਸ਼ ਦਾ ਆਗਾਜ਼
ਗੁਰਜੀਤ ਸਿੰਘ ਦੱਸਦੇ ਹਨ ਕਿ ਪਿਛਲੇ ਲੰਮੇ ਸਮੇਂ ਤੋਂ ਗੁਰੂ ਗ੍ਰੰਥ ਸਾਹਿਬ ਜੀ ਦੀਆਂ ਹੋ ਰਹੀਆਂ ਬੇਅਦਬੀਆਂ ਨੇ ਸਿੱਖ ਮਾਨਸਿਕਤਾ ਨੂੰ ਗਹਿਰੀ ਸੱਟ ਮਾਰੀ ਸੀ। ਜਦੋਂ ਵੀ ਕਿਤੇ ਬੇਅਦਬੀ ਦੀ ਖ਼ਬਰ ਆਉਂਦੀ ਸੀ, ਤਾਂ ਹਿਰਦਾ ਵਲੂੰਧਰਿਆ ਜਾਂਦਾ ਸੀ। “ਕਰੋ ਜਾਂ ਮਰੋ” ਵਾਲੀ ਸਥਿਤੀ ਬਣ ਚੁੱਕੀ ਸੀ ਕਿਉਂਕਿ ਕੌਮ ਹੁਣ ਹੋਰ ਬੇਅਦਬੀਆਂ ਝੱਲਣ ਦੇ ਯੋਗ ਨਹੀਂ ਸੀ। ਅਜਿਹੇ ਸਮੇਂ ਗੁਰੂ ਸਾਹਿਬ ਨੇ ਖ਼ੁਦ ਰਸਤਾ ਦਿਖਾਇਆ। ਜ਼ਿਕਰਯੋਗ ਉਨ੍ਹਾਂ ਨੇ ਅੱਗੇ ਦੱਸਿਆ ਕਿ, ਗਰਾਊਂਡ ‘ਤੇ ਕੀਤੇ ਜਾਣ ਵਾਲੇ ਵਿਰੋਧ ਪ੍ਰਦਰਸ਼ਨ ਅਕਸਰ ਸਰਕਾਰਾਂ ਵੱਲੋਂ ਅਣਦੇਖੇ ਕਰ ਦਿੱਤੇ ਜਾਂਦੇ ਹਨ, ਇਸ ਲਈ ਉਨ੍ਹਾਂ ਨੇ ਆਵਾਜ਼ ਬੁਲੰਦ ਕਰਨ ਲਈ ਟਾਵਰ ‘ਤੇ ਚੜ੍ਹਨ ਦਾ ਫੈਸਲਾ ਕੀਤਾ।
18 ਮਹੀਨਿਆਂ ਦਾ ਕਠਿਨ ਤੱਪ
ਟਾਵਰ ‘ਤੇ 18 ਮਹੀਨੇ 12 ਦਿਨ ਗੁਜ਼ਾਰਨਾ ਕੋਈ ਮਾਮੂਲੀ ਗੱਲ ਨਹੀਂ ਸੀ। ਇੱਕ 2/6 ਦੇ ਛੋਟੇ ਜਿਹੇ ਫੱਟੇ ‘ਤੇ ਦਿਨ-ਰਾਤ ਕੱਟਣੇ ਸਰੀਰਕ ਤੌਰ ‘ਤੇ ਅਸੰਭਵ ਜਾਪਦੇ ਹਨ, ਪਰ ਗੁਰਜੀਤ ਸਿੰਘ ਲਈ ਇਹ ਗੁਰੂ ਦੀ ਗੋਦ ਵਰਗਾ ਅਹਿਸਾਸ ਸੀ। ਉਹ ਕਹਿੰਦੇ ਹਨ, “ਜਦੋਂ ਭਰੋਸਾ ਪੱਕਾ ਹੋਵੇ ਅਤੇ ਪਿਆਰ ਸੱਚਾ ਹੋਵੇ, ਤਾਂ ਨਾ ਕੋਈ ਪਰੇਸ਼ਾਨੀ ਆਉਂਦੀ ਹੈ ਅਤੇ ਨਾ ਹੀ ਕੋਈ ਦੁੱਖ।” ਉਨ੍ਹਾਂ ਨੇ ਮੌਸਮ ਦੀਆਂ ਮਾਰਾਂ ਅਤੇ ਸਰੀਰਕ ਤਕਲੀਫ਼ਾਂ ਨੂੰ ਹੱਸ ਕੇ ਜਰਿਆ, ਕਿਉਂਕਿ ਉਨ੍ਹਾਂ ਦਾ ਮਕਸਦ ਨਿਜੀ ਨਹੀਂ, ਸਗੋਂ ਕੌਮੀ ਸੀ।
ਇਤਿਹਾਸਕ ਮੰਗ ਅਤੇ ਮੋਰਚੇ ਦੀ ਸਫ਼ਲਤਾ
ਇਹ ਮੰਗ ਕੋਈ ਨਵੀਂ ਨਹੀਂ ਸੀ। ਸਾਲ 1982 ਵਿੱਚ ਸੰਤ ਜਰਨੈਲ ਸਿੰਘ ਜੀ ਖ਼ਾਲਸਾ ਭਿੰਡਰਾਂਵਾਲਿਆਂ ਨੇ ਅਨੰਦਪੁਰ ਸਾਹਿਬ ਦੇ ਮਤੇ ਵਿੱਚ ਬੇਅਦਬੀ ਰੋਕੂ ਸਖ਼ਤ ਕਾਨੂੰਨ ਦੀ ਮੰਗ ਰੱਖੀ ਸੀ। ਦਹਾਕਿਆਂ ਤੱਕ ਸਰਕਾਰਾਂ ਨੇ ਸਿੱਖ ਕੌਮ ਨੂੰ ਮੂਰਖ ਬਣਾਇਆ ਅਤੇ ਅਣਦੇਖਿਆ ਕੀਤਾ। ਪਰ ਇਸ ਵਾਰ, ਇਸ ਲੰਮੇ ਅਤੇ ਸਿਦਕੀ ਮੋਰਚੇ ਸਦਕਾ ਪੰਜਾਬ ਸਰਕਾਰ ਨੂੰ ਹਾਰ ਮੰਨਣੀ ਪਈ। ਸਰਕਾਰ ਨੇ ਬੇਅਦਬੀ ਰੋਕੂ ਕਾਨੂੰਨ ਬਣਾਉਣ ਦੀ ਮੰਗ ਪ੍ਰਵਾਨ ਕੀਤੀ, ਜਿਸ ਨਾਲ ਇਹ ਮੋਰਚਾ ਫ਼ਤਿਹ ਹੋਇਆ।
ਖ਼ਾਲਸਾ ਪੰਥ ਨੂੰ ਅਪੀਲ
ਆਪਣੀ ਜਿੱਤ ਤੋਂ ਬਾਅਦ, ਗੁਰਜੀਤ ਸਿੰਘ ਨੇ ਸਮੁੱਚੇ ਖ਼ਾਲਸਾ ਪੰਥ ਨੂੰ ਹੱਥ ਜੋੜ ਕੇ ਬੇਨਤੀ ਕੀਤੀ ਹੈ ਕਿ ਇਹ ਦੁਨੀਆ ਇੱਕ ਭਵ-ਸਾਗਰ ਹੈ ਅਤੇ ਇਸ ਵਿੱਚੋਂ ਪਾਰ ਉਤਾਰਾ ਸਿਰਫ ਧੰਨ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਹੀ ਕਰ ਸਕਦੇ ਹਨ। ਉਨ੍ਹਾਂ ਨੇ ਸੰਗਤ ਨੂੰ ਅਪੀਲ ਕੀਤੀ ਕਿ ਦੇਹ-ਧਾਰੀਆਂ ਅਤੇ ਪਖੰਡੀਆਂ ਦਾ ਖਹਿੜਾ ਛੱਡ ਕੇ ਸਿਰਫ ਗੁਰੂ ਦੇ ਲੜ ਲੱਗੋ। ਜੇਕਰ ਅਸੀਂ ਗੁਰੂ ਸਾਹਿਬ ਨੂੰ ਸਮਰਪਿਤ ਹੋ ਜਾਵਾਂਗੇ, ਤਾਂ ਕੌਮ ਦੀਆਂ ਸਾਰੀਆਂ ਮੁਸ਼ਕਲਾਂ ਦਾ ਹੱਲ ਆਪਣੇ ਆਪ ਹੋ ਜਾਵੇਗਾ। ਗੁਰਜੀਤ ਸਿੰਘ ਖ਼ਾਲਸਾ ਦਾ ਇਹ ਸੰਘਰਸ਼ ਰਹਿੰਦੀ ਦੁਨੀਆ ਤੱਕ ਇੱਕ ਮਿਸਾਲ ਬਣ ਕੇ ਰਹੇਗਾ ਕਿ ਜਦੋਂ ਕੋਈ ਸਿੱਖ ਆਪਣੇ ਗੁਰੂ ਲਈ ਅਡੋਲ ਹੋ ਕੇ ਖੜ੍ਹ ਜਾਂਦਾ ਹੈ, ਤਾਂ ਅਕਾਲ ਪੁਰਖ ਖ਼ੁਦ ਆਪ ਸਹਾਈ ਹੁੰਦੇ ਹਨ।
Leave a Comment