ਪਟਿਆਲਾ ਦੇ ਨੂਰ ਸਿੰਗਲਾ ਨੇ ਰਚਿਆ ਇਤਿਹਾਸ, CA ਫਾਈਨਲ ਵਿੱਚ ਹਾਸਲ ਕੀਤਾ ਆਲ ਇੰਡੀਆ ਰੈਂਕ-1

ਚਾਰਟਡ ਅਕਾਊਂਟੈਂਸੀ (CA) ਨੂੰ ਦੇਸ਼ ਦੀਆਂ ਸਭ ਤੋਂ ਔਖੀਆਂ ਪੇਸ਼ੇਵਰ ਪ੍ਰੀਖਿਆਵਾਂ ਵਿੱਚ ਗਿਣਿਆ ਜਾਂਦਾ ਹੈ। ਹਰ ਸਾਲ ਲੱਖਾਂ ਵਿਦਿਆਰਥੀ ਇਸ ਸਫ਼ਰ ਦੀ ਸ਼ੁਰੂਆਤ ਕਰਦੇ ਹਨ, ਪਰ ਅੰਤ ਤੱਕ ਪਹੁੰਚਣ ਵਾਲਿਆਂ ਦੀ ਗਿਣਤੀ ਕਾਫ਼ੀ ਘੱਟ ਹੁੰਦੀ ਹੈ। ਅਜਿਹੇ ਵਿੱਚ ਜੇਕਰ ਕੋਈ ਵਿਦਿਆਰਥੀ ਨਾ ਸਿਰਫ਼ CA ਫਾਈਨਲ ਪਾਸ ਕਰੇ, ਸਗੋਂ ਪੂਰੇ ਦੇਸ਼ ਵਿੱਚ ਪਹਿਲਾ ਸਥਾਨ ਵੀ ਹਾਸਲ ਕਰ ਲਵੇ, ਤਾਂ ਇਹ ਆਪਣੇ ਆਪ ਵਿੱਚ ਇੱਕ ਵੱਡੀ ਉਪਲਬਧੀ ਹੁੰਦੀ ਹੈ।

ਪੰਜਾਬ ਦੇ ਪਟਿਆਲਾ ਨਾਲ ਸਬੰਧਤ ਨੂਰ ਸਿੰਗਲਾ ਨੇ ਇਹ ਮਾਣ ਹਾਸਲ ਕੀਤਾ ਹੈ। ਇੰਸਟੀਚਿਊਟ ਆਫ਼ ਚਾਰਟਡ ਅਕਾਊਂਟੈਂਟਸ ਆਫ਼ ਇੰਡੀਆ (ICAI) ਵੱਲੋਂ ਐਲਾਨੇ ਗਏ CA ਫਾਈਨਲ ਦੇ ਨਤੀਜਿਆਂ ਵਿੱਚ ਨੂਰ ਨੇ 800 ਵਿੱਚੋਂ 499 ਅੰਕ ਹਾਸਲ ਕਰਕੇ 83.17 ਫ਼ੀਸਦੀ ਸਕੋਰ ਨਾਲ ਆਲ ਇੰਡੀਆ ਰੈਂਕ-1 ਆਪਣੇ ਨਾਮ ਕੀਤੀ। ਇਸ ਉਪਲਬਧੀ ਨਾਲ ਉਨ੍ਹਾਂ ਨੇ ਨਾ ਸਿਰਫ਼ ਆਪਣੇ ਪਰਿਵਾਰ, ਸਗੋਂ ਪਟਿਆਲਾ ਅਤੇ ਪੰਜਾਬ ਦਾ ਨਾਮ ਵੀ ਦੇਸ਼ ਭਰ ਵਿੱਚ ਰੌਸ਼ਨ ਕੀਤਾ ਹੈ।

ਖ਼ਾਸ ਗੱਲ ਇਹ ਵੀ ਹੈ ਕਿ ਨੂਰ ਨੇ CA ਦੀਆਂ ਤਿੰਨਾਂ ਪ੍ਰਮੁੱਖ ਪ੍ਰੀਖਿਆਵਾਂ ਪਹਿਲੇ ਹੀ ਯਤਨ ਵਿੱਚ ਪਾਸ ਕੀਤੀਆਂ। ਇਸ ਤੋਂ ਪਹਿਲਾਂ ਉਹ CA ਇੰਟਰਮੀਡੀਏਟ ਵਿੱਚ ਵੀ ਆਲ ਇੰਡੀਆ ਰੈਂਕ-2 ਹਾਸਲ ਕਰ ਚੁੱਕੇ ਸਨ, ਪਰ ਉਨ੍ਹਾਂ ਦੇ ਮੁਤਾਬਕ ਉਸ ਨਤੀਜੇ ਨੇ ਉਨ੍ਹਾਂ ਦੇ ਅੰਦਰ ਇੱਕ ਨਵਾਂ ਟੀਚਾ ਜਗਾ ਦਿੱਤਾ ਸੀ।

ਨਤੀਜੇ ਤੋਂ ਪਹਿਲਾਂ ਹੀ ਆ ਗਿਆ ਸੀ ਉਹ ਫੋਨ

ਸਾਡਾ ਪੰਜਾਬ ਨਾਲ ਖ਼ਾਸ ਗੱਲਬਾਤ ਦੌਰਾਨ ਨੂਰ ਸਿੰਗਲਾ ਨੇ ਦੱਸਿਆ ਕਿ ਨਤੀਜੇ ਆਨਲਾਈਨ ਜਾਰੀ ਹੋਣ ਤੋਂ ਪਹਿਲਾਂ ਹੀ ਉਨ੍ਹਾਂ ਨੂੰ ICAI ਦੇ ਪ੍ਰਧਾਨ ਦਾ ਫੋਨ ਆਇਆ।

ਉਸ ਕਾਲ ਦੌਰਾਨ ਉਨ੍ਹਾਂ ਨੂੰ ਦੱਸਿਆ ਗਿਆ ਕਿ ਉਹ CA ਫਾਈਨਲ ਵਿੱਚ ਆਲ ਇੰਡੀਆ ਰੈਂਕ-1 ‘ਤੇ ਰਹੇ ਹਨ ਅਤੇ ਉਨ੍ਹਾਂ ਦੇ 499 ਅੰਕ ਹਨ। ਨੂਰ ਕਹਿੰਦੇ ਹਨ ਕਿ ਉਸ ਪਲ ਤੱਕ ਉਹ ਸਿਰਫ਼ “ਨੂਰ ਸਿੰਗਲਾ” ਸਨ, ਪਰ ਕੁਝ ਹੀ ਸਕਿੰਟਾਂ ਬਾਅਦ ਉਹ “ਸੀਏ ਨੂਰ ਸਿੰਗਲਾ” ਬਣ ਗਏ।

ਉਹ ਦੱਸਦੇ ਹਨ ਕਿ ਇੰਟਰਮੀਡੀਏਟ ਵਿੱਚ AIR-2 ਮਿਲਣ ਤੋਂ ਬਾਅਦ ਉਨ੍ਹਾਂ ਨੂੰ ਇਹ ਅਹਿਸਾਸ ਹੋ ਗਿਆ ਸੀ ਕਿ ਜੇਕਰ ਸਹੀ ਤਿਆਰੀ ਅਤੇ ਨਿਰੰਤਰ ਮਿਹਨਤ ਜਾਰੀ ਰੱਖੀ ਜਾਵੇ ਤਾਂ ਫਾਈਨਲ ਵਿੱਚ ਹੋਰ ਵੀ ਵਧੀਆ ਪ੍ਰਦਰਸ਼ਨ ਕੀਤਾ ਜਾ ਸਕਦਾ ਹੈ। ਇਹੀ ਸੋਚ ਪੂਰੀ ਤਿਆਰੀ ਦੌਰਾਨ ਉਨ੍ਹਾਂ ਦੇ ਨਾਲ ਰਹੀ।

ਵੱਡੀ ਭੈਣ ਤੋਂ ਮਿਲੀ ਪ੍ਰੇਰਣਾ

ਨੂਰ ਸਿੰਗਲਾ ਦਾ ਸਬੰਧ ਪਟਿਆਲਾ ਦੇ ਇੱਕ ਪਰਿਵਾਰ ਨਾਲ ਹੈ। ਉਨ੍ਹਾਂ ਦੇ ਪਿਤਾ ਗਗਨਦੀਪ ਸਿੰਗਲਾ ਕਾਰੋਬਾਰ ਨਾਲ ਜੁੜੇ ਹੋਏ ਹਨ, ਜਦਕਿ ਮਾਤਾ ਸੁਜਾਤਾ ਸਿੰਗਲਾ ਗ੍ਰਹਿਣੀ ਹਨ। ਪਰਿਵਾਰ ਵਿੱਚ ਉਨ੍ਹਾਂ ਦੀਆਂ ਦੋ ਵੱਡੀਆਂ ਭੈਣਾਂ ਹਨ।

ਨੂਰ ਦੱਸਦੇ ਹਨ ਕਿ ਚਾਰਟਡ ਅਕਾਊਂਟੈਂਸੀ ਕਰਨ ਦੀ ਪ੍ਰੇਰਣਾ ਉਨ੍ਹਾਂ ਨੂੰ ਆਪਣੀ ਵੱਡੀ ਭੈਣ ਤੋਂ ਮਿਲੀ, ਜੋ ਖੁਦ ਵੀ ਇੱਕ ਚਾਰਟਡ ਅਕਾਊਂਟੈਂਟ ਹਨ। ਉਨ੍ਹਾਂ ਨੂੰ ਇਹ ਸਫ਼ਰ ਤੈਅ ਕਰਦੇ ਦੇਖ ਕੇ ਹੀ ਉਨ੍ਹਾਂ ਨੇ ਵੀ ਇਸ ਖੇਤਰ ਨੂੰ ਆਪਣੇ ਕਰੀਅਰ ਵਜੋਂ ਚੁਣਨ ਦਾ ਫ਼ੈਸਲਾ ਕੀਤਾ।

ਉਹ ਕਹਿੰਦੇ ਹਨ ਕਿ CA ਦਾ ਸਫ਼ਰ ਚਾਰ ਤੋਂ ਪੰਜ ਸਾਲ ਦਾ ਹੁੰਦਾ ਹੈ ਅਤੇ ਇਸ ਦੌਰਾਨ ਪਰਿਵਾਰ ਦਾ ਸਾਥ ਬਹੁਤ ਜ਼ਰੂਰੀ ਹੁੰਦਾ ਹੈ। ਉਨ੍ਹਾਂ ਦੇ ਮਾਤਾ-ਪਿਤਾ ਨੇ ਹਮੇਸ਼ਾ ਹਰ ਫ਼ੈਸਲੇ ਵਿੱਚ ਉਨ੍ਹਾਂ ਦਾ ਸਾਥ ਦਿੱਤਾ। ਚਾਹੇ ਦਿੱਲੀ ਜਾ ਕੇ ਆਰਟੀਕਲਸ਼ਿਪ ਕਰਨੀ ਹੋਵੇ ਜਾਂ ਆਨਲਾਈਨ ਕੋਚਿੰਗ ਲੈਣੀ ਹੋਵੇ, ਉਨ੍ਹਾਂ ਨੂੰ ਹਰ ਸਮੇਂ ਪਰਿਵਾਰ ਦਾ ਪੂਰਾ ਸਹਿਯੋਗ ਮਿਲਿਆ।

ਬਾਰ੍ਹਵੀਂ ਤੋਂ ਬਾਅਦ ਹੀ ਤੈਅ ਕਰ ਲਿਆ ਸੀ ਕਰੀਅਰ

ਨੂਰ ਨੇ ਪਟਿਆਲਾ ਦੇ ਡੀਏਵੀ ਪਬਲਿਕ ਸਕੂਲ ਤੋਂ ਆਪਣੀ ਸਕੂਲੀ ਪੜ੍ਹਾਈ ਪੂਰੀ ਕੀਤੀ। ਬਾਰ੍ਹਵੀਂ ਕਾਮਰਸ ਤੋਂ ਕਰਨ ਤੋਂ ਬਾਅਦ ਉਨ੍ਹਾਂ ਕੋਲ ਦੋ ਵਿਕਲਪ ਸਨ—ਰਵਾਇਤੀ ਗ੍ਰੈਜੂਏਸ਼ਨ ਕਰਨੀ ਜਾਂ ਸਿੱਧਾ ਚਾਰਟਡ ਅਕਾਊਂਟੈਂਸੀ ਵੱਲ ਵਧਣਾ।

ਉਹ ਦੱਸਦੇ ਹਨ ਕਿ ਉਨ੍ਹਾਂ ਦੀ ਦਿਲਚਸਪੀ ਸ਼ੁਰੂ ਤੋਂ ਹੀ ਕਾਰਪੋਰੇਟ ਫਾਇਨੈਂਸ ਅਤੇ ਵਿੱਤੀ ਪ੍ਰਬੰਧਨ ਨਾਲ ਜੁੜੇ ਵਿਸ਼ਿਆਂ ਵਿੱਚ ਸੀ। ਇਸ ਲਈ ਉਨ੍ਹਾਂ ਨੇ CA ਨੂੰ ਹੀ ਆਪਣਾ ਕਰੀਅਰ ਬਣਾਉਣ ਦਾ ਫ਼ੈਸਲਾ ਕੀਤਾ। ਇਸ ਦੇ ਨਾਲ ਹੀ ਉਨ੍ਹਾਂ ਨੇ ਇੰਦਰਾ ਗਾਂਧੀ ਨੈਸ਼ਨਲ ਓਪਨ ਯੂਨੀਵਰਸਿਟੀ (IGNOU) ਤੋਂ ਆਪਣੀ ਗ੍ਰੈਜੂਏਸ਼ਨ ਵੀ ਪੂਰੀ ਕੀਤੀ।

ਦਿੱਲੀ ਵਿੱਚ ਆਰਟੀਕਲਸ਼ਿਪ, ਫਿਰ ਪਟਿਆਲਾ ਵਿੱਚ ਤਿਆਰੀ

CA ਇੰਟਰਮੀਡੀਏਟ ਪਾਸ ਕਰਨ ਤੋਂ ਬਾਅਦ ਨੂਰ ਦੋ ਸਾਲ ਦੀ ਲਾਜ਼ਮੀ ਆਰਟੀਕਲਸ਼ਿਪ ਲਈ ਦਿੱਲੀ ਚਲੇ ਗਏ। ਇਸ ਦੌਰਾਨ ਉਨ੍ਹਾਂ ਨੂੰ ਅਸਲ ਕਾਰਪੋਰੇਟ ਮਾਹੌਲ ਵਿੱਚ ਕੰਮ ਕਰਨ ਦਾ ਮੌਕਾ ਮਿਲਿਆ, ਜਿਸ ਨਾਲ ਪੜ੍ਹਾਈ ਦੇ ਨਾਲ-ਨਾਲ ਵਿਹਾਰਕ ਤਜਰਬਾ ਵੀ ਮਿਲਿਆ।

ਆਰਟੀਕਲਸ਼ਿਪ ਪੂਰੀ ਹੋਣ ਤੋਂ ਬਾਅਦ ਉਹ ਅਗਸਤ 2025 ਵਿੱਚ ਵਾਪਸ ਪਟਿਆਲਾ ਆ ਗਏ ਅਤੇ ਅਗਲੇ ਅੱਠ ਤੋਂ ਨੌਂ ਮਹੀਨੇ ਪੂਰੀ ਤਰ੍ਹਾਂ CA ਫਾਈਨਲ ਦੀ ਤਿਆਰੀ ਲਈ ਸਮਰਪਿਤ ਕਰ ਦਿੱਤੇ।

ਨੂਰ ਦੱਸਦੇ ਹਨ ਕਿ ਇਸ ਸਮੇਂ ਦੌਰਾਨ ਉਹ ਹਰ ਰੋਜ਼ ਘੱਟੋ-ਘੱਟ 9 ਤੋਂ 10 ਘੰਟੇ ਪੜ੍ਹਾਈ ਕਰਦੇ ਸਨ। ਉਨ੍ਹਾਂ ਲਈ ਸਿਰਫ਼ ਲੰਬੇ ਸਮੇਂ ਤੱਕ ਕਿਤਾਬਾਂ ਸਾਹਮਣੇ ਬੈਠਣਾ ਹੀ ਮਹੱਤਵਪੂਰਨ ਨਹੀਂ ਸੀ, ਸਗੋਂ ਹਰ ਰੋਜ਼ ਨਿਯਮਿਤ ਤੌਰ ‘ਤੇ ਪੜ੍ਹਨਾ ਅਤੇ ਲਗਾਤਾਰ ਰਿਵੀਜ਼ਨ ਕਰਨਾ ਵੱਧ ਅਹਿਮ ਸੀ।

ਜਦੋਂ ਪੜ੍ਹਾਈ ਤੋਂ ਮਨ ਉਚੱਟ ਜਾਂਦਾ ਸੀ…

ਲਗਾਤਾਰ ਕਈ ਮਹੀਨੇ ਤੱਕ ਇੱਕੋ ਟੀਚੇ ‘ਤੇ ਕੰਮ ਕਰਨਾ ਆਸਾਨ ਨਹੀਂ ਹੁੰਦਾ। ਨੂਰ ਮੰਨਦੇ ਹਨ ਕਿ ਉਨ੍ਹਾਂ ਨੂੰ ਵੀ ਕਈ ਵਾਰ ਅਜਿਹਾ ਮਹਿਸੂਸ ਹੋਇਆ ਜਦੋਂ ਪੜ੍ਹਾਈ ਤੋਂ ਮਨ ਉਚੱਟ ਜਾਂਦਾ ਸੀ।

ਅਜਿਹੇ ਸਮੇਂ ਉਹ ਆਪਣੇ ਆਪ ਨੂੰ ਜ਼ਬਰਦਸਤੀ ਪੜ੍ਹਾਈ ਵੱਲ ਨਹੀਂ ਧੱਕਦੇ ਸਨ। ਉਹ ਇੱਕ ਜਾਂ ਦੋ ਦਿਨ ਦਾ ਬ੍ਰੇਕ ਲੈਂਦੇ, ਪਰਿਵਾਰ ਨਾਲ ਸਮਾਂ ਬਿਤਾਉਂਦੇ, ਸੈਰ ਕਰਨ ਜਾਂ ਸਾਈਕਲਿੰਗ ਲਈ ਨਿਕਲ ਜਾਂਦੇ।

ਉਹ ਕਹਿੰਦੇ ਹਨ ਕਿ ਇੱਕ ਗੱਲ ਦਾ ਉਨ੍ਹਾਂ ਨੇ ਹਮੇਸ਼ਾ ਧਿਆਨ ਰੱਖਿਆ ਕਿ ਬ੍ਰੇਕ ਦੌਰਾਨ ਵੀ ਸੋਸ਼ਲ ਮੀਡੀਆ ਤੋਂ ਦੂਰ ਰਹਿਣਾ ਹੈ, ਕਿਉਂਕਿ ਉਨ੍ਹਾਂ ਦੇ ਮੁਤਾਬਕ ਇਸ ਨਾਲ ਦਿਮਾਗ ਨੂੰ ਅਸਲ ਆਰਾਮ ਨਹੀਂ ਮਿਲਦਾ।

ਉਹ ਆਪਣੇ ਤਿਆਰੀ ਦੇ ਦਿਨਾਂ ਦੀ ਇੱਕ ਘਟਨਾ ਵੀ ਯਾਦ ਕਰਦੇ ਹਨ। ਮਾਰਚ 2026 ਵਿੱਚ ਲਗਾਤਾਰ ਪੜ੍ਹਾਈ ਕਾਰਨ ਉਹ ਇੰਨੇ ਥੱਕ ਗਏ ਕਿ ਉਨ੍ਹਾਂ ਨੂੰ ਦੋ ਦਿਨ ਲਈ ਪੜ੍ਹਾਈ ਤੋਂ ਪੂਰੀ ਤਰ੍ਹਾਂ ਦੂਰ ਹੋਣਾ ਪਿਆ। ਉਸ ਬ੍ਰੇਕ ਤੋਂ ਬਾਅਦ ਹੀ ਉਹ ਨਵੀਂ ਊਰਜਾ ਨਾਲ ਮੁੜ ਤਿਆਰੀ ਵਿੱਚ ਜੁਟੇ।

ਅੱਗੇ ਕੀ ਹੈ ਯੋਜਨਾ?

ਨੂਰ ਸਿੰਗਲਾ ਦੱਸਦੇ ਹਨ ਕਿ ਫਿਲਹਾਲ ਉਨ੍ਹਾਂ ਨੂੰ 10 ਤੋਂ 15 ਦਿਨ ਦੀ ਬਾਕੀ ਰਹਿੰਦੀ ਇੰਸਟੀਚਿਊਸ਼ਨਲ ਟ੍ਰੇਨਿੰਗ ਪੂਰੀ ਕਰਨੀ ਹੈ। ਇਸ ਤੋਂ ਬਾਅਦ ਉਹ ਇੱਕ ਤੋਂ ਦੋ ਸਾਲ ਤੱਕ ਕਿਸੇ ਕਾਰਪੋਰੇਟ ਕੰਪਨੀ ਵਿੱਚ ਕੰਮ ਕਰਕੇ ਉਦਯੋਗ ਦਾ ਤਜਰਬਾ ਹਾਸਲ ਕਰਨਾ ਚਾਹੁੰਦੇ ਹਨ।

ਹਾਲਾਂਕਿ ਉਨ੍ਹਾਂ ਦਾ ਲੰਬੇ ਸਮੇਂ ਦਾ ਟੀਚਾ ਨੌਕਰੀ ਕਰਨਾ ਨਹੀਂ ਹੈ। ਉਹ ਆਪਣੇ ਆਪ ਨੂੰ ਇੱਕ ਉਦਯੋਗਪਤੀ ਵਜੋਂ ਦੇਖਦੇ ਹਨ ਅਤੇ ਭਵਿੱਖ ਵਿੱਚ ਆਪਣਾ ਕਾਰੋਬਾਰ ਜਾਂ ਵਿੱਤੀ ਸਲਾਹਕਾਰੀ ਨਾਲ ਜੁੜਿਆ ਕੰਮ ਸ਼ੁਰੂ ਕਰਨਾ ਚਾਹੁੰਦੇ ਹਨ।

ਨੌਜਵਾਨਾਂ ਲਈ ਕੀ ਹੈ ਸੰਦੇਸ਼?

ਗੱਲਬਾਤ ਦੇ ਅਖੀਰ ਵਿੱਚ ਨੂਰ ਸਿੰਗਲਾ ਨੇ ਨੌਜਵਾਨਾਂ ਨੂੰ ਸੰਦੇਸ਼ ਦਿੰਦਿਆਂ ਕਿਹਾ ਕਿ ਜੇਕਰ ਕੋਈ ਵੀ ਵਿਅਕਤੀ ਆਪਣੇ ਖੇਤਰ ਵਿੱਚ ਸਿਖਰ ਤੱਕ ਪਹੁੰਚਣਾ ਚਾਹੁੰਦਾ ਹੈ ਤਾਂ ਤਿੰਨ ਗੱਲਾਂ ਨੂੰ ਕਦੇ ਨਹੀਂ ਭੁੱਲਣਾ ਚਾਹੀਦਾ—ਨਿਰੰਤਰਤਾ, ਸਬਰ ਅਤੇ ਅਨੁਸ਼ਾਸਨ।

ਉਨ੍ਹਾਂ ਦਾ ਕਹਿਣਾ ਹੈ ਕਿ ਸਫ਼ਲਤਾ ਦਾ ਕੋਈ ਛੋਟਾ ਰਸਤਾ ਨਹੀਂ ਹੁੰਦਾ। ਲਗਾਤਾਰ ਮਿਹਨਤ ਕਰਨ ਵਾਲੇ ਵਿਦਿਆਰਥੀਆਂ ਨੂੰ ਨਤੀਜਾ ਭਾਵੇਂ ਦੇਰ ਨਾਲ ਮਿਲੇ, ਪਰ ਮਿਹਨਤ ਕਦੇ ਵਿਅਰਥ ਨਹੀਂ ਜਾਂਦੀ।

ਪਟਿਆਲਾ ਦੇ ਨੂਰ ਸਿੰਗਲਾ ਦੀ ਇਹ ਉਪਲਬਧੀ ਇੱਕ ਵਾਰ ਫਿਰ ਇਹ ਸਾਬਤ ਕਰਦੀ ਹੈ ਕਿ ਸਪਸ਼ਟ ਟੀਚਾ, ਨਿਯਮਿਤ ਮਿਹਨਤ ਅਤੇ ਪਰਿਵਾਰ ਦਾ ਸਹਿਯੋਗ ਮਿਲ ਜਾਵੇ ਤਾਂ ਵੱਡੀਆਂ ਤੋਂ ਵੱਡੀਆਂ ਪ੍ਰੀਖਿਆਵਾਂ ਵੀ ਜਿੱਤੀਆਂ ਜਾ ਸਕਦੀਆਂ ਹਨ।