ਮੁਹੱਬਤ ਦਾ ਸਫ਼ਰ: 165 ਕਿਲੋਮੀਟਰ ਦੀ ਦੌੜ ਅਤੇ Sidhu Moosewala ਨੂੰ ਅਨੋਖੀ ਸ਼ਰਧਾਂਜਲੀ

ਦਿਲੋਂ ਕੀਤੇ ਸਤਿਕਾਰ ਅਤੇ ਪਿਆਰ ਵਿੱਚ ਇੰਨੀ ਤਾਕਤ ਹੁੰਦੀ ਹੈ ਕਿ ਉਹ ਔਖੇ ਤੋਂ ਔਖੇ ਰਸਤਿਆਂ ਨੂੰ ਵੀ ਆਸਾਨ ਬਣਾ ਦਿੰਦੀ ਹੈ। ਅਜਿਹੀ ਹੀ ਇੱਕ ਮਿਸਾਲ ਫਿਰੋਜ਼ਪੁਰ ਦੇ ਪਿੰਡ ਖਾਈ ਫੇਮੇ ਕੀ ਦੇ ਇੱਕ ਨੌਜਵਾਨ ਅਥਲੀਟ ਸੰਦੀਪ ਸਿੰਘ ਨੇ ਪੇਸ਼ ਕੀਤੀ ਹੈ। ‘ਸਾਡਾ ਪੰਜਾਬ’ ਨੇ ਇਸ ਨੌਜਵਾਨ ਅਥਲੀਟ ਨਾਲ ਖ਼ਾਸ ਗੱਲਬਾਤ ਕੀਤੀ, ਜਿਸ ਨੇ ਸਿੱਧੂ ਮੂਸੇਵਾਲਾ ਪ੍ਰਤੀ ਆਪਣੀ ਅਥਾਹ ਸ਼ਰਧਾ ਨੂੰ ਪ੍ਰਗਟ ਕਰਨ ਲਈ ਆਪਣੇ ਪਿੰਡ ਤੋਂ ਲੈ ਕੇ ਮਾਨਸਾ ਦੇ ਪਿੰਡ ਮੂਸਾ ਤੱਕ 165 ਕਿਲੋਮੀਟਰ ਦੀ ਲੰਬੀ ਦੌੜ ਲਗਾਈ। ਇਸ ਪਹਿਲ ਨੂੰ “Run to Moosa – Tribute Run for the Legend” ਨਾਮ ਦਿੱਤਾ ਗਿਆ ਸੀ, ਸੰਦੀਪ ਸਿੰਘ ਨੇ ਦੱਸਿਆ ਕਿ ਇਹ ਦੌੜ ਕੋਈ ਮੈਡਲ ਜਿੱਤਣ ਲਈ ਨਹੀਂ ਸੀ, ਸਗੋਂ ਇੱਕ ‘ਲੈਜੰਡ’ ਨੂੰ ਦਿੱਤੀ ਗਈ ਇੱਕ ਰੂਹਾਨੀ ਸ਼ਰਧਾਂਜਲੀ ਸੀ।

ਪਿੰਡ ਖਾਈ ਫੇਮੇ ਕੀ ਤੋਂ ਮੂਸਾ ਤੱਕ ਦਾ ਸਫ਼ਰ

ਇਹ ਸਫ਼ਰ ਸਰੀਰਕ ਯੋਗਤਾ ਨਾਲੋਂ ਮਾਨਸਿਕ ਤਾਕਤ ਦੀ ਪ੍ਰੀਖਿਆ ਸੀ। ਅਥਲੀਟ ਨੇ ਦੱਸਿਆ ਕਿ ਉਸਨੇ ਆਪਣੀ ਜ਼ਿੰਦਗੀ ਵਿੱਚ ਵੱਧ ਤੋਂ ਵੱਧ 25 ਕਿਲੋਮੀਟਰ ਦੀ ਦੌੜ ਲਗਾਈ ਸੀ, ਪਰ 25 ਤੋਂ ਸਿੱਧਾ 165 ਕਿਲੋਮੀਟਰ ਦਾ ਫੈਸਲਾ ਲੈਣਾ ਬਹੁਤ ਜੋਖਮ ਭਰਿਆ ਸੀ। ਜਦੋਂ ਉਹ ਸਿੱਧੂ ਦੀ ਹਵੇਲੀ ਦੇ ਸਾਹਮਣੇ ਪਹੁੰਚਿਆ, ਤਾਂ ਉਸ ਦੇ ਸਰੀਰ ਨੇ ਜਵਾਬ ਦੇ ਦਿੱਤਾ ਸੀ, ਲੱਤਾਂ ਬਿਲਕੁਲ ਖ਼ਤਮ ਹੋ ਚੁੱਕੀਆਂ ਸਨ, ਪਰ ਹਵੇਲੀ ਨੂੰ ਵੇਖਦਿਆਂ ਹੀ, ਸਾਰਾ ਦਰਦ ਮਿੰਟਾਂ ਵਿੱਚ ਗਾਇਬ ਹੋ ਗਿਆ। ਉਸਨੇ ਆਖ਼ਰੀ 30 ਕਿਲੋਮੀਟਰ ਦਾ ਫਾਸਲਾ ਪੈਦਲ ਤੈਅ ਕੀਤਾ, ਪਰ ਉਸ ਦੇ ਦਿਲ ਦੀ ਆਵਾਜ਼ ਨੇ ਉਸ ਨੂੰ ਰੁਕਣ ਨਹੀਂ ਦਿੱਤਾ।

ਸ਼ਰਧਾਂਜਲੀ ਦਾ ਵੱਖਰਾ ਅੰਦਾਜ਼

ਹਾਲਾਂਕਿ, ਅੱਜ ਦੇ ਦੌਰ ਵਿੱਚ ਸ਼ਰਧਾਂਜਲੀ ਦੇਣ ਦੇ ਬਹੁਤ ਤਰੀਕੇ ਹਨ, ਜਿਵੇਂ ਕਿ ਕੁਝ ਲੋਕ ਸੋਸ਼ਲ ਮੀਡੀਆ ‘ਤੇ ਫ਼ੋਟੋ ਪੋਸਟ ਕਰਦੇ ਹਨ ਅਤੇ ਕੁਝ ਵੀਡੀਓ ਰਾਹੀਂ ਆਪਣਾ ਦੁੱਖ ਪ੍ਰਗਟ ਕਰਦੇ ਹਨ। ਪਰ ਅਥਲੀਟ ਸੰਦੀਪ ਸਿੰਘ ਲਈ, ਸ਼ਰਧਾਂਜਲੀ ਦਾ ਮਤਲਬ ਅਨੁਸ਼ਾਸਨ ਅਤੇ ਦਰਦ ‘ਚੋਂ ਲੰਘਣਾ ਸੀ। ਉਸ ਨੇ ਕਿਹਾ ਕਿ ਮੈਂ ਚਾਹੁੰਦਾ ਸੀ ਕਿ ਸਿੱਧੂ ਬਾਈ ਨੂੰ ਕੁਝ ਅਜਿਹਾ ਭੇਟ ਕਰਾਂ ਜਿਸ ਵਿੱਚ ਮੇਰਾ ਡਿਸਿਪਲਨ ਹੋਵੇ। ਦਰਅਸਲ, ਇਹ ਪਲੈਨ ਦਿਮਾਗ ਤੋਂ ਨਹੀਂ, ਸਗੋਂ ਉਸ ਦੇ ਦਿਲ ਤੋਂ ਆਈ ਇੱਕ ਆਵਾਜ਼ ਸੀ।

Sidhu Moosewala: ਸਿਰਫ ਇੱਕ ਗਾਇਕ ਨਹੀਂ, ਇੱਕ ਸੋਚ

ਅਥਲੀਟ ਨੇ ਸਿੱਧੂ ਨੂੰ ਸਿਰਫ ਉਸਦੇ ਗੀਤਾਂ ਕਰਕੇ ਹੀ ਨਹੀਂ, ਸਗੋਂ ਉਸਦੇ ਆਤਮ-ਵਿਸ਼ਵਾਸ ਅਤੇ ਅਨਫਿਲਟਰਡ ਵਾਲੀ ਸ਼ਖ਼ਸੀਅਤ ਕਰਕੇ ਵੀ ਆਪਣਾ ਆਦਰਸ਼ ਮੰਨਿਆ। ਜਿਵੇਂ ਸਿੱਧੂ ਨੇ ਜੀ-ਵੈਗਨ ਨਾਲ ਆਪਣੀ ਸ਼ੁਰੂਆਤ ਕਰਕੇ ਦੁਨੀਆ ਨੂੰ ਹਿਲਾ ਦਿੱਤਾ ਸੀ, ਉਸੇ ਤਰ੍ਹਾਂ ਉਸ ਦੀ ਸੋਚ ਨੇ ਲੱਖਾਂ ਨੌਜਵਾਨਾਂ ਨੂੰ ਨਿਡਰ ਰਹਿਣਾ ਸਿਖਾਇਆ। ਅਥਲੀਟ ਕਹਿੰਦਾ ਹੈ, “ਬਾਈ ਸਾਡੀਆਂ ਨਜ਼ਰਾਂ ਤੋਂ ਦੂਰ ਹੋਇਆ ਹੈ, ਪਰ ਉਹ ਅੱਜ ਵੀ ਸਾਡੇ ਆਲੇ-ਦੁਆਲੇ ਹੈ। ਉਹ ਕੋਈ ਆਮ ਇਨਸਾਨ ਨਹੀਂ, ਇੱਕ ਲੈਜੰਡ ਸੀ।”

ਇੱਕ ਵਿਅਕਤੀਗਤ ਰਨ ਬਣੀ ਜਨਤਕ ਮੁਹਿੰਮ

ਜਦੋਂ ਇਹ ਨੌਜਵਾਨ ਫਿਰੋਜ਼ਪੁਰ ਤੋਂ ਮਾਨਸਾ ਵੱਲ ਜਾ ਰਿਹਾ ਸੀ, ਤਾਂ ਰਾਹ ਵਿੱਚ ਲੋਕਾਂ ਨੇ ਉਸ ਨੂੰ ਬਹੁਤ ਪਿਆਰ ਦਿੱਤਾ। ਕੋਈ ਖਾਣਾ ਦੇ ਰਹੇ ਸੀ ਅਤੇ ਕੋਈ ਪਾਣੀ। ਇਹ ਦੇਖ ਕੇ ਉਸ ਨੂੰ ਅਹਿਸਾਸ ਹੋਇਆ ਕਿ ਇਹ ਦੌੜ ਸਿਰਫ ਉਸਦੇ ਇਕੱਲੇ ਦੀ ਨਹੀਂ ਰਹੀ, ਸਗੋਂ ਉਨ੍ਹਾਂ ਲੱਖਾਂ ਲੋਕਾਂ ਦੀ ਬਣ ਗਈ ਹੈ ਜੋ ਸਿੱਧੂ ਨੂੰ ਦਿਲੋਂ ਪਿਆਰ ਕਰਦੇ ਹਨ। ਸਿੱਧੂ ਦੀ ਪ੍ਰਸਿੱਧੀ ਦਾ ਅੰਦਾਜ਼ਾ ਇਸ ਗੱਲ ਤੋਂ ਲਗਾਇਆ ਜਾ ਸਕਦਾ ਹੈ ਕਿ ਲੋਕ ਉਸ ਦੇ ਨਾਮ ‘ਤੇ ਆਉਣ-ਜਾਣ ਵਾਲੇ ਰਾਹਗੀਰਾਂ ਦੀ ਸੇਵਾ ਕਰਨ ਲਈ ਵੀ ਤਿਆਰ ਹਨ।

ਕੰਟਰੋਵਰਸੀਆਂ ਅਤੇ ਕਲਮ ਦੀ ਤਾਕਤ

ਸਿੱਧੂ ਦੀ ਜ਼ਿੰਦਗੀ ਹਮੇਸ਼ਾ ਵਿਵਾਦਾਂ ਅਤੇ ਰੌਲੇ-ਰੱਪੇ ਵਿੱਚ ਘਿਰੀ ਰਹੀ, ਪਰ ਉਸ ਦਾ ਜਵਾਬ ਹਮੇਸ਼ਾ ਉਸਦੀ ਕਲਮ ਸੀ। ਉਸ ਨੇ ਇੱਕ ਵਾਰ ਕਿਹਾ ਸੀ ਕਿ ਉਹ ਕੋਈ ਸ਼ਾਇਰ ਨਹੀਂ ਜੋ ਨਦੀ ਕਿਨਾਰੇ ਸ਼ਾਂਤੀ ਵਿੱਚ ਬੈਠ ਕੇ ਲਿਖੇਗਾ, ਜਿੰਨੇ ਉਸ ਦੇ ਆਸੇ-ਪਾਸੇ ਰੌਲੇ ਹੋਣਗੇ, ਉਸ ਦੀ ਕਲਮ ਉਨੀ ਹੀ ਤੇਜ਼ ਚੱਲੇਗੀ। ਉਸ ਨੇ ਆਪਣੀ ਜ਼ਿੰਦਗੀ ਨੂੰ ਜੀਉਂਦੇ ਹੋਏ ਗਾਇਆ। ਲੋਕਾਂ ਨੂੰ ਉਹ ਹੰਕਾਰੀ ਲੱਗਦਾ ਸੀ, ਪਰ ਅਸਲ ਵਿੱਚ ਉਹ ਇੱਕ ਨਿਮਰ ਨੌਜਵਾਨ ਸੀ ਜੋ ਆਪਣੀ ਮਿੱਟੀ ਨਾਲ ਜੁੜਿਆ ਹੋਇਆ ਸੀ।

ਮਿੱਟੀ ਨਾਲ ਜੁੜਿਆ ਸੁਪਰਸਟਾਰ: ਬਿਲਬੋਰਡ ਤੋਂ ਟਰੈਕਟਰ ਤੱਕ

ਗੱਲਬਾਤ ਦੌਰਾਨ ਸੰਦੀਪ ਨੇ ਸਿੱਧੂ ਦੀ ਸਾਦਗੀ ਦਾ ਜ਼ਿਕਰ ਕਰਦਿਆਂ ਕਿਹਾ ਕਿ ਪੰਜਾਬ ਵਿੱਚ ਹਜ਼ਾਰਾਂ ਕਲਾਕਾਰ ਹਨ, ਪਰ ਸਿੱਧੂ ਵਰਗਾ ਕੋਈ ਨਹੀਂ ਹੈ। ਅੱਜ ਜਦੋਂ ਕਲਾਕਾਰ ਮਸ਼ਹੂਰ ਹੁੰਦੇ ਹੀ ਵਿਦੇਸ਼ਾਂ ਜਾਂ ਵੱਡੇ ਸ਼ਹਿਰਾਂ ਵਿੱਚ ਵੱਸ ਜਾਂਦੇ ਹਨ, ਤਾਂ ਸਿੱਧੂ ਅੰਤ ਤੱਕ ਆਪਣੇ ਪਿੰਡ ਮੂਸਾ ਵਿੱਚ ਰਹਿੰਦਾ ਰਿਹਾ। ਉਹ ਬਿਲਬੋਰਡ ਅਤੇ ਹਾਲੀਵੁੱਡ ‘ਤੇ ਰਾਜ ਕਰਦਾ ਸੀ, ਪਰ ਉਸ ਨੂੰ ਖੇਤਾਂ ਵਿੱਚ ਟਰੈਕਟਰ ਚਲਾਉਣ ਅਤੇ ਚੱਪਲਾਂ ਵਿੱਚ ਮਿੱਟੀ ਨਾਲ ਮਿੱਟੀ ਹੁੰਦਿਆਂ ਕੋਈ ਸੰਗ ਨਹੀਂ ਸੀ ਆਉਂਦੀ। ਇਹ ਸਾਦਗੀ ਉਸ ਨੂੰ ਦੂਜਿਆਂ ਨਾਲੋਂ ਵੱਖਰਾ ਬਣਾਉਂਦੀ ਸੀ। ਲੋਕਾਂ ਨੂੰ ਉਹ ਹੰਕਾਰੀ ਲੱਗਦਾ ਸੀ, ਪਰ ਜੋ ਦੋ-ਦੋ ਕਮਰਿਆਂ ਵਾਲੇ ਘਰਾਂ ਚੋਂ ਉੱਠ ਕੇ ਇੰਨੀ ਦੂਰ ਪਹੁੰਚਿਆ ਹੋਵੇ, ਉਹ ਹੰਕਾਰੀ ਨਹੀਂ ਹੋ ਸਕਦਾ।

ਪੰਜਾਬੀਅਤ ਅਤੇ ਪੱਗ ਦਾ ਮਾਣ

ਸਿੱਧੂ ਮੂਸੇਵਾਲਾ ਨੇ ਨਾ ਸਿਰਫ ਪੰਜਾਬੀ ਗੀਤਾਂ ਦਾ ਚਿਹਰਾ ਬਦਲਿਆ, ਸਗੋਂ ਪੰਜਾਬੀ ਪੱਗ ਅਤੇ ਪਛਾਣ ਨੂੰ ਅੰਤਰਰਾਸ਼ਟਰੀ ਪੱਧਰ ‘ਤੇ ਮਾਨਤਾ ਵੀ ਦਿਵਾਈ। ਅਥਲੀਟ ਸੰਦੀਪ ਨੇ ਆਪਣੀ ਕੈਨੇਡਾ ਦੀ ਯਾਦ ਸਾਂਝੀ ਕਰਦਿਆਂ ਦੱਸਿਆ ਕਿ ਕਿਵੇਂ Niagara Falls ‘ਤੇ ਗੋਰੇ ਅਤੇ ਕਾਲੇ ਲੋਕ ਪੱਗ ਦੇਖ ਕੇ “ਸਿੱਧੂ-ਸਿੱਧੂ” ਦਾ ਨਾਮ ਲੈਂਦੇ ਸਨ। ਜਿਥੇ ਪਹਿਲਾਂ ਲੋਕ ਪੱਗ ਬਾਰੇ ਬਹੁਤ ਘੱਟ ਜਾਣਦੇ ਸਨ, ਉਥੇ ਹੀ ਸਿੱਧੂ ਨੇ ਇਸ ਨੂੰ ਸਾਡੀ ਪਛਾਣ ਬਣਾ ਦਿੱਤਾ ਅਤੇ ਇਸਨੂੰ ਪੂਰੀ ਦੁਨੀਆ ਨੂੰ ਜਾਣੂ ਕਰਵਾਇਆ।

ਸਿੱਧੂ ਦੇ ਫੈਨਜ਼ ਲਈ ਸੰਦੇਸ਼

ਅਖ਼ੀਰ ਵਿੱਚ, ਅਥਲੀਟ ਸੰਦੀਪ ਸਿੰਘ ਨੇ ਸਾਰੇ ਫੈਨਜ਼ ਨੂੰ ਇੱਕ ਅਹਿਮ ਅਪੀਲ ਕੀਤੀ ਕਿ ਉਹ ਸਿੱਧੂ ਨੂੰ ਸਿਰਫ ਪਲੇਲਿਸਟਾਂ ਜਾਂ ਸਟੇਟਸਾਂ ਤੱਕ ਸੀਮਤ ਨਾ ਰੱਖਣ। ਇਸ ਦੇ ਨਾਲ ਹੀ, ਅਥਲੀਟ ਨੇ ਕਿਹਾ ਕਿ ਜੇਕਰ ਤੁਸੀਂ ਸੱਚਮੁੱਚ ਉਸ ਨੂੰ ਸ਼ਰਧਾਂਜਲੀ ਦੇਣਾ ਚਾਹੁੰਦੇ ਹੋ, ਤਾਂ ਉਸ ਦੀ ਸੋਚ, ਉਸ ਦੇ ਵਿਸ਼ਵਾਸ ਅਤੇ ਉਸ ਦੇ ਜਜ਼ਬੇ ਨੂੰ ਆਪਣੀ ਜ਼ਿੰਦਗੀ ਵਿੱਚ ਅਮਲ ਕਰੋ। ਸਿੱਧੂ ਮੂਸੇਵਾਲਾ ਅੱਜ ਵੀ ਲੱਖਾਂ ਦਿਲਾਂ ਵਿੱਚ ਜਿਉਂਦਾ ਹੈ ਅਤੇ ਹਮੇਸ਼ਾ ਰਹੇਗਾ।