ਗੁਰਦਾਸਪੁਰ ਦੀਆਂ ਗਲੀਆਂ ਤੋਂ ਕੈਨੇਡਾ ਦੀ ਕਪਤਾਨੀ ਤੱਕ; ਦਿਲਪ੍ਰੀਤ ਸਿੰਘ ਬਾਜਵਾ ਦਾ ਸਫ਼ਰ

ਕਹਿੰਦੇ ਹਨ ਕਿ ਜੇਕਰ ਇਰਾਦੇ ਮਜ਼ਬੂਤ ਹੋਣ ਅਤੇ ਮਿਹਨਤ ਵਿੱਚ ਸੱਚਾਈ ਹੋਵੇ, ਤਾਂ ਸਰਹੱਦਾਂ ਅਤੇ ਸਮੁੰਦਰ ਵੀ ਰਸਤਾ ਨਹੀਂ ਰੋਕ ਸਕਦੇ। ਪੰਜਾਬ ਦੀ ਧਰਤੀ ਨੇ ਹਮੇਸ਼ਾ ਹੀ ਅਜਿਹੇ ਸੂਰਮੇ ਪੈਦਾ ਕੀਤੇ ਹਨ, ਜਿਨ੍ਹਾਂ ਨੇ ਵਿਦੇਸ਼ੀ ਧਰਤੀ ‘ਤੇ ਜਾ ਕੇ ਆਪਣੀ ਕਾਬਲੀਅਤ ਦਾ ਲੋਹਾ ਮਨਵਾਇਆ ਹੈ। ਅੱਜ-ਕੱਲ੍ਹ ਕ੍ਰਿਕਟ ਜਗਤ ਵਿੱਚ ਅਜਿਹਾ ਹੀ ਇੱਕ ਨਾਮ ਗੂੰਜ ਰਿਹਾ ਹੈ, ਦਿਲਪ੍ਰੀਤ ਸਿੰਘ ਬਾਜਵਾ। ਗੁਰਦਾਸਪੁਰ ਦੇ ਇੱਕ ਸਧਾਰਨ ਪਰਿਵਾਰ ਵਿੱਚ ਜਨਮੇ ਇਸ ਨੌਜਵਾਨ ਨੇ ਨਾ ਸਿਰਫ ਕੈਨੇਡਾ ਦੀ ਰਾਸ਼ਟਰੀ ਕ੍ਰਿਕਟ ਟੀਮ ਵਿੱਚ ਜਗ੍ਹਾ ਬਣਾਈ, ਸਗੋਂ ਹੁਣ ਉਹ ਆਈ.ਸੀ.ਸੀ. (ICC) ਪੁਰਸ਼ ਟੀ-20 ਵਿਸ਼ਵ ਕੱਪ 2026 ਵਿੱਚ ਕੈਨੇਡਾ ਦੀ ਟੀਮ ਦੀ ਅਗਵਾਈ ਬਤੌਰ ਕਪਤਾਨ ਕੀਤੀ ਹੈ।

ਸਾਲ 2003 ਵਿੱਚ ਜਨਮੇ ਦਿਲਪ੍ਰੀਤ ਸਿੰਘ ਬਾਜਵਾ ਦਾ ਬਚਪਨ ਗੁਰਦਾਸਪੁਰ ਦੀਆਂ ਖੁੱਲ੍ਹੀਆਂ ਫ਼ਿਜ਼ਾਵਾਂ ਵਿੱਚ ਬੀਤਿਆ। ਖੇਡਾਂ ਪ੍ਰਤੀ ਜਨੂੰਨ ਉਨ੍ਹਾਂ ਨੂੰ ਵਿਰਸੇ ਵਿੱਚ ਮਿਲਿਆ ਸੀ, ਪਰ ਕ੍ਰਿਕਟ ਨੂੰ ਪੇਸ਼ੇ ਵਜੋਂ ਚੁਣਨਾ ਇੱਕ ਵੱਡੀ ਚੁਣੌਤੀ ਸੀ। ਸਾਲ 2012 ਵਿੱਚ, ਜਦੋਂ ਉਹ ਅਜੇ ਬਾਲਗ ਵੀ ਨਹੀਂ ਹੋਏ ਸਨ, ਉਨ੍ਹਾਂ ਨੇ ਸਥਾਨਕ ਕੋਚ ਰਾਕੇਸ਼ ਮਾਰਸ਼ਲ ਦੀ ਅਕੈਡਮੀ ਵਿੱਚ ਪੈਰ ਰੱਖਿਆ। ਕੋਚ ਮਾਰਸ਼ਲ ਨੇ ਦਿਲਪ੍ਰੀਤ ਦੇ ਅੰਦਰ ਛਿਪੀ ਪ੍ਰਤਿਭਾ ਨੂੰ ਪਛਾਣ ਲਿਆ ਅਤੇ ਉਨ੍ਹਾਂ ਨੂੰ ਤਰਾਸ਼ਣਾ ਸ਼ੁਰੂ ਕੀਤਾ। ਸ਼ੁਰੂਆਤੀ ਦੌਰ ਵਿੱਚ ਸਰੋਤਾਂ ਦੀ ਕਮੀ ਸੀ, ਪਰ ਦਿਲਪ੍ਰੀਤ ਦੇ ਹੌਸਲੇ ਬੁਲੰਦ ਸਨ। ਉਹ ਸਵੇਰੇ ਜਲਦੀ ਉੱਠ ਕੇ ਅਭਿਆਸ ਕਰਦੇ ਅਤੇ ਫਿਰ ਸਕੂਲ ਜਾਂਦੇ।

ਦਿਲਪ੍ਰੀਤ ਨੇ ਖੇਡਾਂ ਦੇ ਨਾਲ-ਨਾਲ ਅਕਾਦਮਿਕ ਸਿੱਖਿਆ ਨੂੰ ਵੀ ਬਰਾਬਰ ਤਰਜੀਹ ਦਿੱਤੀ

ਦਿਲਪ੍ਰੀਤ ਨੇ ਆਪਣੀ ਸਕੂਲੀ ਪੜ੍ਹਾਈ ਸ੍ਰੀ ਗੁਰੂ ਅਰਜਨ ਦੇਵ ਸੀਨੀਅਰ ਸੈਕੰਡਰੀ ਸਕੂਲ, ਬੁਰਜ ਸਾਹਿਬ (ਧਾਰੀਵਾਲ) ਤੋਂ ਪੂਰੀ ਕੀਤੀ। ਅਕਸਰ ਦੇਖਿਆ ਜਾਂਦਾ ਹੈ ਕਿ ਖਿਡਾਰੀ ਪੜ੍ਹਾਈ ਨੂੰ ਪਿੱਛੇ ਛੱਡ ਦਿੰਦੇ ਹਨ, ਪਰ ਦਿਲਪ੍ਰੀਤ ਨੇ ਖੇਡਾਂ ਦੇ ਨਾਲ-ਨਾਲ ਅਕਾਦਮਿਕ ਸਿੱਖਿਆ ਨੂੰ ਵੀ ਬਰਾਬਰ ਤਰਜੀਹ ਦਿੱਤੀ। ਸਕੂਲ ਦੇ ਪ੍ਰਿੰਸੀਪਲ ਅਨੂਪ ਸਿੰਘ ਅਨੁਸਾਰ, ਦਿਲਪ੍ਰੀਤ ਹਮੇਸ਼ਾ ਇੱਕ ਅਨੁਸ਼ਾਸਿਤ ਵਿਦਿਆਰਥੀ ਰਿਹਾ ਹੈ। ਉਸ ਨੇ 2018 ਦੀਆਂ ‘ਆਲ ਇੰਡੀਆ ਸਕੂਲ ਖੇਡਾਂ’ ਵਿੱਚ ਸ਼ਾਨਦਾਰ ਪ੍ਰਦਰਸ਼ਨ ਕਰਕੇ ਸਾਰਿਆਂ ਦਾ ਧਿਆਨ ਆਪਣੇ ਵੱਲ ਖਿੱਚਿਆ ਸੀ।

ਜਦੋਂ ਦਿਲਪ੍ਰੀਤ ਨੇ ਕੈਨੇਡਾ ਦੀ ਘਰੇਲੂ ਕ੍ਰਿਕਟ ‘ਚ ਖੇਡਣਾ ਸ਼ੁਰੂ ਕੀਤਾ

ਸਾਲ 2020 ਵਿੱਚ ਦਿਲਪ੍ਰੀਤ ਦਾ ਜੀਵਨ ਇੱਕ ਨਵਾਂ ਮੋੜ ਲੈ ਗਿਆ ਜਦੋਂ ਉਹ ਆਪਣੇ ਪਰਿਵਾਰ ਸਮੇਤ ਕੈਨੇਡਾ ਚਲੇ ਗਏ। ਕਿਸੇ ਨਵੇਂ ਦੇਸ਼ ਵਿੱਚ ਜਾ ਕੇ ਸੈੱਟ ਹੋਣਾ ਅਤੇ ਫਿਰ ਉਥੋਂ ਦੀ ਰਾਸ਼ਟਰੀ ਟੀਮ ਤੱਕ ਪਹੁੰਚਣਾ ਕੋਈ ਸੌਖਾ ਕੰਮ ਨਹੀਂ ਸੀ। ਕੈਨੇਡਾ ਦੀਆਂ ਬਰਫ਼ੀਲੀਆਂ ਹਵਾਵਾਂ ਅਤੇ ਬਿਲਕੁਲ ਵੱਖਰੇ ਸੱਭਿਆਚਾਰ ਵਿੱਚ ਦਿਲਪ੍ਰੀਤ ਨੇ ਕ੍ਰਿਕਟ ਨੂੰ ਨਹੀਂ ਛੱਡਿਆ। ਉਨ੍ਹਾਂ ਨੇ ਕੈਨੇਡਾ ਦੀ ਘਰੇਲੂ ਕ੍ਰਿਕਟ ਵਿੱਚ ਖੇਡਣਾ ਸ਼ੁਰੂ ਕੀਤਾ ਅਤੇ ਲਗਾਤਾਰ ਦੌੜਾਂ ਬਣਾਈਆਂ। ਉਨ੍ਹਾਂ ਦੇ ਆਲਰਾਊਂਡਰ ਪ੍ਰਦਰਸ਼ਨ ਨੇ ਕੈਨੇਡੀਅਨ ਚੋਣਕਾਰਾਂ ਨੂੰ ਪ੍ਰਭਾਵਿਤ ਕੀਤਾ।

ਇਤਿਹਾਸਿਕ ਸੈਂਕੜਾ ਅਤੇ ਦਿਲਪ੍ਰੀਤ ਦੀ ਗਲੋਬਲ ਪਛਾਣ

ਦਿਲਪ੍ਰੀਤ ਦੀ ਜ਼ਿੰਦਗੀ ਦਾ ਸਭ ਤੋਂ ਵੱਡਾ ਮੋੜ ‘ਗਲੋਬਲ ਟੀ-20 ਕੈਨੇਡਾ’ ਟੂਰਨਾਮੈਂਟ ਦੌਰਾਨ ਆਇਆ। ਮਾਂਟਰੀਅਲ ਟਾਈਗਰਜ਼ (Montreal Tigers) ਵੱਲੋਂ ਖੇਡਦਿਆਂ ਉਨ੍ਹਾਂ ਨੇ ਇੱਕ ਧਮਾਕੇਦਾਰ ਸੈਂਕੜਾ ਜੜਿਆ। ਉਹ ਇਸ ਟੂਰਨਾਮੈਂਟ ਦੇ ਇਤਿਹਾਸ ਵਿੱਚ ਸੈਂਕੜਾ ਲਗਾਉਣ ਵਾਲੇ ਪਹਿਲੇ ਕੈਨੇਡੀਅਨ ਖਿਡਾਰੀ ਬਣ ਗਏ। ਇਸ ਇੱਕ ਪਾਰੀ ਨੇ ਉਨ੍ਹਾਂ ਨੂੰ ਰਾਤੋਂ-ਰਾਤ ਅੰਤਰਰਾਸ਼ਟਰੀ ਕ੍ਰਿਕਟ ਸਟਾਰ ਬਣਾ ਦਿੱਤਾ। ਕ੍ਰਿਕਟ ਦੇ ਵੱਡੇ ਦਿੱਗਜਾਂ ਨੇ ਉਨ੍ਹਾਂ ਦੀ ਬੱਲੇਬਾਜ਼ੀ ਦੀ ਤਕਨੀਕ ਅਤੇ ਸ਼ਾਂਤ ਸੁਭਾਅ ਦੀ ਸ਼ਲਾਘਾ ਕੀਤੀ।

ਕੈਨੇਡਾ ਦੀ ਕਪਤਾਨੀ ਅਤੇ ਵੱਡੀ ਜ਼ਿੰਮੇਵਾਰੀ

ਦਿਲਪ੍ਰੀਤ ਦੀ ਨਿਰੰਤਰਤਾ ਅਤੇ ਮੈਦਾਨ ‘ਤੇ ਫੈਸਲੇ ਲੈਣ ਦੀ ਕਾਬਲੀਅਤ ਨੂੰ ਦੇਖਦੇ ਹੋਏ, ਕੈਨੇਡਾ ਕ੍ਰਿਕਟ ਬੋਰਡ ਨੇ ਉਨ੍ਹਾਂ ਨੂੰ ਨਿਕੋਲਸ ਕਿਰਟਨ ਦੀ ਥਾਂ ਟੀਮ ਦਾ ਮੁੱਖ ਕਪਤਾਨ ਨਿਯੁਕਤ ਕੀਤਾ ਹੈ। ਚੋਣਕਾਰਾਂ ਅਨੁਸਾਰ, ਦਿਲਪ੍ਰੀਤ ਵਿੱਚ ਟੀਮ ਨੂੰ ਇਕੱਠੇ ਰੱਖਣ ਅਤੇ ਦਬਾਅ ਵਾਲੇ ਮੈਚਾਂ ਵਿੱਚ ਸ਼ਾਨਦਾਰ ਪ੍ਰਦਰਸ਼ਨ ਕਰਨ ਦੀ ਵਿਲੱਖਣ ਯੋਗਤਾ ਹੈ। ਉਨ੍ਹਾਂ ਦੇ ਮੋਢਿਆਂ ‘ਤੇ 2026 ਦੇ ਟੀ-20 ਵਿਸ਼ਵ ਕੱਪ ਵਿੱਚ ਕੈਨੇਡਾ ਦਾ ਝੰਡਾ ਬੁਲੰਦ ਕਰਨ ਦੀ ਜ਼ਿੰਮੇਵਾਰੀ ਸੀ। ਉਨ੍ਹਾਂ ਨੇ ਇਸ ਦੌਰਾਨ ਚੰਗਾ ਪ੍ਰਦਰਸ਼ਨ ਕੀਤਾ।

ਪਰਿਵਾਰ ਅਤੇ ਇਲਾਕੇ ਵਿੱਚ ਖੁਸ਼ੀ ਦੀ ਲਹਿਰ

ਦਿਲਪ੍ਰੀਤ ਦੀ ਇਸ ਪ੍ਰਾਪਤੀ ‘ਤੇ ਉਨ੍ਹਾਂ ਦੇ ਜੱਦੀ ਜ਼ਿਲ੍ਹੇ ਗੁਰਦਾਸਪੁਰ ਵਿੱਚ ਦੀਵਾਲੀ ਵਰਗਾ ਮਾਹੌਲ ਸੀ। ਉਨ੍ਹਾਂ ਦੇ ਪਿਤਾ ਸ੍ਰੀ ਹਰਪ੍ਰੀਤ ਸਿੰਘ, ਜੋ ਖੇਤੀਬਾੜੀ ਵਿਭਾਗ ਤੋਂ ਸੇਵਾਮੁਕਤ ਅਧਿਕਾਰੀ ਹਨ, ਅਤੇ ਮਾਤਾ ਸ਼੍ਰੀਮਤੀ ਹਰਲੀਨ ਕੌਰ, ਜੋ ਇੱਕ ਸਰਕਾਰੀ ਅਧਿਆਪਕਾ ਹਨ, ਆਪਣੇ ਪੁੱਤਰ ਦੀ ਇਸ ਕਾਮਯਾਬੀ ‘ਤੇ ਫ਼ਖ਼ਰ ਮਹਿਸੂਸ ਕਰ ਰਹੇ ਹਨ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਦਿਲਪ੍ਰੀਤ ਨੇ ਸਾਬਤ ਕਰ ਦਿੱਤਾ ਹੈ ਕਿ, ਜੇਕਰ ਮਨ ਵਿੱਚ ਕੁਝ ਕਰਨ ਦਾ ਜਜ਼ਬਾ ਹੋਵੇ, ਤਾਂ ਦੁਨੀਆ ਦੀ ਕੋਈ ਵੀ ਤਾਕਤ ਤੁਹਾਨੂੰ ਰੋਕ ਨਹੀਂ ਸਕਦੀ।

ਦਿਲਪ੍ਰੀਤ ਸਿੰਘ ਬਾਜਵਾ ਦਾ ਸਫ਼ਰ ਅੱਜ ਦੇ ਨੌਜਵਾਨਾਂ ਲਈ ਇੱਕ ਮਿਸਾਲ ਹੈ। ਉਨ੍ਹਾਂ ਦੀ ਕਹਾਣੀ ਸਾਨੂੰ ਸਿਖਾਉਂਦੀ ਹੈ ਕਿ ਸਫਲਤਾ ਸਿਰਫ ਟੈਲੇਂਟ ਨਾਲ ਨਹੀਂ, ਸਗੋਂ ਸਖ਼ਤ ਮਿਹਨਤ ਅਤੇ ਹਾਲਾਤਾਂ ਨਾਲ ਲੜਨ ਦੇ ਜਜ਼ਬੇ ਨਾਲ ਮਿਲਦੀ ਹੈ। ਗੁਰਦਾਸਪੁਰ ਵਿੱਚ ਮਿੱਟੀ ਦੀਆਂ ਪਿੱਚਾਂ ਤੋਂ ਸ਼ੁਰੂ ਹੋਇਆ ਇਹ ਸਫ਼ਰ ਹੁਣ ਵਿਸ਼ਵ ਕੱਪ ਦੇ ਵੱਡੇ ਸਟੇਡੀਅਮਾਂ ਤੱਕ ਪਹੁੰਚ ਗਿਆ ਹੈ। ਸਮੁੱਚਾ ਪੰਜਾਬ ਅਤੇ ਦੁਨੀਆ ਭਰ ਦੇ ਖੇਡ ਪ੍ਰੇਮੀ ਉਮੀਦ ਕਰ ਰਹੇ ਹਨ ਕਿ, ਦਿਲਪ੍ਰੀਤ ਆਪਣੀ ਕਪਤਾਨੀ ਹੇਠ ਕੈਨੇਡਾ ਦੀ ਟੀਮ ਨੂੰ ਨਵੀਆਂ ਉਚਾਈਆਂ ‘ਤੇ ਲੈ ਕੇ ਜਾਣਗੇ।