‘ਕ੍ਰਿਕੇਟ ਕੈਨੇਡਾ’ ਵਿੱਚ ਪੰਜਾਬੀ ਨੇ ਗੱਡੇ ਝੰਡੇ…ਕੋਠਾ ਅੰਬਰਹਰ ਤੋਂ ਕੈਨੇਡਾ ਤੱਕ ਦਾ ਸਫ਼ਰ..! ‘ਅਫ਼ਰੀਦੀ’ ਦੇ ਨਾਮ ਨਾਲ ਜਾਣਿਆ ਜਾਂਦਾ ਹੈ ਅਰਵਿੰਦਰ ਖੋਸਾ

ਦੁਨੀਆ ਭਰ ਵਿੱਚ ਵੱਸਦੇ ਪੰਜਾਬੀਆਂ ਲਈ ਮਾਣ ਵਾਲੀ ਖ਼ਬਰ ਸਾਹਮਣੇ ਆਈ ਹੈ। ਪੰਜਾਬ ਦੇ ਫਿਰੋਜ਼ਪੁਰ ਦੀ ਮਿੱਟੀ ਦੇ ਜਾਏ ਅਰਵਿੰਦਰ ਸਿੰਘ ਖੋਸਾ ਨੇ ਵਿਦੇਸ਼ੀ ਧਰਤੀ ‘ਤੇ ਪੰਜਾਬੀਅਤ ਦਾ ਪਰਚਮ ਲਹਿਰਾਉਂਦਿਆਂ ‘ਕ੍ਰਿਕੇਟ ਕੈਨੇਡਾ’ ਦੇ ਪ੍ਰਧਾਨ ਦੀ ਵੱਕਾਰੀ ਚੋਣ ਜਿੱਤ ਲਈ ਹੈ। ਇਸ ਜਿੱਤ ਨੇ ਨਾ ਸਿਰਫ ਕੈਨੇਡਾ ਦੇ ਖੇਡ ਜਗਤ ਵਿੱਚ ਪੰਜਾਬੀਆਂ ਦੀ ਪਕੜ ਮਜ਼ਬੂਤ ਕੀਤੀ ਹੈ, ਸਗੋਂ ਸਰਹੱਦੀ ਜ਼ਿਲ੍ਹੇ ਫਿਰੋਜ਼ਪੁਰ ਦਾ ਨਾਮ ਵੀ ਕੌਮਾਂਤਰੀ ਪੱਧਰ ‘ਤੇ ਚਮਕਾਇਆ ਹੈ।

ਅਰਵਿੰਦਰ ਸਿੰਘ ਖੋਸਾ, ਜਿਨ੍ਹਾਂ ਨੂੰ ਖੇਡ ਜਗਤ ਵਿੱਚ ‘ਅਫ਼ਰੀਦੀ’ ਦੇ ਨਾਮ ਨਾਲ ਵੀ ਜਾਣਿਆ ਜਾਂਦਾ ਹੈ, ਫਿਰੋਜ਼ਪੁਰ ਦੇ ਪਿੰਡ ਕੋਠਾ ਅੰਬਰਹਰ ਦੇ ਜੰਮਪਲ ਹਨ। ਉਨ੍ਹਾਂ ਦੀ ਇਸ ਉਪਲੱਬਧੀ ‘ਤੇ ਖੁਸ਼ੀ ਸਾਂਝੀ ਕਰਦਿਆਂ ਉਨ੍ਹਾਂ ਦੇ ਸਰੀਰਕ ਸਿੱਖਿਆ ਅਧਿਆਪਕ ਅਤੇ ਰਾਸ਼ਟਰੀ ਐਵਾਰਡ ਜੇਤੂ ਗੁਰਨਾਮ ਸਿੱਧੂ ‘ਗਾਮਾ’ ਨੇ ਦੱਸਿਆ ਕਿ ਅਰਵਿੰਦਰ ਵਿੱਚ ਬਚਪਨ ਤੋਂ ਹੀ ਖੇਡਾਂ ਪ੍ਰਤੀ ਅਥਾਹ ਲਗਨ ਸੀ।

ਦੋਸਤਾਂ ਦਾ ‘ਅਫ਼ਰੀਦੀ’ ਅਰਵਿੰਦਰ ਖੋਸਾ

ਅਰਵਿੰਦਰ ਦੇ ਪਿਤਾ ਸਵਰਗਵਾਸੀ ਨਿਸ਼ਾਨ ਸਿੰਘ ਖੋਸਾ ਅਤੇ ਉਨ੍ਹਾਂ ਦੇ ਚਾਚਾ ਸੁਖਵੰਤ ਸਿੰਘ ਖੋਸਾ (ਸਾਬਕਾ ਸੀਨੀਅਰ ਸਹਾਇਕ, ਡਿਪਟੀ ਕਮਿਸ਼ਨਰ ਦਫ਼ਤਰ ਫਿਰੋਜ਼ਪੁਰ) ਉਹ ਸ਼ਖਸੀਅਤਾਂ ਸਨ, ਜਿਨ੍ਹਾਂ ਦੀ ਪ੍ਰੇਰਨਾ ਸਦਕਾ ਅਰਵਿੰਦਰ ਨੇ ਕ੍ਰਿਕੇਟ ਦੇ ਬੈਟ ਨੂੰ ਫੜਿਆ ਸੀ। ਉਨ੍ਹਾਂ ਨੇ ਆਪਣੀ ਮੁੱਢਲੀ ਪੜ੍ਹਾਈ ਫਿਰੋਜ਼ਪੁਰ ਦੇ ਡਾਲ ਚੰਦ ਸੀਨੀਅਰ ਸੈਕੰਡਰੀ ਸਕੂਲ (ਫਿਰੋਜ਼ਪੁਰ ਛਾਉਣੀ) ਤੋਂ ਅਤੇ ਉੱਚ ਵਿੱਦਿਆ ਗੁਰੂ ਨਾਨਕ ਕਾਲਜ ਤੋਂ ਹਾਸਲ ਕੀਤੀ। ਉਨ੍ਹਾਂ ਦੇ ਖੇਡਣ ਦੇ ਹਮਲਾਵਰ ਅੰਦਾਜ਼ ਕਾਰਨ ਹੀ ਉਨ੍ਹਾਂ ਦੇ ਦੋਸਤ ਤੇ ਸਾਥੀ ਖਿਡਾਰੀ ਉਨ੍ਹਾਂ ਨੂੰ ਪਿਆਰ ਨਾਲ ‘ਅਫ਼ਰੀਦੀ’ ਕਹਿ ਕੇ ਬੁਲਾਉਂਦੇ ਹਨ।

ਕੈਨੇਡਾ ਕ੍ਰਿਕੇਟ ਦੀਆਂ ਇਹ ਚੋਣਾਂ ਕਾਫ਼ੀ ਸਮੇਂ ਤੋਂ ਵਿਵਾਦਾਂ ਅਤੇ ਦੇਰੀ ਦਾ ਸ਼ਿਕਾਰ ਸਨ। ਆਈ.ਸੀ.ਸੀ. (ICC) ਵੱਲੋਂ ਵੀ ਲਗਾਤਾਰ ਦਬਾਅ ਪਾਇਆ ਜਾ ਰਿਹਾ ਸੀ ਕਿ ਕੈਨੇਡਾ ਵਿੱਚ ਕ੍ਰਿਕੇਟ ਦੇ ਪ੍ਰਬੰਧ ਨੂੰ ਸੁਧਾਰਨ ਲਈ ਜਲਦ ਚੋਣਾਂ ਕਰਵਾਈਆਂ ਜਾਣ। ਅਰਵਿੰਦਰ ਖੋਸਾ ਨੇ ਦੱਸਿਆ ਕਿ ਜਦੋਂ ਸਾਰੇ ਰਾਹ ਬੰਦ ਹੁੰਦੇ ਦਿਖਾਈ ਦਿੱਤੇ, ਤਾਂ ਉਨ੍ਹਾਂ ਨੇ ਅਦਾਲਤ ਦਾ ਬੂਹਾ ਖੜਕਾਇਆ।

ਕੈਨੇਡਾ ਦੀ ਸੁਪਰੀਮ ਕੋਰਟ ਦੇ ਸਖ਼ਤ ਹੁਕਮਾਂ ਤੋਂ ਬਾਅਦ ਹੀ ਇਹ ਚੋਣਾਂ ਸੰਭਵ ਹੋ ਸਕੀਆਂ। ਬੀਤੇ ਕੱਲ੍ਹ ਹੋਈ ਵੋਟਿੰਗ ਦੌਰਾਨ ਅਰਵਿੰਦਰ ਖੋਸਾ ਨੇ ਹੂੰਝਾਫੇਰ ਜਿੱਤ ਹਾਸਲ ਕੀਤੀ। ਕੁੱਲ 10 ਸਟੇਟਾਂ ਵਿੱਚੋਂ 8 ਸਟੇਟਾਂ ਨੇ ਅਰਵਿੰਦਰ ਖੋਸਾ ਦੇ ਹੱਕ ਵਿੱਚ ਫ਼ਤਵਾ ਦਿੱਤਾ। ਇਹ ਵੱਡੀ ਲੀਡ ਇਸ ਗੱਲ ਦਾ ਸਬੂਤ ਹੈ ਕਿ ਕੈਨੇਡਾ ਦੇ ਕ੍ਰਿਕੇਟ ਪ੍ਰੇਮੀ ਅਤੇ ਪ੍ਰਬੰਧਕ ਇੱਕ ਨੌਜਵਾਨ ਅਤੇ ਦੂਰਅੰਦੇਸ਼ੀ ਲੀਡਰਸ਼ਿਪ ਦੀ ਤਲਾਸ਼ ਵਿੱਚ ਸਨ।

ਮੈਂ ਕੈਨੇਡਾ ਕ੍ਰਿਕੇਟ ਲਈ ਆਪਣੀ ਪੂਰੀ ਰੂਹ ਲਗਾ ਦੇਵਾਂਗਾ- ਅਰਵਿੰਦਰ ਖੋਸਾ

ਪ੍ਰਧਾਨ ਬਣਨ ਤੋਂ ਬਾਅਦ ਅਰਵਿੰਦਰ ਖੋਸਾ ਨੇ ਕਿਹਾ ਕਿ ਉਨ੍ਹਾਂ ਦਾ ਮੁੱਖ ਟੀਚਾ ਕੈਨੇਡਾ ਵਿੱਚ ਕ੍ਰਿਕੇਟ ਦੇ ਬੁਨਿਆਦੀ ਢਾਂਚੇ ਨੂੰ ਮਜ਼ਬੂਤ ਕਰਨਾ ਹੈ। ਉਨ੍ਹਾਂ ਕਿਹਾ, “ਮੈਂ ਕੈਨੇਡਾ ਕ੍ਰਿਕੇਟ ਲਈ ਆਪਣੀ ਪੂਰੀ ਰੂਹ ਲਗਾ ਦੇਵਾਂਗਾ। ਸਾਡੀ ਕੋਸ਼ਿਸ਼ ਹੋਵੇਗੀ ਕਿ ਕੈਨੇਡਾ ਦੀ ਟੀਮ ਕੌਮਾਂਤਰੀ ਪੱਧਰ ‘ਤੇ ਵੱਡੀਆਂ ਟੀਮਾਂ ਨੂੰ ਟੱਕਰ ਦੇਵੇ ਅਤੇ ਇਥੋਂ ਦੇ ਸਥਾਨਕ ਨੌਜਵਾਨਾਂ ਨੂੰ ਖੇਡਣ ਦੇ ਬਿਹਤਰ ਮੌਕੇ ਮਿਲਣ।”

ਖੋਸਾ ਬਣਿਆ ਕੈਨੇਡਾ ਪ੍ਰਧਾਨ ਤਾਂ, ਪੰਜਾਬੀਆਂ ਵਿੱਚ ਖੁਸ਼ੀ ਦੀ ਲਹਿਰ

ਅਰਵਿੰਦਰ ਖੋਸਾ ਦੀ ਇਸ ਜਿੱਤ ਨਾਲ ਫਿਰੋਜ਼ਪੁਰ ਅਤੇ ਸਮੁੱਚੇ ਪੰਜਾਬ ਵਿੱਚ ਜਸ਼ਨ ਦਾ ਮਾਹੌਲ ਹੈ। ਖੋਸਾ ਦੇ ਅਧਿਆਪਕ ‘ਗਾਮਾ’ ਸਿੱਧੂ ਨੇ ਕਿਹਾ ਕਿ ਅਰਵਿੰਦਰ ਨੇ ਇਹ ਸਾਬਤ ਕਰ ਦਿੱਤਾ ਹੈ ਕਿ ਜੇਕਰ ਇਰਾਦੇ ਨੇਕ ਹੋਣ ਅਤੇ ਮਿਹਨਤ ਸੱਚੀ ਹੋਵੇ, ਤਾਂ ਦੁਨੀਆ ਦੀ ਕੋਈ ਵੀ ਅਦਾਲਤ ਜਾਂ ਤਾਕਤ ਤੁਹਾਨੂੰ ਸਫ਼ਲ ਹੋਣ ਤੋਂ ਨਹੀਂ ਰੋਕ ਸਕਦੀ। ਅਰਵਿੰਦਰ ਦੀ ਜਿੱਤ ਸਿਰਫ ਉਸ ਦੀ ਨਿਜੀ ਜਿੱਤ ਨਹੀਂ, ਸਗੋਂ ਹਰ ਉਸ ਪੰਜਾਬੀ ਦੀ ਜਿੱਤ ਹੈ ਜੋ ਵਿਦੇਸ਼ਾਂ ਵਿੱਚ ਮਿਹਨਤ ਕਰਕੇ ਆਪਣੇ ਦੇਸ਼ ਦਾ ਨਾਮ ਰੌਸ਼ਨ ਕਰ ਰਿਹਾ ਹੈ।

ਅਰਵਿੰਦਰ ਸਿੰਘ ਖੋਸਾ ਦੀ ‘ਕ੍ਰਿਕੇਟ ਕੈਨੇਡਾ’ ਦੇ ਪ੍ਰਧਾਨ ਵਜੋਂ ਨਿਯੁਕਤੀ ਕੈਨੇਡੀਅਨ ਕ੍ਰਿਕੇਟ ਵਿੱਚ ਇੱਕ ਨਵੇਂ ਅਧਿਆਇ ਦੀ ਸ਼ੁਰੂਆਤ ਹੈ। ਪੰਜਾਬੀਆਂ ਨੂੰ ਉਮੀਦ ਹੈ ਕਿ ਉਨ੍ਹਾਂ ਦਾ ‘ਅਫ਼ਰੀਦੀ’ ਹੁਣ ਖੇਡ ਦੇ ਮੈਦਾਨ ਦੇ ਨਾਲ-ਨਾਲ ਪ੍ਰਬੰਧਕੀ ਮੈਦਾਨ ਵਿੱਚ ਵੀ ਵੱਡੇ ਛੱਕੇ ਮਾਰੇਗਾ ਅਤੇ ਕੈਨੇਡਾ ਕ੍ਰਿਕੇਟ ਨੂੰ ਨਵੀਆਂ ਬੁਲੰਦੀਆਂ ‘ਤੇ ਲੈ ਕੇ ਜਾਵੇਗਾ।