‘ਮੈਂ ਹੂੰ ਪੰਜਾਬ’ ਦਿਲਜੀਤ ਦੋਸਾਂਝ ਦੀ ਪਛਾਣ ਰਾਜਨੀਤੀ ਨੂੰ ਨਜ਼ਰਅੰਦਾਜ਼ ਨਹੀਂ ਕਰ ਸਕਦੀ

ਸੇਲਿਬ੍ਰਿਟੀ ਬਣਨਾ ਆਸਾਨ ਨਹੀਂ ਹੈ, ਖਾਸ ਅਜਿਹੇ ਵਿਅਕਤੀ ਲਈ ਜਿਸਦੀ ਪ੍ਰਸਿੱਧੀ ਦੇਸ਼ ਦੀਆਂ ਸਰਹੱਦਾਂ ਤੋਂ ਬਹੁਤ ਦੂਰ ਤੱਕ ਫੈਲੀ ਹੋਈ ਹੈ। ਅੱਜ ਦੇ ਸਮੇਂ ਚ ਬਹੁਤ ਹੀ ਘੱਟ ਅਜਿਹੇ ਭਾਰਤੀ ਕਲਾਕਾਰ ਹਨ ਜਿਨ੍ਹਾਂ ਨੂੰ ਭਾਰਤੀ ਪ੍ਰਵਾਸੀਆਂ ਤੋਂ ਉਸ ਕਿਸਮ ਦੀ ਵਫ਼ਾਦਾਰੀ ਅਤੇ ਪਿਆਰ ਮਿਲਦਾ ਹੈ ਜਿਵੇਂ ਦਿਲਜੀਤ ਦੋਸਾਂਝ ਨੂੰ ਮਿਲਦਾ ਹੈ। ਜਦੋਂ ਤੋਂ ਉਨ੍ਹਾਂ ਨੇ 2004 ਵਿੱਚ ਆਪਣੇ ਪਹਿਲੇ ਐਲਬਮ, “ਇਸ਼ਕ ਦਾ ਉਡਾ ਆੜਾ” ਨਾਲ ਇੰਡਸਟਰੀ ਵਿੱਚ ਕਦਮ ਰੱਖਿਆ, ਉਦੋਂ ਤੋਂ ਉਨ੍ਹਾਂ ਦੀ ਪ੍ਰਸਿੱਧੀ ਲਗਾਤਾਰ ਵੱਧਦੀ ਹੀ ਜਾ ਰਹੀ ਹੈ। ਹਿੱਟ ਪੰਜਾਬੀ ਗਾਣੇ, ਸਫਲ ਪੰਜਾਬੀ ਅਤੇ ਬਾਲੀਵੁੱਡ ਫਿਲਮਾਂ, ਅਤੇ ਹਾਊਸਫੁੱਲ ਅੰਤਰਰਾਸ਼ਟਰੀ ਟੂਰ – ਹਰੇਕ ਨਵੀਂ ਪ੍ਰਾਪਤੀ ਨੇ ਉਨ੍ਹਾਂ ਦੀ ਪਹੁੰਚ ਨੂੰ ਹੋਰ ਵੀ ਵਧਾ ਦਿੱਤਾ ਹੈ।

ਪਰ 2023 ਵਿੱਚ ਕੁਝ ਹੋਰ ਵੀ ਵੱਡਾ ਹੋਇਆ। ਕੋਚੇਲਾ ਵੈਲੀ ਮਿਊਜ਼ਿਕ ਐਂਡ ਆਰਟਸ ਫੈਸਟੀਵਲ ਵਿੱਚ, ਦੋਸਾਂਝ, ਰਵਾਇਤੀ ਪੋਸ਼ਾਕ ਨਾਲ ਦਸਤਾਰ ਸਜਾ ਕੇ, ਪਹਿਲੇ ਅਜਿਹੇ ਸਿੱਖ ਕਲਾਕਾਰ ਬਣੇ, ਜਿਨ੍ਹਾਂ ਨੇ ਇਸ ਪ੍ਰਸਿੱਧ ਗਲੋਬਲ ਸਟੇਜ ‘ਤੇ ਆਪਣੀ ਛਾਪ ਛੱਡੀ। ਅੰਤਰਰਾਸ਼ਟਰੀ ਦਰਸ਼ਕਾਂ ਲਈ ਪੰਜਾਬੀ ਵਿੱਚ ਗਾਉਂਦੇ ਹੋਏ, ਉਨ੍ਹਾਂ ਨੇ ਇੱਕ ਸਧਾਰਨ ਪ੍ਰਦਰਸ਼ਨ ਨੂੰ ਇੱਕ ਸੱਭਿਆਚਾਰਕ ਪਲ ਵਿੱਚ ਬਦਲ ਦਿੱਤਾ। ਐਡ ਸ਼ੀਰਨ ਨਾਲ ਉਨ੍ਹਾਂ ਦੀ ਲਗਾਤਾਰ ਦੋ ਪੇਸ਼ਕਾਰੀਆਂ ਨੇ ਉਨ੍ਹਾਂ ਦੀ ਪ੍ਰਸਿੱਧੀ ਨੂੰ ਹੋਰ ਮਜ਼ਬੂਤ ​​ਕੀਤਾ, ਜਿਸ ਨਾਲ ਇਹ ਸਾਬਤ ਹੋ ਗਿਆ ਕਿ ਪੰਜਾਬੀ ਸੰਗੀਤ ਹੁਣ ਇੱਕ ਵਿਸ਼ੇਸ਼ ਭਾਈਚਾਰੇ ਤੱਕ ਸੀਮਤ ਨਹੀਂ ਰਿਹਾ – ਇਹ ਹੁਣ ਦੁਨੀਆ ਭਰ ਵਿੱਚ ਫੈਲ ਗਿਆ ਹੈ।

ਰਾਜਨੀਤੀ ਲਈ ‘ਨਾਂਹ’

ਇਸ ਗੱਲ ਵਿਚ ਕੋਈ ਸ਼ੱਕ ਨਹੀਂ ਕਿ, ਆਪਣੇ ਗ੍ਰਹਿ ਰਾਜ ਦੀਆਂ ਰਾਜਨੀਤਿਕ ਪਾਰਟੀਆਂ ਨੇ ਦੋਸਾਂਝ ਨਾਲ ਸੰਪਰਕ ਕਰ ਕੇ, ਉਨ੍ਹਾਂ ਨੂੰ ਸ਼ਾਮਲ ਹੋਣ ਜਾਂ ਉਨ੍ਹਾਂ ਲਈ ਪ੍ਰਚਾਰ ਕਰਨ ਦੀ ਪੇਸ਼ਕਸ਼ ਕੀਤੀ ਹੋਵੇਗੀ। ਹਾਲਾਂਕਿ, ਦਿਲਜੀਤ ਨੇ ਅਜਿਹੀਆਂ ਸਾਰੀਆਂ ਅਟਕਲਾਂ ਨੂੰ ਖਤਮ ਕਰ ਦਿੱਤਾ ਹੈ। X ‘ਤੇ ਇੱਕ ਪੋਸਟ ਵਿੱਚ, ਦੋਸਾਂਝ ਨੇ ਕਿਹਾ, “ਕਦੇ ਵੀ ਨਹੀਂ… ਮੇਰਾ ਕੰਮ ਮਨੋਰੰਜਨ ਕਰਨਾ ਹੈ। ਮੈਂ ਆਪਣੇ ਹਲਕੇ ਵਿੱਚ ਬਹੁਤ ਖੁਸ਼ ਹਾਂ, ਤੁਹਾਡਾ ਸਾਰਿਆਂ ਦਾ ਬਹੁਤ-ਬਹੁਤ ਧੰਨਵਾਦ।” ਅਗਲੇ ਸਾਲ ਪੰਜਾਬ ਵਿੱਚ ਵਿਧਾਨ ਸਭਾ ਚੋਣਾਂ ਹਨ, ਅਜਿਹੇ ਮਾਹੌਲ ਚ ਰਾਜਨੀਤਿਕ ਗਤੀਵਿਧੀਆਂ ਪੂਰੇ ਜੋਰਾਂ ‘ਤੇ ਹਨ। ਸ਼ਨੀਵਾਰ ਨੂੰ, “ਜਾਗੋ ਪੰਜਾਬ ਮੰਚ”, ਜੋ ਕਿ ਸੇਵਾਮੁਕਤ ਨੌਕਰਸ਼ਾਹਾਂ, ਰੱਖਿਆ ਕਰਮਚਾਰੀਆਂ ਅਤੇ ਪੇਸ਼ੇਵਰਾਂ ਦਾ ਇੱਕ ਮੰਚ ਹੈ, ਨੇ ਇੱਕ ਪ੍ਰਮੁੱਖ ਅਖ਼ਬਾਰ ਵਿੱਚ ਇੱਕ ਪੂਰੇ ਪੰਨੇ ਦਾ ਇਸ਼ਤਿਹਾਰ ਪ੍ਰਕਾਸ਼ਿਤ ਕੀਤਾ। ਇਸ਼ਤਿਹਾਰ ਰਾਹੀਂ, ਉਨ੍ਹਾਂ ਨੇ ਗਾਇਕ ਨੂੰ ਪੰਜਾਬ ਦੀ ਰਾਜਨੀਤਿਕ ਵਾਗਡੋਰ ਸੰਭਾਲਣ ਦੀ ਅਪੀਲ ਕੀਤੀ, ਕਿਉਂਕਿ, ਉਨ੍ਹਾਂ ਦੇ ਅਨੁਸਾਰ, “ਸੱਤਾ ਵਿੱਚ ਲਗਾਤਾਰ ਸਰਕਾਰਾਂ ਨੇ ਪੰਜਾਬ ਨੂੰ ਗੋਡਿਆਂ ਭਾਰ ਕਰ ਦਿੱਤਾ ਹੈ।”

ਇਸ ਹਫ਼ਤੇ ਵਿਵਾਦ ਉਸ ਸਮੇਂ ਹੋਰ ਵੱਧ ਗਿਆ ਜਦੋਂ ਰਿਪੋਰਟਾਂ ਸਾਹਮਣੇ ਆਈਆਂ ਕਿ ਕਰਨਾਲ ਵਿੱਚ ਦੋਸਾਂਝ ਦੇ ਮੈਨੇਜਰ ਦੇ ਘਰ ਦੇ ਬਾਹਰ ਗੋਲੀਆਂ ਚਲਾਈਆਂ ਗਈਆਂ। ਜਦੋਂ ਕਿ ਹਰਿਆਣਾ ਪੁਲਿਸ ਨੇ ਦਾਅਵਾ ਕੀਤਾ ਕਿ ਕੋਈ ਰਸਮੀ ਸ਼ਿਕਾਇਤ ਨਹੀਂ ਮਿਲੀ ਹੈ ਅਤੇ ਘਟਨਾ ਸਥਾਨ ਤੋਂ ਕੁਝ ਵੀ ਬਰਾਮਦ ਨਹੀਂ ਹੋਇਆ ਹੈ, ਪਰ ਲਾਰੈਂਸ ਬਿਸ਼ਨੋਈ ਗੈਂਗ ਨਾਲ ਜੁੜੇ ਇੱਕ ਸੋਸ਼ਲ ਮੀਡੀਆ ਹੈਂਡਲ ਨੇ ਇਸ ਘਟਨਾ ਦੀ ਜ਼ਿੰਮੇਵਾਰੀ ਲਈ ਹੈ। ਇੱਕ ਦਿਨ ਬਾਅਦ, ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਮਾਨ ਨੇ ਭਾਜਪਾ ‘ਤੇ ਦੋਸਾਂਝ ਦੇ ਪ੍ਰਸਤਾਵ ਨੂੰ ਠੁਕਰਾਉਣ ਤੋਂ ਬਾਅਦ “ਧਮਕਾਉਣ ਦੀਆਂ ਚਾਲਾਂ” ਦਾ ਸਹਾਰਾ ਲੈਣ ਦਾ ਦੋਸ਼ ਲਗਾਇਆ। ਮਾਨ ਨੇ ਕਿਹਾ, ” ਕਿਉਂਕਿ ਦਿਲਜੀਤ ਨੇ ਭਾਜਪਾ ਦੀ ਪੇਸ਼ਕਸ਼ ਨੂੰ ਠੁਕਰਾਇਆ ਹੈ, ਇਸ ਕਾਰਨ ਉਨ੍ਹਾਂ ਵਿਰੁੱਧ ਡਰਾਉਣ-ਧਮਕਾਉਣ ਦੀ ਰਾਜਨੀਤੀ ਸ਼ੁਰੂ ਹੋ ਗਈ ਹੈ, ਜੋ ਕਿ ਗਲਤ ਹੈ। ਉਨ੍ਹਾਂ ਦੇ ਮੈਨੇਜਰ ਦੇ ਘਰ ‘ਤੇ ਹਮਲਾ ਇਸ ਡਰਾਉਣ-ਧਮਕਾਉਣ ਦੀ ਰਾਜਨੀਤੀ ਨੂੰ ਦਰਸਾਉਂਦਾ ਹੈ।”

ਨਾਗਰਿਕਤਾ ਬਾਰੇ ਸਵਾਲ

ਪੰਜਾਬੀ ਆਈਕਨ ਦੇ ਰਾਜਨੀਤੀ ਵਿੱਚ ਨਾ ਆਉਣ ਦੇ ਫੈਸਲੇ ਦਾ ਵੀਰਵਾਰ ਨੂੰ ਇੱਕ ਹੋਰ ਸਪੱਸ਼ਟੀਕਰਨ ਸਾਹਮਣੇ ਆਇਆ। ਇੰਡੀਅਨ ਐਕਸਪ੍ਰੈਸ ਦੀ ਇੱਕ ਰਿਪੋਰਟ ਵਿੱਚ ਦਾਅਵਾ ਕੀਤਾ ਗਿਆ ਹੈ ਕਿ ਦੋਸਾਂਝ 2022 ਤੋਂ ਅਮਰੀਕੀ ਨਾਗਰਿਕ ਹੈ। ਸੂਤਰਾਂ ਦਾ ਹਵਾਲਾ ਦਿੰਦੇ ਹੋਏ, ਰਿਪੋਰਟ ਵਿੱਚ ਕਿਹਾ ਗਿਆ ਹੈ ਕਿ ਦੋਸਾਂਝ ਸਤੰਬਰ 2022 ਤੋਂ ਈ-ਵੀਜ਼ਾ ‘ਤੇ ਭਾਰਤ ਆ ਰਹੇ ਹਨ, ਜਿਸਦਾ ਮਤਲਬ ਹੈ ਕਿ ਉਨ੍ਹਾਂ ਕੋਲ ਓਸੀਆਈ (ਓਵਰਸੀਜ਼ ਸਿਟੀਜ਼ਨ ਆਫ਼ ਇੰਡੀਆ) ਕਾਰਡ ਵੀ ਨਹੀਂ ਹੈ। ਜਦੋਂ ਕਿ ਗਾਇਕ ਵੱਲੋਂ ਅਜੇ ਤੱਕ ਕੋਈ ਅਧਿਕਾਰਤ ਪੁਸ਼ਟੀ ਨਹੀਂ ਕੀਤੀ ਗਈ ਹੈ, ਪਰ ਇਸ ਦਾਅਵੇ ਨੇ ਪੰਜਾਬ ਦੇ ਬਹੁਤ ਜ਼ਿਆਦਾ ਰਾਜਨੀਤਿਕ ਮਾਹੌਲ ਵਿੱਚ ਪਛਾਣ, ਰਾਸ਼ਟਰਵਾਦ ਅਤੇ ਮਸ਼ਹੂਰ ਹਸਤੀਆਂ ਨਾਲ ਜੁੜੀ ਬਹਿਸ ਨੂੰ ਮੁੜ ਸੁਰਜੀਤ ਕਰ ਦਿੱਤਾ ਹੈ।

ਪੰਜਾਬ ਦੇ ਸੱਭਿਆਚਾਰਕ ਰਾਜਦੂਤ

ਇਸ ਦੌਰਾਨ, ਦੋਸਾਂਝ ਆਪਣੀ ਕਲਾ ‘ਤੇ ਕੇਂਦ੍ਰਿਤ ਰੱਖਣ ਲਈ ਦ੍ਰਿੜ ਜਾਪਦੇ ਹਨ। ਉਹ ਫ਼ਿਲਹਾਲ ਆਪਣੇ ‘ਔਰਾ ਵਰਲਡ ਟੂਰ 2026’ ਦੇ ਹਿੱਸੇ ਵਜੋਂ ਅਮਰੀਕਾ ਦੇ ਦੌਰੇ ਤੇ ਹਨ। ਇਸ ਮਹੀਨੇ ਦੇ ਸ਼ੁਰੂ ਵਿੱਚ, ਉਨ੍ਹਾਂ ਨੇ ਕੈਨੇਡਾ ਕੈਲਗਰੀ ਵਿੱਚ ਆਪਣਾ ਕੰਸਰਟ ਅੱਧ ਵਿਚਾਲੇ ਹੀ ਰੋਲ ਦਿੱਤਾ, ਜਦੋਂ ਭੀੜ ਵਿੱਚ ਖਾਲਿਸਤਾਨ ਪੱਖੀ ਝੰਡੇ ਵੇਖੇ। ਉਨ੍ਹਾਂ ਨੇ ਵਿਘਨ ਪਾਉਣ ਵਾਲੇ ਤੱਤਾਂ ਨੂੰ ਉਥੋਂ ਚਲੇ ਜਾਣ ਲਈ ਕਿਹਾ; ਇਸ ਕਦਮ ਕਾਰਨ ਉਨ੍ਹਾਂ ਨੂੰ ਕੱਟੜਪੰਥੀ ਸਮੂਹਾਂ ਤੋਂ ਧਮਕੀਆਂ ਵੀ ਮਿਲੀਆਂ। ਭੀੜ ਨੂੰ ਸੰਬੋਧਨ ਕਰਦਿਆਂ, ਉਨ੍ਹਾਂ ਨੇ ਕਿਹਾ, “ਅਸੀਂ ਅਕਸਰ ਕਹਿੰਦੇ ਹਾਂ ਕਿ ਰਾਸ਼ਟਰੀ ਮੀਡੀਆ ਪੰਜਾਬ ਬਾਰੇ ਜ਼ਿਆਦਾ ਗੱਲ ਨਹੀਂ ਕਰਦਾ। ਮੈਂ ਪੰਜਾਬ ਦੀ ਖ਼ਾਤਰ ਹਰ ਜਗ੍ਹਾ ਗਿਆ, ਇਥੋਂ ਤੱਕ ਕਿ ਉਸ ਚੈਨਲ (ਕੇਬੀਸੀ ਲਈ ਸੋਨੀ ਐਂਟਰਟੇਨਮੈਂਟ ਟੈਲੀਵਿਜ਼ਨ) ‘ਤੇ ਵੀ। ਮੈਂ ਉਥੇ ਪੰਜਾਬ ਦੇ ਮੁੱਦੇ ਚੁੱਕੇ । ਜਦੋਂ ਵੀ ਲੋੜ ਪਈ, ਮੈਂ ਆਪਣੇ ਰਾਜ ਨੂੰ ਖੁੱਲ੍ਹੇ ਦਿਲ ਨਾਲ ਦਾਨ ਵੀ ਦਿੱਤਾ,” – ਉਨ੍ਹਾਂ ਦੀ ਇਨ੍ਹਾਂ ਗੱਲਾਂ ਦਾ ਦਰਸ਼ਕਾਂ ਵੱਲੋਂ ਗੜ੍ਹਕਦਾਰ ਤਾੜੀਆਂ ਨਾਲ ਸਵਾਗਤ ਕੀਤਾ ਗਿਆ।

ਪਿਛਲੇ ਸਾਲ, ਦੋਸਾਂਝ “ਕੌਣ ਬਨੇਗਾ ਕਰੋੜਪਤੀ” ਦੇ 17ਵੇਂ ਸੀਜ਼ਨ ਵਿੱਚ ਨਜ਼ਰ ਆਏ ਸਨ ਅਤੇ 50 ਲੱਖ ਰੁਪਏ ਜਿੱਤੇ ਸਨ, ਜੋ ਉਨ੍ਹਾਂ ਨੇ ਪੰਜਾਬ ਵਿੱਚ ਹੜ੍ਹ ਰਾਹਤ ਕਾਰਜਾਂ ਲਈ ਦਾਨ ਕੀਤੇ ਸਨ। ਹਾਲਾਂਕਿ, ਸ਼ੋਅ ਦੇ ਹੋਸਟ ਅਮਿਤਾਭ ਬੱਚਨ ਦੇ ਪੈਰ ਛੂਹਣ ਕਾਰਨ ਉਨ੍ਹਾਂ ਨੂੰ ਵਿਵਾਦ ਦਾ ਸਾਹਮਣਾ ਕਰਨਾ ਪਿਆ। ਉਨ੍ਹਾਂ ਨੇ “ਮੈਂ ਹੂੰ ਪੰਜਾਬ” ਗਾਉਂਦੇ ਹੋਏ ਸ਼ੋਅ ਵਿੱਚ ਪ੍ਰਵੇਸ਼ ਕੀਤਾ ਸੀ।

ਪਿਛਲੇ ਮਹੀਨੇ ਦੇ ਅਖੀਰ ਵਿੱਚ, ਉਹ “ਦ ਟੂਨਾਈਟ ਸ਼ੋਅ ਵਿਦ ਜਿੰਮੀ ਫੈਲਨ” ਵਿੱਚ ਆਏ, ਜਿਥੇ ਉਨ੍ਹਾਂ ਨੇ 112 ਸਾਲ ਪੁਰਾਣੀ ਕਾਮਾਗਾਟਾ ਮਾਰੂ ਘਟਨਾ ਦਾ ਜ਼ਿਕਰ ਕੀਤਾ। 1914 ਵਿੱਚ, ਕੈਨੇਡੀਅਨ ਸਰਕਾਰ ਨੇ ਐਸਐਸ ਕਾਮਾਗਾਟਾ ਮਾਰੂ ‘ਤੇ ਸਵਾਰ 376 ਯਾਤਰੀਆਂ – ਜ਼ਿਆਦਾਤਰ ਸਿੱਖ – ਨੂੰ ਵੈਨਕੂਵਰ ਦੇ ਕੰਢੇ ‘ਤੇ ਉਤਰਨ ਦੀ ਆਗਿਆ ਦੇਣ ਤੋਂ ਇਨਕਾਰ ਕਰ ਦਿੱਤਾ ਸੀ। ਸਰਕਾਰ ਨੇ ਨਿਰੰਤਰ ਯਾਤਰਾ ਨਿਯਮਾਂ ਦਾ ਹਵਾਲਾ ਦਿੱਤਾ, ਜਿਸ ਦੇ ਤਹਿਤ ਅਸਲ ਵਿਚ ਭਾਰਤੀਆਂ ਦਾ ਕੈਨੇਡਾ ਵਿੱਚ ਦਾਖਲ ਹੋਣਾ ਮਨ੍ਹਾ ਸੀ ਕਿਉਂਕਿ ਭਾਰਤ ਤੋਂ ਕੈਨੇਡਾ ਤੱਕ ਕੋਈ ਸਿੱਧੀ ਯਾਤਰਾ ਉਪਲੱਬਧ ਨਹੀਂ ਸੀ। ਦੋ ਮਹੀਨਿਆਂ ਤੱਕ, ਇਹ ਯਾਤਰੀ ਬਿਨਾਂ ਭੋਜਨ ਜਾਂ ਪਾਣੀ ਦੇ ਬੰਦਰਗਾਹ ਵਿੱਚ ਫਸੇ ਰਹੇ।

ਇਸ ਘਟਨਾ ਨੂੰ ਯਾਦ ਕਰਦੇ ਹੋਏ, ਦੋਸਾਂਝ ਨੇ ਕਿਹਾ ਕਿ ਉਨ੍ਹਾਂ ਨੂੰ ਮਾਣ ਮਹਿਸੂਸ ਹੋ ਰਿਹਾ ਹੈ ਕਿ ਉਨ੍ਹਾਂ ਨੇ ਉਸ ਜਗ੍ਹਾ ਤੋਂ ਸਿਰਫ ਦੋ ਕਿਲੋਮੀਟਰ ਦੂਰ ਇਕ ਅਜਿਹੇ ਸਟੇਡੀਅਮ ਵਿੱਚ ਪ੍ਰਦਰਸ਼ਨ ਕੀਤਾ ਜੋ ਪ੍ਰਸ਼ੰਸਕਾਂ ਨਾਲ ਭਰਿਆ ਹੋਇਆ ਸੀ। “ਬੇਸ਼ੱਕ ਉਸ ਸਮੇਂ, ਉਨ੍ਹਾਂ ਨੇ ਸਾਨੂੰ ਇਜਾਜ਼ਤ ਨਹੀਂ ਦਿੱਤੀ ਸੀ। ਪਰ ਹੁਣ, 55,000 ਲੋਕ ਸਾਡੀ ਸਫਲਤਾ ਦਾ ਜਸ਼ਨ ਮਨਾਉਣ ਲਈ ਉਥੇ ਮੌਜੂਦ ਸਨ, ਉਨ੍ਹਾਂ ਨੇ ਫੈਲਨ ਨੂੰ ਦੱਸਿਆ, ਅਤੇ ਨਾਲ ਹੀ ਸ਼ੋਅ ਦੌਰਾਨ ਉਨ੍ਹਾਂ ਨੇ ਕੁਝ ਭੰਗੜੇ ਦੇ ਸਟੈੱਪ ਵੀ ਸਿਖਾਏ। ਇਹ ਇਸ ਗੱਲ ਦੀ ਯਾਦ ਦਿਵਾਉਂਦਾ ਹੈ ਕਿ ਪੰਜਾਬੀ ਪਛਾਣ ਨੇ ਕਿੰਨਾ ਲੰਬਾ ਸਫ਼ਰ ਤੈਅ ਕੀਤਾ ਹੈ – ਅਣਗਹਿਲੀ ਤੋਂ ਲੈ ਕੇ ਵਿਸ਼ਵਵਿਆਪੀ ਪ੍ਰਸ਼ੰਸਾ ਤੱਕ।

ਅਤੇ ਸ਼ਾਇਦ ਇਹੀ ਦਿਲਜੀਤ ਦੋਸਾਂਝ ਹੋਣ ਦੀ ਅਸਲ ਮੁਸ਼ਕਲ ਹੈ। ਉਹ ਹੁਣ ਸਿਰਫ ਇੱਕ ਗਾਇਕ ਜਾਂ ਅਦਾਕਾਰ ਨਹੀਂ ਰਿਹਾ। ਦੁਨੀਆ ਭਰ ਦੇ ਲੱਖਾਂ ਪੰਜਾਬੀਆਂ ਲਈ, ਉਹ ਇੱਕ ਪ੍ਰਤੀਕ ਬਣ ਗਏ ਹਨ – ਮਾਣ, ਪਛਾਣ ਅਤੇ ਇੱਛਾਵਾਂ ਦਾ। ਹੁਣ, ਉਨ੍ਹਾਂ ਦਾ ਹਰ ਪ੍ਰਦਰਸ਼ਨ, ਹਰ ਬਿਆਨ, ਅਤੇ ਹਰ ਚੁੱਪ ਮਨੋਰੰਜਨ ਤੋਂ ਪਰੇ ਰਾਜਨੀਤਿਕ ਅਤੇ ਸੱਭਿਆਚਾਰਕ ਮਹੱਤਵ ਰੱਖਦੀ ਹੈ।

ਖੁਦ ਦੋਸਾਂਝ ਲਈ, ਚੁਣੌਤੀ ਸਿਰਫ ਇੱਕ ਮਨੋਰੰਜਨ ਕਰਨ ਵਾਲਾ ਬਣੇ ਰਹਿਣ ਦੀ ਕੋਸ਼ਿਸ਼ ਕਰਨਾ, ਜਦੋਂ ਕਿ ਦੁਨੀਆਂ ਉਨ੍ਹਾਂ ਨੂੰ ਕੁਝ ਵੱਡਾ ਬਣਾਉਣ ‘ਤੇ ਤੁਲੀ ਹੋਈ ਜਾਪਦੀ ਹੈ। ਫ਼ਿਲਹਾਲ, ਉਨ੍ਹਾਂ ਦਾ ਇਹੋ ਮੰਤਰ ਜਾਪਦਾ ਹੈ: “ਜਿੰਨਾ ਚਿਰ ਮੈਂ ਜ਼ਿੰਦਾ ਹਾਂ, ਮੈਂ ਖੁਸ਼ੀਆਂ ਫੈਲਾਉਣ ਦੀ ਕੋਸ਼ਿਸ਼ ਕਰਦਾ ਰਹਾਂਗਾ।”

ਡਿਸਕਲੇਮਰ : ਇਸ ਲੇਖ ਵਿੱਚ ਪ੍ਰਗਟ ਕੀਤੇ ਗਏ ਵਿਚਾਰ ਸਿਰਫ ਲੇਖਕ ਦੇ ਹਨ ਅਤੇ ਇਹ Sadda Punjab ਜਾਂ ਕਿਸੇ ਵੀ ਸੰਬੰਧਿਤ ਸੰਗਠਨ ਦੇ ਵਿਚਾਰਾਂ ਜਾਂ ਰਾਏ ਨੂੰ ਨਹੀਂ ਦਰਸਾਉਂਦੇ ਹਨ।