ਜਿੱਥੇ ਕੋਈ ਨਾ ਪਹੁੰਚ ਸਕਿਆ, ਉੱਥੇ ਪਹੁੰਚੀ ਹਰਮਨਪ੍ਰੀਤ: 150 T20Is ਮੈਚਾਂ ‘ਚ ਕਪਤਾਨੀ ਕਰਨ ਵਾਲੀ ਦੁਨੀਆ ਦੀ ਪਹਿਲੀ ਕ੍ਰਿਕਟਰ

ਦੁਬਈ ਇੰਟਰਨੈਸ਼ਨਲ ਕ੍ਰਿਕਟ ਸਟੇਡੀਅਮ ਵਿੱਚ ਜਦੋਂ ਭਾਰਤੀ ਮਹਿਲਾ ਕ੍ਰਿਕਟ ਟੀਮ ਦੀ ਕਪਤਾਨ ਹਰਮਨਪ੍ਰੀਤ ਕੌਰ ਪਾਕਿਸਤਾਨ ਵਿਰੁੱਧ ਟਾਸ ਲਈ ਮੈਦਾਨ ‘ਚ ਉੱਤਰੀ, ਤਾਂ ਉਹ ਸਿਰਫ਼ ਇੱਕ ਮੈਚ ਖੇਡਣ ਨਹੀਂ, ਸਗੋਂ ਵਿਸ਼ਵ ਕ੍ਰਿਕਟ ਦਾ ਅਜਿਹਾ ਇਤਿਹਾਸ ਰਚਣ ਜਾ ਰਹੀ ਸੀ ਜਿੱਥੇ ਅੱਜ ਤੱਕ ਕੋਈ ਵੀ ਪੁਰਸ਼ ਜਾਂ ਮਹਿਲਾ ਖਿਡਾਰੀ ਨਹੀਂ ਪਹੁੰਚ ਸਕਿਆ। ਏਸ਼ੀਆ ਕੱਪ ਦੇ ਇਸ ਅਹਿਮ ਮੈਚ ਵਿੱਚ ਹਰਮਨਪ੍ਰੀਤ ਨੇ ਬਤੌਰ ਕਪਤਾਨ ਵਜੋਂ ਆਪਣਾ 150ਵਾਂ T20 ਅੰਤਰਰਾਸ਼ਟਰੀ ਮੈਚ ਖੇਡ ਕੇ ਇੱਕ ਨਵਾਂ ਇਤਿਹਾਸ ਸਿਰਜ ਦਿੱਤਾ ਹੈ, ਜਿਸ ਸਦਕਾ ਉਨ੍ਹਾਂ ਨੇ ਨਾ ਸਿਰਫ਼ ਆਪਣੀ ਲੀਡਰਸ਼ਿਪ ਦਾ ਲੋਹਾ ਮਨਵਾਇਆ, ਸਗੋਂ ਭਾਰਤ ਦਾ ਮਾਣ ਵੀ ਵਿਸ਼ਵ ਪੱਧਰ ‘ਤੇ ਹੋਰ ਵਧਾ ਦਿੱਤਾ। 

ਰਿਕਾਰਡਾਂ ਦੀ ਦੌੜ ‘ਚ ਸਭ ਤੋਂ ਅੱਗੇ 

ਇਸ ਰਿਕਾਰਡ ਦੀ ਵਿਸ਼ਾਲਤਾ ਦਾ ਅੰਦਾਜ਼ਾ ਇਸ ਗੱਲ ਤੋਂ ਲਗਾਇਆ ਜਾ ਸਕਦਾ ਹੈ ਕਿ ਮਹਿਲਾ ਕ੍ਰਿਕਟ ਵਿੱਚ ਦੂਜੇ ਨੰਬਰ ‘ਤੇ ਮੌਜੂਦ ਸ਼੍ਰੀਲੰਕਾ ਦੀ ਚਮਾਰੀ ਅਥਾਪਥੂ ਨੇ 121 ਮੈਚਾਂ ਵਿੱਚ ਕਪਤਾਨ ਵਜੋਂ ਟੀਮ ਦੀ ਅਗਵਾਈ ਕੀਤੀ ਹੈ।  ਜਦਕਿ ਦੂਜੇ ਪਾਸੇ, ਰਵਾਂਡਾ ਦੀ ਮੈਰੀ ਬਿਮੇਨੀਮਾਨਾ 101 ਮੈਚਾਂ ਨਾਲ ਤੀਜੇ ਸਥਾਨ ਅਤੇ ਆਸਟ੍ਰੇਲੀਆ ਦੀ ਦਿੱਗਜ ਮੇਗ ਲੈਨਿੰਗ 100 ਮੈਚਾਂ ਨਾਲ ਚੌਥੇ ਸਥਾਨ ‘ਤੇ ਹੈ।

ਹਾਲਾਂਕਿ, ਸਭ ਤੋਂ ਹੈਰਾਨੀਜਨਕ ਗੱਲ ਇਹ ਹੈ ਕਿ ਪੁਰਸ਼ ਕ੍ਰਿਕਟ ਵਿੱਚ ਅੱਜ ਤੱਕ ਕੋਈ ਵੀ ਕਪਤਾਨ 100 ਮੈਚਾਂ ਦੇ ਅੰਕੜੇ ਨੂੰ ਵੀ ਨਹੀਂ ਛੂਹ ਸਕਿਆ। ਜੇਕਰ ਪੁਰਸ਼ਾਂ ਦੀ ਗੱਲ ਕਰੀਏ, ਤਾਂ ਨਾਮੀਬੀਆ ਦੇ ਗੇਰਹਾਰਡ ਇਰਾਸਮਸ 91 ਮੈਚਾਂ ਨਾਲ ਸਭ ਤੋਂ ਅੱਗੇ ਹਨ। ਇਸ ਦੇ ਨਾਲ ਹੀ, ਰਵਾਂਡਾ ਦਾ ਕਲਿੰਟਨ ਰੁਬਾਗੁਮਿਆ ਦੇ ਨਾਂ 90 ਮੈਚ ਅਤੇ ਪਾਕਿਸਤਾਨ ਦੇ ਸਾਬਕਾ ਕਪਤਾਨ ਬਾਬਰ ਆਜ਼ਮ ਦੇ ਨਾਂ 85 ਮੈਚ ਦਰਜ ਹਨ। ਇਸ ਲਈ, ਹਰਮਨਪ੍ਰੀਤ ਪੁਰਸ਼ ਕ੍ਰਿਕਟ ਦੇ ਸਭ ਤੋਂ ਸਫਲ ਕਪਤਾਨ ਨਾਲੋਂ ਵੀ 59 ਮੈਚ ਅੱਗੇ ਹੈ।

ਅੰਕੜਿਆਂ ਦੀ ਜ਼ੁਬਾਨੀ ਕਪਤਾਨੀ ਦਾ ਦਮ

ਹਰਮਨਪ੍ਰੀਤ ਦਾ ਕਪਤਾਨ ਵਜੋਂ ਸਫ਼ਰ ਨਾ ਸਿਰਫ਼ ਲੰਬਾ ਰਿਹਾ, ਸਗੋਂ ਪ੍ਰਭਾਵਸ਼ਾਲੀ ਵੀ ਰਿਹਾ ਹੈ। 149 T20 ਮੈਚਾਂ ਵਿੱਚ, ਭਾਰਤ ਨੇ ਹਰਮਨਪ੍ਰੀਤ ਦੀ ਅਗਵਾਈ ਹੇਠ 86 ਜਿੱਤਾਂ ਦਰਜ ਕੀਤੀਆਂ ਹਨ, ਜਦਕਿ 57 ਮੈਚਾਂ ਵਿੱਚ ਹਾਰ ਮਿਲੀ, ਇੱਕ ਮੈਚ ਟਾਈ ਰਿਹਾ ਅਤੇ ਪੰਜ ਮੈਚਾਂ ਦਾ ਕੋਈ ਨਤੀਜਾ ਨਹੀਂ ਨਿਕਲਿਆ। ਨਤੀਜੇ ਵਜੋਂ ਮੈਚਾਂ ਦੇ ਹਿਸਾਬ ਨਾਲ ਹਰਮਨਪ੍ਰੀਤ ਦੀ ਜਿੱਤ ਦਰ 60 ਫ਼ੀਸਦੀ ਤੋਂ ਵੱਧ ਹੈ। ਇਸ ਤੋਂ ਇਲਾਵਾ, ਅੰਕੜਿਆਂ ਵਿੱਚ ਇੱਕ ਦਿਲਚਸਪ ਪਹਿਲੂ ਇਹ ਵੀ ਹੈ ਕਿ ਦਸੰਬਰ 2022 ਵਿੱਚ ਆਸਟ੍ਰੇਲੀਆ ਵਿਰੁੱਧ ਖੇਡਿਆ ਗਿਆ T20 ਮੈਚ ਟਾਈ ਰਿਹਾ ਸੀ, ਪਰ ਭਾਰਤ ਨੇ ਹਰਮਨਪ੍ਰੀਤ ਦੀ ਅਗਵਾਈ ਵਿੱਚ ਸੁਪਰ ਓਵਰ ਵਿੱਚ ਬਾਜ਼ੀ ਮਾਰੀ ਸੀ। ਇਹੀ ਕਾਰਨ ਹੈ ਕਿ ਕੁਝ ਰਿਕਾਰਡ ਉਸ ਨੂੰ 86 ਜਿੱਤਾਂ ਦਾ ਸਿਹਰਾ ਦਿੰਦੇ ਹਨ ਜਦੋਂਕਿ ਕੁਝ ਭਾਰਤ ਨੂੰ ਉਸ ਦੀ ਕਪਤਾਨੀ ਹੇਠ 87 ਮੈਚ ਜਿੱਤਣ ਦਾ ਸਿਹਰਾ ਦਿੰਦੇ ਹਨ।

ਪਾਕਿਸਤਾਨ ਨਾਲ ਜੁੜੀ ਖ਼ਾਸ ਸਾਂਝ

ਦਿਲਚਸਪ ਗੱਲ ਇਹ ਹੈ ਕਿ ਹਰਮਨਪ੍ਰੀਤ ਦੇ ਕਪਤਾਨੀ ਸਫ਼ਰ ਦਾ ਪਾਕਿਸਤਾਨ ਨਾਲ ਇੱਕ ਅਨੋਖਾ ਸੰਬੰਧ ਜੁੜਿਆ ਹੋਇਆ ਹੈ। ਸਾਲ 2012 ਵਿੱਚ, ਜਦੋਂ ਨਿਯਮਿਤ ਕਪਤਾਨ ਮਿਤਾਲੀ ਰਾਜ ਸੱਟ ਕਾਰਨ ਬਾਹਰ ਹੋ ਗਈ ਸੀ, ਤਾਂ ਉਸ ਸਮੇਂ ਹਰਮਨਪ੍ਰੀਤ ਨੂੰ ਕਾਰਜਕਾਰੀ ਕਪਤਾਨ ਬਣਾਇਆ ਗਿਆ ਸੀ। ਉਸ ਮਹਿਲਾ T20 ਏਸ਼ੀਆ ਕੱਪ ਫਾਈਨਲ ਵਿੱਚ ਭਾਰਤੀ ਟੀਮ ਸਿਰਫ਼ 81 ਦੌੜਾਂ ‘ਤੇ ਆਊਟ ਹੋ ਗਈ ਸੀ, ਜਿਸ ਵਿੱਚ ਹਰਮਨਪ੍ਰੀਤ ਨੇ ਖ਼ੁਦ 20 ਦੌੜਾਂ ਦਾ ਯੋਗਦਾਨ ਪਾਇਆ ਸੀ। ਇਸ ਦੇ ਬਾਵਜੂਦ, ਭਾਰਤ ਨੇ ਸ਼ਾਨਦਾਰ ਬਚਾਅ ਕਰਦਿਆਂ ਪਾਕਿਸਤਾਨ ਨੂੰ 63 ਦੌੜਾਂ ‘ਤੇ ਆਊਟ ਕਰਕੇ 18 ਦੌੜਾਂ ਨਾਲ ਖ਼ਿਤਾਬ ਜਿੱਤ ਲਿਆ।

ਇਸ ਤੋਂ ਬਾਅਦ, ਸਾਲ 2016 ਵਿੱਚ ਹਰਮਨਪ੍ਰੀਤ ਨੇ ਸਥਾਈ ਤੌਰ ‘ਤੇ T20ਆਈ ਕਪਤਾਨ ਦਾ ਅਹੁਦਾ ਸੰਭਾਲਿਆ ਅਤੇ ਉਸ ਸਾਲ ਏਸ਼ੀਆ ਕੱਪ ਵਿੱਚ ਟੀਮ ਦੀ ਅਗਵਾਈ ਕੀਤੀ। 2012 ਦੇ ਉਸ ਫਾਈਨਲ ਤੋਂ ਲਗਭਗ 14 ਸਾਲ ਬਾਅਦ, ਜਦੋਂ ਉਨ੍ਹਾਂ ਨੇ ਆਪਣੇ 150ਵੇਂ ਮੈਚ ਦਾ ਮੀਲ ਪੱਥਰ ਛੂਹਿਆ, ਤਾਂ ਇੱਕ ਵਾਰ ਫਿਰ ਸਾਹਮਣੇ ਪਾਕਿਸਤਾਨ ਦੀ ਟੀਮ ਹੀ ਖੜ੍ਹੀ ਸੀ।

ਖ਼ਿਤਾਬੀ ਸਫ਼ਲਤਾਵਾਂ ਅਤੇ ਇਤਿਹਾਸਕ ਪ੍ਰਾਪਤੀਆਂ

ਹਰਮਨਪ੍ਰੀਤ ਦੀ ਅਗਵਾਈ ਵਿੱਚ ਭਾਰਤੀ ਟੀਮ ਨੇ ਕਈ ਵੱਡੀਆਂ ਉਚਾਈਆਂ ਨੂੰ ਛੂਹਿਆ। ਜਿੱਥੇ ਇੱਕ ਪਾਸੇ ਇਸ ਦੌਰਾਨ ਭਾਰਤ ਨੇ ਏਸ਼ੀਆ ਕੱਪ ਜਿੱਤਿਆ, 2020 ਮਹਿਲਾ T20 ਵਿਸ਼ਵ ਕੱਪ ਦੇ ਫਾਈਨਲ ਵਿੱਚ ਜਗ੍ਹਾ ਬਣਾਈ, ਉੱਥੇ ਹੀ ਦੂਜੇ ਪਾਸੇ 2022 ਦੀਆਂ ਕਾਮਨਵੈਲਥ ਗੇਮਜ਼ ਵਿੱਚ ਚਾਂਦੀ ਦਾ ਤਗ਼ਮਾ ਅਤੇ 2023 ਦੀਆਂ ਏਸ਼ੀਆਈ ਖੇਡਾਂ ਵਿੱਚ ਸੋਨ ਤਗ਼ਮਾ ਵੀ ਹਾਸਲ ਕੀਤਾ। ਪਰ ਇਹਨਾਂ ਸਭ ਤੋਂ ਵੱਧ ਕੇ, ਸਭ ਤੋਂ ਵੱਡੀ ਇਤਿਹਾਸਕ ਪ੍ਰਾਪਤੀ ਨਵੰਬਰ 2025 ਵਿੱਚ ਦਰਜ ਹੋਈ, ਜਦੋਂ ਭਾਰਤ ਨੇ ਦੱਖਣੀ ਅਫ਼ਰੀਕਾ ਨੂੰ ਹਰਾ ਕੇ ਆਪਣਾ ਪਹਿਲਾ ਮਹਿਲਾ ਵਨਡੇ ਵਿਸ਼ਵ ਕੱਪ ਜਿੱਤਿਆ। ਇਸ ਇਤਿਹਾਸਕ ਜਿੱਤ ਦੇ ਨਾਲ ਹਰਮਨਪ੍ਰੀਤ ਸੀਨੀਅਰ ਵਿਸ਼ਵ ਕੱਪ ਜਿੱਤਣ ਵਾਲੀ ਪਹਿਲੀ ਭਾਰਤੀ ਮਹਿਲਾ ਕਪਤਾਨ ਬਣ ਗਈ।

ਦੋਹਰੇ ਵਿਸ਼ਵ ਰਿਕਾਰਡਾਂ ਦੀ ਮਲਿਕਾ

150 ਮੈਚਾਂ ਦੀ ਕਪਤਾਨੀ ਦਾ ਇਹ ਰਿਕਾਰਡ ਹਰਮਨਪ੍ਰੀਤ ਵੱਲੋਂ ਕਾਇਮ ਕੀਤੇ ਇੱਕ ਹੋਰ ਵਿਸ਼ਵ ਰਿਕਾਰਡ ਤੋਂ ਕੁਝ ਮਹੀਨਿਆਂ ਬਾਅਦ ਹੀ ਆਇਆ ਹੈ। ਇਸ ਤੋਂ ਪਹਿਲਾਂ, ਜੂਨ ਵਿੱਚ ਦੱਖਣੀ ਅਫ਼ਰੀਕਾ ਵਿਰੁੱਧ T20 ਵਿਸ਼ਵ ਕੱਪ ਵਿੱਚ ਖੇਡਦੇ ਹੋਏ, ਉਹ 200 T20 ਅੰਤਰਰਾਸ਼ਟਰੀ ਮੈਚ ਖੇਡਣ ਵਾਲੀ ਦੁਨੀਆ ਦੀ ਪਹਿਲੀ ਕ੍ਰਿਕਟਰ ਬਣ ਗਈ। ਇਹੀ ਕਾਰਨ ਹੈ ਕਿ ਅੱਜ, ਉਹ ਵਿਸ਼ਵ ਕ੍ਰਿਕਟ ਵਿੱਚ ਇੱਕਲੌਤੀ ਅਜਿਹੀ ਖਿਡਾਰਨ ਹੈ ਜਿਸ ਦੇ ਨਾਂ 200 ਅੰਤਰਰਾਸ਼ਟਰੀ ਟੀ-20 ਮੈਚ ਖੇਡਣ ਦੇ ਨਾਲ-ਨਾਲ 150 ਮੈਚਾਂ ਵਿੱਚ ਕਪਤਾਨੀ ਕਰਨ ਦੇ ਦੋ ਬੇਮਿਸਾਲ ਰਿਕਾਰਡ ਦਰਜ ਹਨ।

ਹਰਮਨਪ੍ਰੀਤ ਕੌਰ ਦਾ ਇਹ ਸਫ਼ਰ ਸਿਰਫ਼ ਨਿੱਜੀ ਰਿਕਾਰਡਾਂ ਤੱਕ ਸੀਮਤ ਨਹੀਂ, ਸਗੋਂ ਵਿਸ਼ਵ ਕ੍ਰਿਕਟ ਵਿੱਚ ਭਾਰਤੀ ਮਹਿਲਾ ਸ਼ਕਤੀ ਦਾ ਬੁਲੰਦ ਪ੍ਰਤੀਕ ਹੈ। 200 ਮੈਚ ਖੇਡਣ ਅਤੇ 150 ਮੈਚਾਂ ਵਿੱਚ ਕਪਤਾਨੀ ਕਰਨ ਦਾ ਇਹ ਦੋਹਰਾ ਇਤਿਹਾਸ ਆਉਣ ਵਾਲੀਆਂ ਪੀੜ੍ਹੀਆਂ ਨੂੰ ਸੁਪਨੇ ਦੇਖਣ ਅਤੇ ਉਨ੍ਹਾਂ ਨੂੰ ਸਾਕਾਰ ਕਰਨ ਲਈ ਪ੍ਰੇਰਿਤ ਕਰਦਾ ਰਹੇਗਾ।